ساپاردىڭ نەگىزگى ماقساتى – قازاقستان, قىتاي جانە گونكونگ اراسىنداعى ساۋدا-ەكونوميكالىق, ينۆەستيتسيالىق, ونەركاسىپتىك ىنتىماقتاستىقتى كەڭەيتۋ, سونداي-اق ورتالىق ازياداعى جاڭا مۇمكىندىكتەردى بىرلەسىپ يگەرۋ. جيىندا قارجى, كاسىبي قىزمەت كورسەتۋ, لوگيستيكا مەن كولىك, يننوۆاتسيا جانە تەحنولوگيا, ساۋدا, جاسىل ەكونوميكا, ەنەرگەتيكا, تاۋ-كەن ونەركاسىبى, بيوفارماتسەۆتيكا, اۆتوموبيل ءوندىرىسى, مەديا سالالارى ءسوز بولدى. ەلىمىزدەگى كەزدەسۋلەر اياقتالعاننان كەيىن دەلەگاتسيا وزبەكستانعا بارىپ, «بەلدەۋ جانە جول» باستاماسى اياسىنداعى ىنتىماقتاستىق باعىتتاردى تالقىلاۋدى جالعاستىرادى. گونكونگ ساۋدا دامىتۋ كەڭەسىنىڭ توراعاسى فرەدەريك ما ەلىمىزدىڭ وڭىردەگى ورنىنا ەرەكشە توقتالدى.
«قازاقستان – ورتالىق ازياداعى ەڭ ءىرى ەكونوميكاسى بار مەملەكەت. 2025 جىلى ءوڭىردىڭ ىشكى جالپى ءونىمىنىڭ 53 پايىزى وسى ەلدىڭ ۇلەسىنە تيەسىلى بولدى. «قازاقستان–2050» ستراتەگياسى اياسىندا مەملەكەت ەكونوميكانى ءارتاراپتاندىرۋدى جۇيەلى تۇردە جۇرگىزىپ كەلەدى ءارى الەمنىڭ ەڭ دامىعان 30 ەلىنىڭ قاتارىنا قوسىلۋدى ماقسات ەتەدى. باعامداپ قاراساق, ءوسۋ الەۋەتى دە جوعارى. ءبىز لوگيستيكالىق ينفراقۇرىلىم, تسيفرلىق ەكونوميكا, اۋىل شارۋاشىلىعىن جاڭعىرتۋ مەن ازىق-ت ۇلىك وڭدەۋ سالالارىندا ۇلكەن بەلەستەرگە جەتەدى دەپ سەنەمىز», دەدى ول.
ەلىمىزدەگى ساپار بارىسىندا دەلەگاتسيا «اتامەكەن» ۇلتتىق كاسىپكەرلەر پالاتاسىنىڭ, «بايتەرەك» ۇلتتىق باسقارۋشى حولدينگىنىڭ, Halyk Bank پەن «سامۇرىق-قازىنا» ۇلتتىق ءال-اۋقات قورىنىڭ باسشىلارىمەن كەزدەستى. سونىمەن قاتار «Astana Hub» حالىقارالىق تەحنوپاركى مەن «استانا» حالىقارالىق قارجى ورتالىعىندا بولىپ, ەلىمىزدەگى يننوۆاتسيالىق ەكوجۇيە مەن قارجى سەكتورىنداعى جاڭا باستامالارمەن تانىستى. گونكونگ ارنايى اكىمشىلىك اۋدانىنىڭ باسشىسى دجون لي ەكىجاقتى ىنتىماقتاستىقتىڭ بولاشاعىنا جوعارى باعا بەردى.
«بۇل – مەنىڭ جەتەكشىلىگىممەن ۇيىمداستىرىلعان ورتالىق ازياداعى العاشقى ءارى ەڭ ءىرى ىسكەرلىك ميسسيا. قازاقستاندى ساپاردىڭ العاشقى باعىتى رەتىندە كەزدەيسوق تاڭداعان جوقپىز. بۇگىندە الەم كۇردەلى گەوساياسي جانە ەكونوميكالىق وزگەرىستەر كەزەڭىن باستان وتكەرىپ وتىر. وسىنداي جاعدايدا ورتالىق ازيا قارقىندى دامىپ كەلە جاتقان ماڭىزدى وڭىرگە اينالدى. ال قازاقستان وسى وڭىردەگى ەڭ ءىرى ەكونوميكا رەتىندە ەرەكشە ورىن الادى. كەيىنگى جىلدارى ەل اۋقىمدى رەفورمالار جۇرگىزىپ, ينۆەستيتسيالىق تارتىمدىلىعىن كۇشەيتتى. ءبىز پرەزيدەنت قاسىم-جومارت توقاەۆ پەن ۇكىمەت مۇشەلەرىمەن مازمۇندى كەزدەسۋلەر وتكىزدىك. قازاقستاننىڭ دامۋ باعىتى مەن گونكونگتىڭ ەكونوميكالىق كوزقاراستارىنىڭ اراسىندا ۇقساستىق كوپ ەكەنىن بايقادىق», دەدى د.لي.
