بۇل تەاتردىڭ ەرەكشەلىگى سوندا, ونىڭ بيشىلەرى قۇلاعى ەستىمەيتىن جاندار. وسىدان جيىرما جىلداي بۇرىن بويىندا ۇيىمداستىرۋشىلىق قاسيەتى زور ەكەنىن سەزىنگەن ونەر كوللەدجى بي ءبولىمىنىڭ ستۋدەنتى ولگا روستوۆششيكوۆا قالاداعى قۇلاعى ەستىمەيتىن بالالار تاربيەلەنەتىن مەكتەپ-ينتەرناتقا بارىپ, بيگە ىڭعايى بار بالالاردان انسامبل قۇرعان. سودان بەرى ءانسامبلدىڭ جۇمىسى جالعاسىپ كەلەدى. ترۋپپاعا جاڭا ۇمىتكەرلەر دە سول ينتەرناتتاعى بي ۇيىرمەسىنە قاتىساتىن جاستارمەن تولىقتىرىلادى. «قۇلاعى ەستىمەيتىن جاندارمەن جۇمىس ىستەۋ وڭاي بولعان جوق. مەن الدىمەن ىممەن سويلەسۋدىڭ ءتاسىلىن دە بىلمەي, قاعازعا جازىپ ايتاتىنمىن. بىراق بۇلاردىڭ ونەرگە قۇشتار ەكەنىن, بويلارىنداعى بيمەن بايلانىستى بۇلا كۇشتەرىن سىرتقا شىعارۋعا ۇمتىلاتىندارىن كورىپ, قانشا قيىن بولسا دا تاستاپ كەتپەدىم», دەپ ەسكە العان ەدى ولگا پاۆەلقىزى ءوزىنىڭ ءبىر ەستەلىگىندە.
Sensitive-ءتىڭ العاشقى توبى مەكتەپ جاسىنان اسىپ, ەندى ولاردىڭ ترۋپپاسىن قايدا جىبەرەمىز, كىمگە قوسامىز, بولەك تەاتر سالۋعا قاراجات جوق دەگەن ماسەلە تۇيىققا تىرەگەندە س.مۇقانوۆ اتىنداعى قازاق سازدى-درامالىق تەاترى ءوزىنىڭ قاناتىنىڭ استىنا العان. تەاتردىڭ ديرەكتورى, قازاقستاننىڭ ەڭبەك سىڭىرگەن قايراتكەرى ءبىرجان جالعاسباەۆ ترۋپپانىڭ وتە ەڭبەكقور ەكەنىن ايتتى. «تاڭعى ساعات توعىزدان كەلگەن ولار تۇنگى 10-11-لەرگە دەيىن رەپەتيتسيا جاسايدى. تاڭعالامىز», دەدى ول. اۋەلى دارىن, سوسىن ەڭبەكقورلىق قوسىلعان سوڭ الىنبايتىن قامال جوق ەكەنى بەلگىلى, جوعارىدا ايتىلعان تابىستىڭ قاينار كوزى سوندا بولىپ تۇر.
ال ەندى «بوتاي» ەتنوپلاستيكالىق پەرفومانسىنا كەلەيىك. پەرفومانس (performance) اعىلشىن تىلىنەن اۋدارعاندا ورىنداۋ, ويناۋ دەگەن ءسوز. تەاترلىق كوركەم قويىلىمنىڭ ءبىر جانرى. ال بيدەگى ەتنوپلاستيكا دەگەنىمىز ەتنوستىڭ سيپاتىن اشۋعا ۇمتىلىپ, ونەردىڭ پلاستيكامەن ورىندالۋى.
