گۇلميرا جاكەنقىزى, ەڭبەك جانە حالىقتى الەۋمەتتىك قورعاۋ مينيسترلىگى انا مەن بالانى قورعاۋ باسقارماسىنىڭ باسشىسى:
ەلىمىزدە «كوپبالالى وتباسى», «ناگرادتالعان انا» ۇعىمدارى الەۋمەتتىك كومەك, بەلگىلى ءبىر جەڭىلدىكتەر ۇسىنۋعا نەگىز رەتىندە قولدانىلادى. «نەكە جانە وتباسى تۋرالى» كودەكستىڭ 1-بابىنا سايكەس بىرگە تۇراتىن ءتورت جانە ودان كوپ كامەلەتكە تولماعان بالاسى بار وتباسى كوپبالالى سانالادى. ونىڭ ىشىندە كامەلەت جاسقا تولعاننان كەيىن جالپى ورتا, تەحنيكالىق-كاسىپتىك نەمەسە جوعارى, جوعارى وقۋ ورنىنان كەيىنگى ءبىلىم ۇيىمدارىندا وقيتىن بالالارى بار وتباسىلار دا وسى مارتەبەگە يە بولادى. ياعني بالاسى جوو نەمەسە كوللەدجدە وقيتىن كوپبالالى وتباسىلار بۇرىنعىشا جارماقىسىن الا بەرەدى. ەسكەرەتىنى, وقۋدا جۇرگەن بالا 23 جاسقا تولعانعا دەيىن عانا مارتەبە ساقتالادى. ياعني ءۇش بالاسى مەكتەپكە قاتىناسا, ءبىر بالاسى مەكتەپتەن كەيىنگى ءبىلىم بەرەتىن ۇيىمدا وقىسا, وندا ول كوپبالالى وتباسى الەۋمەتتىك كومەك پەن جەڭىلدىكتەردەن قاعىلمايدى.
كوپبالالى وتباسىلارعا الەۋمەتتىك قولداۋ كورسەتۋ ماقساتىندا تابىسىنا قاراماستان وتباسىنداعى بالا سانىنا بايلانىستى سارالانعان مولشەردە تولەنەتىن مەملەكەتتىك جاردەماقى 2020 جىلعى قاڭتاردان باستاپ ەنگىزىلدى.
4 بالاسى بار وتباسىلاردىڭ جاردەماقى مولشەرى – 16,03 اەك, 5 بالاسى بارلارعا – 20,04 اەك, 6 بالاسى بارلارعا – 24,05 اەك, 7 بالاسى بار وتباسىلارعا – 28,06 اەك, 8 جانە ودان دا كوپ بولسا, ءار بالاعا 4 اەك شاماسىندا تولەنەدى. بۇگىندە جاردەماقىنىڭ وسى ءتۇرى 631 مىڭنان استام وتباسىنا تاعايىندالىپ, تولەنىپ جاتىر.
تاعى ءبىر ەسكەرەتىن جايت, قولدانىستاعى زاڭناماعا سايكەس 18 جاسقا تولماعان تۇلعا بالا بولىپ ەسەپتەلەدى. وسىعان بايلانىستى كوپبالالى وتباسى مارتەبەسى ۋاقىتشا بەرىلەدى. ياعني وتباسىداعى ۇلكەن بالا 18 جاسقا تولعاندا نەمەسە كۇندىزگى وقۋ نىسانىندا وقىماعان جاعدايدا بۇل مارتەبە توقتاتىلادى. جوعارىدا ايتقانداي, بالا كۇندىزگى بولىمدە وقيتىن بولسا عانا «كوپبالالى» دەگەن مارتەبە 23 جاسقا دەيىن ساقتالادى.
وسى كۇنگە دەيىن كوپبالالى وتباسىلار جاردەماقىدان قاعىلماۋدىڭ قامىن ويلاپ, جوو-دان نەمەسە كوللەدجدەن جىل سايىن وقيتىنى تۋرالى انىقتاما الاتىن. ول قۇجاتتى حالىققا قىزمەت كورسەتۋ ورتالىقتارىنا وتكىزەتىن. قۇجات وتكىزبەسە, جاردەماقى تۇسپەيتىن. ەڭبەك جانە حالىقتى الەۋمەتتىك قورعاۋ مينيسترلىگى وسى جۇمىستى اۆتوماتتاندىرۋعا كىرىستى. عىلىم جانە جوعارى ءبىلىم مينيسترلىگى, وقۋ-اعارتۋ مينيسترلىگىنىڭ اقپاراتتىق جۇيەسىنە قوسىلعان سوڭ, مالىمەتتەر كۇنبە-كۇن ءتۇسىپ وتىرادى. وسىلايشا, كەلەشەكتە وتباسىلار بالانىڭ جوو نەمەسە كوللەدجدە وقيتىنى تۋرالى انىقتاما الىپ, سابىلمايدى. بار بولعانى كوپبالالى وتباسىنا تاعايىندالعان جاردەماقىنىڭ مەرزىمى ۇزارتىلعانى تۋرالى SMS حابارلاماعا جاۋاپ بەرىپ, ماسەلەسىن شەشەدى. حاتتى العان وتباسى ءۇش كۇننىڭ ىشىندە كەلىسەتىنىن ايتىپ, ماقۇلداۋعا ءتيىس. وعان ۇلگەرمەسە, ادەتتەگىشە ءوتىنىش بەرەدى. قازىر بۇل ماسەلەنى مەملەكەتتىك ورگاندار قاراپ, جاڭا وقۋ جىلىنا دەيىن اياقتاۋدى جوسپارلاپ وتىر. جۇيە بيىل تولىق اۆتوماتتاندىرىلعان كۇننىڭ وزىندە ەسكەرەتىن جايتتار بولادى. مىسالى, بىزدە شەتەلدىڭ وقۋ ورىندارى تۋرالى دەرەك بولماعان سوڭ, وندا وقيتىن ستۋدەنتتەر بۇرىنعىشا وقيتىنىن راستايتىن انىقتاما وتكىزەدى. ەگەر كەلەر وقۋ جىلىندا قانداي دا ءبىر سەبەپتەرمەن جاردەماقى تۇسپەسە, بىردەن حالىققا قىزمەت كورسەتۋ ورتالىقتارىنا حابارلاسقانى ابزال.