دەلەگاتسيا مۇشەلەرىنىڭ سوزىنشە, ەكى ەل اراسىنداعى ءبىلىم بەرۋ باعىتىندا دا جاڭا مۇمكىندىكتەر اشىلىپ وتىر. قازىر شامامەن 500 وتاندىق ستۋدەنت گونكونگتا ءبىلىم الادى. ساپار بارىسىندا قوناقتار نازارباەۆ ۋنيۆەرسيتەتىنە بارىپ, جوعارى وقۋ ورىندارى اراسىنداعى جاڭا كەلىسىمدەرگە قول قويماق. بۇل ستۋدەنتتەر الماسۋىن, بىرلەسكەن زەرتتەۋلەردى ءارى قوس ديپلوم باعدارلامالارىن دامىتۋعا مۇمكىندىك بەرەدى.
«گونكونگ حالىقارالىق قارجى ورتالىعى رەتىندە الەمدىك كاپيتال مەن تەحنولوگيالاردى بىرىكتىرەتىن الاڭعا اينالعان. ءبىز قازاقستان كومپانيالارىنىڭ حالىقارالىق نارىقتارعا شىعۋىنا كومەكتەسۋگە دايىنبىز. قازاقستاندىق بيزنەس ءۇشىن گونكونگ قىتايعا جول اشاتىن قاقپا بولسا, گونكونگ ءۇشىن قازاقستان ورتالىق ازياعا شىعاتىن ماڭىزدى ارىپتەس. سوندىقتان ءبىزدىڭ ويىمىزشا, ەكى تاراپتىڭ ىنتىماقتاستىعىنىڭ الەۋەتى وتە جوعارى», دەدى دجون لي.
تاراپتار ساۋدا, قارجى, تەحنولوگيا, ءبىلىم بەرۋ, اۆياتسيا جانە جاسىل ەكونوميكا سالالارىن قامتيتىن 43 ءوزارا تۇسىنىستىك تۋرالى مەموراندۋمعا قول قويۋ ماسەلەسىن تالقىلادى. بۇل قۇجاتتار ينۆەستيتسيا تارتۋعا, جاڭا وندىرىستىك جوبالاردى ىسكە قوسۋعا ءارى ىسكەرلىك بايلانىستاردى كەڭەيتۋگە باعىتتالعان. سونىمەن قاتار كەلەسى جىلدىڭ ءبىرىنشى توقسانىندا گونكونگ پەن الماتى اراسىندا تىكەلەي اۋە قاتىناسىن اشۋ جوسپارى قاراستىرىلىپ جاتىر. بۇل ءوز كەزەگىندە بيزنەس وكىلدەرىنىڭ, تۋريستەر مەن ستۋدەنتتەردىڭ قاتىناسىن جەڭىلدەتۋگە مۇمكىندىك بەرەدى.
2026 جىلى قازاقستاننىڭ ىشكى جالپى ءونىمى 4,6 پايىزعا ءوسىپ, 360,5 ملرد دوللارعا جەتەدى. ال حالىقارالىق ۆاليۋتا قورى ورتالىق ازيا مەن كاۆكاز ءوڭىرىنىڭ ەكونوميكاسى 2025 جىلى 6,2 پايىزعا, 2026 جىلى 4,8 پايىزعا وسەدى دەپ بولجاپ وتىر. مۇنىڭ ءوزى ءوڭىردىڭ حالىقارالىق ينۆەستورلاردى قىزىقتىرىپ, ەلىمىزدىڭ ەكونوميكالىق حاب رەتىندەگى ءرولى كۇشەيىپ كەلە جاتقانىن كورسەتەدى.
