ماۋلەن اشىمباەۆ سالتاناتتى راسىمدە سويلەگەن سوزىندە سايىسقا قاتىسۋشىلارعا ءىلتيپات ءبىلدىرىپ, قازاقستاندا ينكليۋزيۆتى قوعام قۇرۋ مەملەكەت باسشىسى قاسىم-جومارت توقاەۆتىڭ ساياسي باعدارىنىڭ ماڭىزدى باسىمدىقتارىنىڭ ءبىرى ەكەنىن اتاپ ءوتتى. سونداي-اق ول كانادا, قىتاي, ۇلىبريتانيا, فرانتسيا, پورتۋگاليا, وڭتۇستىك كورەيا, برازيليا جانە باسقا دا مەملەكەتتەردىڭ وكىلدەرى باق سىنايتىن حالىقارالىق دودانىڭ اۋقىمى كەڭ ەكەنىنە نازار اۋداردى. ءىس-شارادا وسىنداي دەڭگەيدەگى جارىستىڭ قازاقستاندا ءوتۋى ەلدە پاراليمپيادالىق قوزعالىستى دامىتۋ جانە ءار ازاماتقا تەڭ مۇمكىندىك جاساۋ باعىتىندا اتقارىلىپ جاتقان جۇمىستىڭ ناتيجەسى ەكەنى دە ايتىلدى.
«Astana 2026 World Boccia Cup» ءتۋرنيرى قازاقستان بوچچا فەدەراتسياسىمەن قاتار ەلىمىزدەگى پاراليمپيادالىق قوزعالىس ءۇشىن دە ماڭىزدى وقيعا. بۇگىندە پرەزيدەنت قاسىم-جومارت توقاەۆتىڭ قولداۋىمەن ەلىمىزدە پاراسپورتتى دامىتۋعا جانە بارشا ازاماتقا تەڭ مۇمكىندىك جاساۋعا ەرەكشە كوڭىل ءبولىنىپ كەلەدى. پاراسپورتشىلاردىڭ جاتتىعۋىنا, حالىقارالىق جارىستارعا قاتىسۋىنا جانە ءوز الەۋەتىن تولىق جۇزەگە اسىرۋىنا قاجەتتى جاعداي جاسالىپ كەلەدى. استانادا سپورتتىق, مەديتسينالىق, وڭالتۋ جانە ءبىلىم بەرۋ ينفراقۇرىلىمىن بىرىكتىرگەن ەلىمىزدەگى العاشقى بىرەگەي ينكليۋزيۆتى سپورت ورتالىعىنىڭ اشىلۋى سونىڭ جارقىن كورىنىسى. مەملەكەت باسشىسىنىڭ تاپسىرماسىمەن ەلورداداعى بۇل تاجىريبە قازاقستاننىڭ باسقا وڭىرلەرىندە دە كەزەڭ-كەزەڭىمەن ىسكە اسىرىلادى», دەپ, ماۋلەن اشىمباەۆ حالىقارالىق بوچچا فەدەراتسياسىنا جانە ءتۋرنيردىڭ قازاقستاندا وتۋىنە اتسالىسقان سەرىكتەستەرگە العىس ءبىلدىردى.
بوچچا قازاقستاندا جاي عانا سپورت ەمەس. ول بۇگىندە مىڭداعان مۇمكىندىگى شەكتەۋلى ازامات پەن ولاردىڭ وتباسىلارى ءۇشىن الەۋمەتتىك ينتەگراتسيا مەن وڭالتۋدىڭ ماڭىزدى تەتىگىنە اينالدى. وسى رەتتە بوچچادان قازاقستان ۇلتتىق قۇراماسىندا قازىر ەلۋگە جۋىق پاراسپورتشى ونەر كورسەتەتىنىن اتاپ وتكەن ءجون. جارىستىڭ اشىلۋ راسىمىندە كەيىنگى جىلدارى قازاقستان بوچچا فەدەراتسياسى جاتتىقتىرۋشىلار, پارااتلەتتەر, ولاردىڭ اتا-انالارى, سونداي-اق, ەرىكتىلەرمەن بىرگە بۇل سپورتتى دامىتۋ باعىتىندا اۋقىمدى جۇمىس اتقارعانىنا دا ءمان بەرىلدى.
