مامانداردىڭ ايتۋىنشا, سارىسۋ اۋدانى اۋماعىندا سالىنعان زاۋىتتىڭ الەۋەتى جىلىنا 800 مىڭ توننا كۇكىرت قىشقىلىن وندىرۋگە جەتەدى. جالپى العاندا, رەسەيلىك كومپانيا ءوڭىر اۋماعىندا ءۇش كەزەڭنەن تۇراتىن اۋقىمدى جوبالاردى ىسكە اسىرۋعا بەل بۋعانى ءمالىم. جالپى سوماسى 1 ملرد دوللار كولەمىندە ينۆەستيتسيا سالۋعا نيەتتى كورىنەدى. ال كۇكىرت قىشقىلى زاۋىتى سول ءۇش كەزەڭنىڭ ەكىنشى كەزەڭى اياسىندا جۇزەگە اسقانىن ايتا كەتكەن ءجون.
«مەملەكەت باسشىسى جولداۋىندا ەلدىڭ ونەركاسىپتىك نەگىزىن نىقتاۋ كۇن تارتىبىنەن تۇسپەيتىنىن ماسەلە ەكەنىن اتاپ وتكەنى بارشاعا بەلگىلى. ءبىزدىڭ ءوڭىر ءۇشىن دە ەكونوميكالىق دەربەستىكتى نىعايتۋدىڭ ماڭىزى زور دەپ بىلەمىز.
سارىسۋ اۋدانىندا بوي كوتەرگەن كاسىپورىننىڭ ىسكە قوسىلۋى – ينۆەستيتسيانىڭ, زاماناۋي تەحنولوگيانىڭ, ءوڭىردىڭ وندىرىستىك الەۋەتىنىڭ ناقتى ناتيجەگە ۇلاسقانىن ايعاقتايدى. جالپى العاندا, وبلىس اۋماعىندا قولعا الىنىپ جاتقان جوبالاردىڭ بارلىعى دا وبلىس ەكونوميكاسىن ارتتىرۋعا باعىتتالعان. سونىمەن قاتار جاڭا جوبالاردىڭ ەسەبىنەن جۇمىس ورنىن ارتتىرۋ – باستى ماقسات. جەرگىلىكتى اتقارۋشى بيلىك وكىلدەرى سول باعىتتا تالماي تەر توگىپ, ايانباي ەڭبەكتەنىپ جاتىر», دەيدى ءوڭىر باسشىسى ەربول قاراشوكەەۆ.
«ەۋروحيم» جشس باس ديرەكتورى يگور احمەروۆتىڭ ايتۋىنشا, كاسىپورىن باسشىلىعى جەرگىلىكتى كادرلاردى دايارلاۋعا باسىمدىق بەرمەك. ويتكەنى الداعى ۋاقىتتا وندىرىلەتىن ءونىم كولەمىن ارتتىرۋ كوزدەلگەن. ناتيجەسىندە, جۇمىسشى سانى كوبەيەدى. سول كەزدە نەگىزىنەن جەرگىلىكتى ازاماتتاردىڭ موينىنا ارتىلاتىن جاۋاپكەرشىلىك جۇگى ارتا تۇسەدى. ول ءۇشىن ەرتە باستان قامدانعان ءجون.
«رەسەي مەن قازاقستان اراسىنداعى ەكونوميكالىق-الەۋمەتتىك سەرىكتەستىك ەشقاشان توقتاعان ەمەس. سونىڭ ءبىر جارقىن دالەلى رەتىندە سارىسۋ اۋدانى اۋماعىندا سالىنعان كۇكىرت قىشقىلى زاۋىتىن ىسكە قوسىپ وتىرمىز. وسىلايشا, وزىمىزگە مىندەتتەمە رەتىندە موينىمىزعا العان ءۇش كەزەڭنىڭ ەكىنشىسىن ساتىمەن اياقتادىق دەپ ايتۋعا تولىق نەگىز بار. ازىرگە جۇمىس قالىپتى رەجىمدە اتقارىلادى. ال الداعى جىلدىڭ ءبىرىنشى توقسانىندا تولىق قۋاتتا جۇمىس ىستەيمىز. اۋقىمدى جوبانىڭ ۋاقتىلى جۇزەگە اسۋىنا تىكەلەي قولداۋ بىلدىرگەن قازاقستان بيلىگىنە, ۇكىمەت مۇشەلەرى مەن جامبىل وبلىسى اكىمدىگىنە زور العىس ايتامىن. ەكى ەل اراسىنداعى ەكونوميكالىق قارىم-قاتىناس ارمەن قاراي دا نىعايا تۇسەتىنىنە ەش كۇمان جوق. ءبىز وبلىس اكىمدىگىمەن بىرلەسىپ, كادرلىق الەۋەتتى ارتتىرۋ ماقساتىندا تەحنيكالىق كوللەدج اشۋدى جوسپارلاپ وتىرمىز. ويتكەنى حيميالىق كەشەندى تولىق ىسكە قوسقاندا جۇمىسشىلار سانى وسەدى. دەمەك جەرگىلىكتى كادرلاردى دايارلاۋ كەرەك. سونداي-اق باسپانا, مەكتەپ پەن بالاباقشا سالۋ جوسپارىمىزدا بار», دەيدى ي.احمەروۆ.
