ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا, «دەگدار» گۋمانيتارلىق قورى قامقورشىلىق كەڭەسىنىڭ ءتورايىمى, نۇرسۇلتان نازارباەۆ قورىنىڭ ديرەكتورى داريعا نازارباەۆا, «استانا وپەرا» تەاترىنىڭ ديرەكتورى عالىم احمەدياروۆ جانە ونەر ۇجىمدارىنىڭ وكىلدەرى قاتىستى.
سالتاناتتى جيىندا داريعا نازارباەۆا وسىنداي بالالارعا كومەك كورسەتۋ اربىرىمىزگە پارىز ەكەنىن جەتكىزدى.
«بۇگىنگى كەزدەسۋدىڭ ءجونى بولەك. «دەگدار» گۋمانيتارلىق قورى بالالار مەكتەپتەرى مەن انسامبلدەرىنە مۋزىكالىق اسپاپتار سىيلايدى. سونىڭ ناتيجەسىندە بالالار دومبىرا شەرتىپ ۇيرەنەدى. بۇل يگى ءىس اتى اڭىزعا اينالعان كۇيشى دينا نۇرپەيىسوۆانىڭ مەرەيتويىمەن ءدوپ كەلىپ وتىر. كۇي اناسى ءوزىنىڭ دارىنىمەن, باتىلدىعىمەن, مۋزىكاعا جانە تۋعان جەرگە دەگەن شەكسىز سۇيىسپەنشىلىگىنىڭ ارقاسىندا تاريحقا ەندى. ارمانىنا جەتۋدە دينا بارلىق قيىندىق پەن كەدەرگىنى ەڭسەرىپ, قازاقتىڭ ايگىلى كۇيشى-كومپوزيتورى اتاندى. كۇي ونەرىنىڭ باعىنا تۋعان ونىڭ شىعارمالارىنان حالىقتىڭ جانى, قازاقتىڭ كەڭ-بايتاق جەرى سەزىلەدى», دەدى د.نازارباەۆا.
مۋزىكالىق اسپاپقا يە بولعان ەلوردالىق بالالار دينا نۇرپەيىسوۆانىڭ تۋىندىلارىن ورىنداپ, Instagram پاراقشاعا #دينانۋرپەيسوۆافونددەگدار حەشتەگىمەن بەينەجازبا جاريالادى.
باسقا وقۋ ورىندارىنىڭ بالالارى دا اتاقتى كومپوزيتوردىڭ كۇيلەرىن شەرتىپ, الەۋمەتتىك جەلىگە سالدى. الداعى ۋاقىتتا دينا نۇرپەيىسوۆانىڭ مۋزىكالىق مۇراسىن ساقتاۋعا جانە حالىق شىعارماشىلىعىن ناسيحاتتاۋعا باعىتتالعان چەللەندج ۇيىمداستىرىلادى.
160 ۇلتتىق مۋزىكالىق اسپاپ تومەندەگى نىساندارعا بەرىلدى: ە.اسقاروۆ اتىنداعى جاس اقىندار مەكتەبى (سولتۇستىك قازاقستان وبلىسى, پەتروپاۆل ق.); «وتباسى ۇلگىسىندەگى بالالار اۋىلى» كمم (شىعىس قازاقستان وبلىسى, وسكەمەن ق.); ك.شاكەەۆ اتىنداعى اقىندار مەكتەبى (اقمولا وبلىسى, كوكشەتاۋ ق.); «مادەني-ساۋىق ورتالىعى» كمقك (قوستاناي وبلىسى, قوستاناي ق.); «SOS بالالار اۋىلى» (نۇر-سۇلتان ق.); «ەر ەدىگە» جىر مەكتەبى (اقتوبە وبلىسى, اقتوبە ق.); «ماقات» ونەر مەكتەبى جانىنداعى بالالار وركەسترى (اتىراۋ وبلىسى, ماقات اۋدانى); «اينالايىن» بالالار ءۇيى جانىنداعى دومبىراشىلار ءانسامبلى (الماتى وبلىسى, تالدىقورعان ق.); «نۇرعيسا تىلەنديەۆ اتىنداعى كوپبالالى جانە الەۋمەتتىك از قامتىلعان وتباسى بالالارىنا ارنالعان مەكتەپ-ينتەرنات», «نۇر-اتا» فولكلورلىق-ەتنوگرافيالىق وقۋشىلار وركەسترى (جامبىل وبلىسى, تاراز ق.); «وبلىستىق كورۋ قابىلەتى بۇزىلعان بالالارعا ارنالعان ارنايى مەكتەپ ينتەرناتى» كمم (باتىس قازاقستان وبلىسى, ورال ق.).