«بوچچا – ەرەكشە سپورت ءتۇرى. ول ەرىك-جىگەر مەن اسقاق رۋح, تاباندىلىق پەن قايسار مىنەز ارقىلى كەز كەلگەن قيىندىقتى ەڭسەرۋگە بولاتىنىن دارىپتەيدى. بۇگىن جارىس الاڭىنا شىعاتىن ءار سپورتشى – باتىلدىقتىڭ, توزىمدىلىكتىڭ جانە وزىنە دەگەن سەنىمنىڭ جارقىن ۇلگىسىن كورسەتىپ وتىر. استانادا الەم كۋبوگى ءۇشىن جارىستىڭ ءوتۋى قازاقستاندا بوچچانىڭ ودان ءارى دامۋىنا تىڭ سەرپىن بەرەتىنى انىق», دەدى ماۋلەن اشىمباەۆ.
سونىمەن قاتار بوچچانى زاماناۋي ونەر ارقىلى كەڭىنەن ناسيحاتتاۋ ماسەلەسىنە دە ەرەكشە كوڭىل ءبولىندى. بۇل رەتتە كورەرمەننىڭ ىقىلاسىنا بولەنىپ, شەتەلدىك ارىپتەستەردىڭ جوعارى باعاسىنا يە بولعان «ەرەكشە» كوركەم ءفيلمى اڭگىمەگە ارقاۋ بولدى.
ايتا كەتەيىك, «Astana 2026 World Boccia Cup» حالىقارالىق ءتۋرنيرى 2026 جىلعى 1-9 ماۋسىم ارالىعىندا وتەدى. الەم كۋبوگىنىڭ بۇل كەزەڭى رەسمي رەيتينگتىك جارىستار جۇيەسىندەگى باسەكە جانە الداعى لوس-اندجەلەس پاراليمپياداسىنا جولداما بەرەتىن ماڭىزدى ىرىكتەۋ كەزەڭدەرىنىڭ ءبىرى سانالادى.
ءوز الاڭىمىزدا وتەتىن ءدۇبىرلى دودادا قازاقستان نامىسىن 10 سپورتشى قورعايدى. ولاردىڭ ۇشەۋى قوزعالىس مۇمكىندىگى اسا شەكتەۋلى BC3 ساناتىنداعى سپورتشىلار. ولار ارنايى رامپا ارقىلى دوپتى باعىتتاپ, جارىس بارىسىندا اسسيستەنتتەردىڭ كومەگىنە سۇيەنەدى. جارىستار جەكەلەي, جۇپتىق جانە كوماندالىق سىندار بويىنشا وتكىزىلەدى.
قازاقستاندىق پاراسپورتشىلاردى دايارلاۋ جانە وقۋ-جاتتىعۋ جيىندارىن وتكىزۋ ءۇشىن پورتۋگاليادان تاجىريبەلى باپكەر روبەرتو ماتەۋش شاقىرىلعانىن دا اتاپ وتكەن ءجون. ماماندار قۇرامىنا قوسىلعان جاتتىقتىرۋشى حالىقارالىق جارىس قارساڭىندا كوماندانىڭ تەحنيكالىق جانە تاكتيكالىق دايىندىعىن جەتىلدىرۋگە باسىمدىق بەرىپ, ءتيىستى جۇمىس جۇرگىزدى. جالپى, اتالعان تۋرنير قازاقستان رەسپۋبليكاسى تۋريزم جانە سپورت مينيسترلىگىنىڭ جانە سەرىكتەستەردىڭ قولداۋىمەن ۇيىمداستىرىلدى.
سونىمەن قاتار سەنات توراعاسى حالىقارالىق بوچچا فەدەراتسياسىنىڭ پرەزيدەنتى دجون مورگانمەن كەزدەستى. تاراپتار پاراليمپيادالىق سپورتتىڭ قازىرگى احۋالى مەن ونى ودان ءارى دامىتۋ پەرسپەكتيۆالارىن, قازاقستاندا بوچچا سپورتىن كەڭىنەن ناسيحاتتاۋ ماسەلەلەرىن, وسى باعىتتاعى حالىقارالىق ىنتىماقتاستىقتى نىعايتۋ جولدارىن, سونداي-اق, سپورتشىلار مەن جاتتىقتىرۋشىلاردى ءىرى حالىقارالىق جارىستارعا دايارلاۋ ءىسىن قولداۋ تەتىكتەرىن تالقىلادى.
كەزدەسۋ بارىسىندا دجون مورگان قازاقستاننىڭ حالىقارالىق سەرىكتەستىككە اشىق ءارى سىندارلى ۇستانىمىنا جوعارى باعا بەرىپ, حالىقارالىق فەدەراتسيا ينكليۋزيۆتى قوعام قۇرۋعا باعىتتالعان بىرلەسكەن باستامالاردى قولداۋعا دايىن ەكەنىن اتاپ ءوتتى.