زاۋىت باسشىلىعى كەلتىرگەن دەرەككە سەنسەك, كاسىپورىن تولىق قۋاتىندا جۇمىس ىستەگەن كەزدە وندىرىلەتىن ءونىم كولەمىن
1 ملن تونناعا دەيىن جەتكىزۋگە مۇمكىندىك بار. ال كۇكىرت قىشقىلى زاۋىتىندا قازىرگى ۋاقىتتا 330 ادام جۇمىس ىستەيدى.
جاڭا جوبا – قازاقستان مەن رەسەيدىڭ الەۋمەتتىك ستراتەگيالىق سەرىكتەستىگىنىڭ ايقىن كورىنىسى. جىلىنا 800 مىڭ توننا ءونىم وندىرەتىن كاسىپورىن ەلدەگى ونەركاسىپ سالاسىن ورگە سۇيرەيدى. ويتكەنى زاۋىتتان شىعاتىن كۇكىرت قىشقىلى ۋران الۋ, مەتاللۋرگيا مەن مينەرالدى تىڭايتقىشتار الۋدا قولدانىلادى. ەلىمىز جىلىنا
3,5 ملن توننا كۇكىرت قىشقىلىن پايدالاناتىندىقتان, زاۋىت ىشكى نارىقتى قامتۋعا ۇلەس قوسادى.
رەسەيلىك كومپانيا وندىرەتىن تاعى ءبىر ءونىم – مينەرالدى تىڭايتقىش. بۇل زاۋىتتىڭ ءونىمىن الەمنىڭ جەتپىستەن استام مەملەكەتى تۇتىنادى. «ەۋروحيم» كومپانياسى الەۋمەتتىك سەرىكتەس رەتىندە بۇگىنگى كۇنگە دەيىن بىرقاتار جوبانى جۇزەگە اسىرۋ ماقساتىندا 29 ملن دوللار كولەمىندە قارجى اۋدارىپتى.
كومپانيا باسشىلارى قولعا العان, ءۇش كەزەڭدى قامتيتىن جوبالار تولىققاندى جۇزەگە اسقان كەزدە 1 200 ادام جۇمىسپەن قامتىلادى دەپ كۇتىلىپ وتىر. سەرىكتەستىك باسشىلارى ءبىرىنشى كەزەكتە جەرگىلىكتى ازاماتتاردى جۇمىسقا قابىلداۋعا نيەتتى.
جەرگىلىكتى اتقارۋشى بيلىك وكىلدەرى كەلتىرگەن دەرەككە جۇگىنسەك, وسى جىلى وڭىرگە 471 ملرد تەڭگە شاماسىندا ينۆەستيتسيا تارتىلعان. ناتيجەسىندە, 47 كاسىپورىن اشىلىپتى. الداعى ءتورت جىلدىڭ بەدەرىندە جالپى قۇنى 5,6 ترلن تەڭگەنى قۇرايتىن 116 جوبانى جۇزەگە اسىرۋ بويىنشا ناقتى جۇمىس جۇرگىزىلىپ جاتىر.
جۇزەگە اسقان جاڭا جوبانىڭ باستى ارتىقشىلىعى – زاماناۋي, ەكولوگيالىق تۇرعىدان قاۋىپسىز تەحنولوگيالاردىڭ قولدانىلۋى. مامانداردىڭ ايتۋىنشا, قاجەتتى قۇرال جابدىقتاردى الەمنىڭ ەڭ مىقتى ءوندىرۋشى ەلدەرىنەن الىپتى. جاڭا ءوندىرىس وشاعىنان جاناما ءونىم رەتىندە كالتسي ءحلوريدى مەن سينتەتيكالىق گيپس الۋ جوسپارلانعان. بۇل ونىمدەر ءتۇرلى ونەركاسىپ سالالارىندا كەڭىنەن قولدانىلادى.
جاۋاپتى تۇلعالاردىڭ سوزىنە سەنسەك, قۇرىلىس كەزەڭىندە 2 مىڭعا دەيىن ادام جۇمىسپەن قامتىلعان كورىنەدى. ءونىمىن جاھاننىڭ ماڭدايالدى ماماندارى جوعارى باعالاعان كاسىپورىن الداعى ۋاقىتتا ءوندىرىس قۋاتتىلىعىن ارتتىرۋعا بەكىنىپ وتىرعانى كوڭىل توعايتادى. بۇل ءوز كەزەگىندە سارىسۋ دالاسىندا جۇرگەن ازاماتتاردىڭ ەكى قولعا ءبىر كۇرەك ۇستاۋىنا مۇمكىندىك بەرەتىنى داۋسىز دەپ بىلەمىز.
جامبىل وبلىسى,
سارىسۋ اۋدانى