سوزىنە قاراعاندا, ولگا روستوۆششيكوۆا بىردە ءپاريجدىڭ الەمدىك كورمەسىندە بولىپ, وندا قازاقستاندى جىلقىمەن ۇشتاستىرىپ, اسسوتسياتسيا جاساعان كومپوزيتسيا كورگەنىن ايتادى. ال استىندا ادامزاتتىڭ جىلقىنى العاش قولعا ۇيرەتۋى قازاقستاننىڭ «بوتاي» دەگەن مەكەنىندە باستالعان دەپ جازىلعان ەكەن. «ونىڭ ۇستىنە «بوتاي» قازاقستاننىڭ سولتۇستىگىندە دەگەن انىقتاما بەرىلىپتى. تۋعان جەرىم اتالعان بۇل سوزدەر ماعان توق ۇرعانداي اسەر ەتىپ, «بوتاي» تۋرالى قويىلىم جاساۋىم كەرەك دەگەن وي جانىما مازا بەرمەدى. سودان دراماتۋرگ قولعانات مۇراتتىڭ شىعارماسىن قولعا الىپ, ونى ساحنالاۋعا رەسپۋبليكالىق كورەي تەاترىنىڭ رەجيسسەر-حورەوگرافى اننا تسويدى شاقىرىپ, تەاتردىڭ ديرەكتورى ءبىرجان جالعاسباەۆتىڭ قولداۋىمەن اينالاسى ءبىر ايدىڭ ىشىندە قويىلىمدى ساحناعا شىعارىپ وتىرمىز», دەدى ول پەرفومانستىڭ الدىندا جۋرناليستەرگە بەرگەن
بريفينگتە.
وسىدان 5 جارىم مىڭ جىل بۇرىنعى ادامدار ءومىرى, ولاردىڭ ءوزارا تالاس-تارتىسى, جاۋلارىمەن ايقاسى, تابيعاتتىڭ دۇلەي كۇشىمەن الىسۋى پلاستيكالىق بيمەن كوركەم بەينەلەندى. «قادامىم ونبەيدى, جىلدام جۇرە المايمىن, اڭعا جەتە المايمىن» دەگەن مۇڭلى كۇڭىرەنۋ دە كۇيكى تىرلىكتىڭ قۇتىن قاشىرىپ تۇرادى. جالعىز-اق ومىردەن ءۇمىت ۇزبەي ەڭبەك قىلۋعا اقىل بەرگەن ۇماي انانىڭ اقىلى دا تايپا تۇرعىندارىن ءبىراز سەرپىلتكەن بولادى. وسىندايدا ۇيىرىنەن اداسىپ, قاسقىر تالاعان بۋاز بيە ادامدار اراسىنا كەلىپ ق ۇلىندايدى دا ولەدى. ءدال وسى كۇنى تايپاداعى ءبىر كەلىنشەك دۇنيەگە ۇل بالا اكەلەدى. ءسويتىپ, ەكى ق ۇلىن بىرگە ءوسىپ, ادامنىڭ جىلقىنى العاش رەت انالىق ماحابباتپەن قولعا ۇيرەتكەنى بيمەن ايتىلادى. ارينە, كۇن مەن جەر بەينەسىندەگى كيەلى الەمنىڭ دە اسەرى, فانتازيا مەن قيال دا وقيعانى بىردە شيەلەنىستىرىپ, بىردە جايماشۋاققا تارتىپ, كوركەمدەپ وتىرادى. اقىرىندا «بوتاي ەلى ەرلەدى, اساۋ ءمىنىپ تەرلەدى» دەگەن سارىن شىعىپ, قاسىنداعى قولعاناتى, ىشسە قىمىزى, جەسە قازىسى, جاۋعا مىنسە پىراعى, الىسقا اپاراتىن قاناتى بولعان قاسيەتتى جىلقى مەن ادامنىڭ دوستىعى ايگىلەنىپ, پەرفومانس تاماشا شەشىممەن اقتالدى.
قويىلىم ءبىر جارىم ساعاتتاي ۋاقىتقا سوزىلعانىمەن قىزىق بولعان سوڭ تەز اياقتالعانداي اسەر قالدىردى. ءبيدىڭ ءۇنىن, ايتپاق بولعانىن تولىق تۇسىنبەسە دە ورىنداۋ شەبەرلىكتەرىنە سۇيسىنگەن كورەرمەندەر ونەرپازدارعا شىنايى العىستارىن جەتكىزدى.
ءدال وسى كۇنى حالىقارالىق تەاتر كۇنى اتالىپ وتكەن ەدى, سوعان بايلانىستى «التىن ساقا» دەپ جاريالانعان تەاترىشىلىك بايقاۋدىڭ ءتۇرلى اتالىمدارى بويىنشا جەڭىمپاز بولعان ارتىستەرگە قۇرمەت قاعازدارى مەن باعالى سىيلىقتار تابىس ەتىلدى.
پەتروپاۆل
