پاتسيەنتتىڭ بىلتىردان باستاپ جۇرەك قاعىسى جيىلەپ, باسى اينالىپ, اۋىرىپ, دەرتى جان شىداتپاعان. ناۋقاسقا ەحوكارديوگرافيا, ەكگ حولتەرلىك مونيتورينگ پەن زەرتحانالىق تالداۋلار جۇرگىزىلگەن كەزدە PQ ينتەرۆالىنىڭ قىسقارعانى, ەلەكترلىك ءيمپۋلستىڭ جۇرەكشەلەردەن قارىنشالارعا تىم جىلدام ءوتۋى, دەلتا-تولقىن مەن ۆولف–پاركينسون–ۋايت سيندرومىنىڭ باسقا دا بەلگىلەرى پايدا بولعانى انىقتالادى. جوعارىداعى اۋرۋ بەلگىلەرى جۇرەكتە قوسىمشا ەلەكتر وتكىزگىش جولىنىڭ پايدا بولۋىنان تۋىندايدى.
پاتسيەنتتى جۇرەك ىرعاعى مەن وتكىزگىشتىگىنىڭ بۇزىلۋى بولىمشەسىنىڭ ينتەرۆەنتسيالىق اريتمولوگى باۋىرجان ەربولاتوۆ تەكسەرە كەلە, وعان جۇرەكىشىلىك ەلەكتروفيزيولوگيالىق زەرتتەۋ جۇرگىزۋ, قوسىمشا ەلەكتر جولىن راديوجيىلىكتىك ابلياتسيا ادىسىمەن جويۋ ماقساتىندا اۋرۋحاناعا جاتقىزادى.
مەديتسيناداعى مۇنداي كلينيكالىق جاعدايدىڭ ەرەكشەلىگى – قوسىمشا جول جۇرەكتىڭ نەگىزگى وتكىزگىشتىك جۇيەسىنە وتە جاقىن ورنالاسقاندىقتان, ناۋقاستىڭ جۇرەگى كەنەتتەن توقتاپ قالۋ قاۋپىن ۇلعايتا تۇسەدى. سوندىقتان زاماناۋي 3D-ناۆيگاتسيالىق جۇيەنىڭ كومەگىمەن پاتسيەنتكە تولىق ەلەكترواناتوميالىق كارتا جاسالىپ, راديوجيىلىكتى ابلياتسيا ساتىمەن جۇزەگە استى. جۇرەكتەگى كەسەلدى جولدىڭ اناتوميالىق ورنالاسۋىنىڭ كۇردەلىلىگىنە بايلانىستى وپەراتسيا ءتورت ساعاتقا سوزىلدى.
«كلينيكادا جۇرەك ىرعاعى مەن وتكىزگىش جۇيەسىنىڭ بۇزىلىسى كەزىندە قاجەت بولاتىن بارلىق حيرۋرگيالىق وپەراتسيالار جاسالادى. ويتكەنى بىزدە وزىق تەحنولوگيالار, سونىڭ ىشىندە 3D-كارتوگرافياعا ارنالعان ناۆيگاتسيالىق جۇيەلەر بار. شەتەلدىك ماماندار تۇراقتى تۇردە شەبەرلىك ساباقتارىن وتكىزىپ تۇرادى. قازىر رەسەيلىك مامان سەرگەي ارتەمەنكونىڭ قاتىسۋىمەن كۇردەلى جۇرەك اۋرۋلارىن ەمدەۋگە ارنالعان سونداي ساباقتار ءوتىپ جاتىر. وسى دارىستەردىڭ اياسىندا ءمامس ەسەبىنەن 30 وپەراتسيا جاساۋ جوسپارلانعان», دەيدى بولىمشە مەڭگەرۋشىسى باعدات احىت.
ورايى كەلىپ تۇرعاندا كىعزي قالقانشا بەزى تۇيىندەرىن ەمدەۋدىڭ جاڭا ءادىسىن قولعا العانىن دا ايتا كەتكەن ءجون. بۇل باستاما ناۋقاستارعا وپەراتسيا ۇستەلىنە جاتپاي, پىشاققا تۇسپەي-اق ساۋىعۋعا جول اشىپ وتىر. «قالقانشا بەزى تۇيىندەرىن ەمدەۋدەگى زاقىمى بارىنشا از تەحنولوگيالار» اتتى شەبەرلىك ساباعى اياسىندا وڭتۇستىك كورەيادان كەلگەن پروفەسسور حۆان يون دجينمەن بىرگە ماماندارىمىز 6 ناۋقاستىڭ قالقانشا بەزىنە راديوجيىلىكتى ابلياتسيا جاسادى. راديوجيىلىكتى ابلياتسيا دەگەنىمىز – قالقانشا بەزى تۇيىندەرىن حيرۋرگيالىق وپەراتسياسىز ەمدەۋدىڭ زاماناۋي ءادىسى. ەم-دوم بارىسىندا راديوجيىلىكتى توكتىڭ اسەرىمەن قالقانشا بەزىنىڭ ساۋ تىندەرىنە زاقىم كەلتىرىلمەي, پاتولوگيالىق جاسۋشالار جويىلادى.
ەندوكرينولوگتەرگە ارنالعان شەبەرلىك دارىسىنە ىلىككەن 26 جاستاعى ەڭ جاس پاتسيەنتكە قالقانشا بەزىنىڭ وڭ بولىگىندە كولەمى 4,4 سم بولاتىن ۋىتتى ەمەس ءبىرتۇيىندى زوب دياگنوزى قويىلعان. مەديتسينادا بۇل ءىرى ءتۇيىن دەپ ەسەپتەلەدى ءارى مويىن جولدارىن قىساتىندىقتان, كوپ جاعدايدا حيرۋرگيالىق ەمدەۋدى تالاپ ەتەدى. 56 جاستاعى الماتى وبلىسىنىڭ تۇرعىنىنان قالقانشا بەزىنىڭ ەكى بولىگىندە كولەمى 4,3 سم بولاتىن ۋىتتى ەمەس كوپتۇيىندى زوب انىقتالعان. پاتسيەنتتىڭ تىنىس الۋى, جۇتىنۋى قيىنداپ, اس, سۋ ىشكەندە اۋىرىپ, تاماقتا بوگدە زات تۇرعانداي, جىبىرلاۋ, جوتەل بەلگىلەرى مازالاعان.
كلينيكانىڭ ينتەرۆەنتسيالىق حيرۋرگى ارمان يبراەۆ قالقانشا بەزىنە جاسالاتىن ابلياتسيا ناركوزسىز جۇرگىزىلەتىنىن ايتادى. پروتسەدۋرا 30 مينۋتتان اسا ۋاقىتقا سوزىلۋى مۇمكىن, كەيدە كۇردەلىلىگىنە قاراي ءبىر ساعاتتان اسادى. الايدا جوعارىداعى تەحنولوگيامەن 20 جىلداي اينالىسىپ كەلە جاتقان شەتەلدىك پروفەسسوردىڭ كاسىبي شەبەرلىگىنىڭ ارقاسىندا ەم-دوم شارالارى بىرنەشە مينۋت ىشىندە جىلدام اتقارىلدى.
