حالىقارالىق شاحمات فەدەراتسياسى (FIDE) ەرلەر مەن ايەلدەر اراسىنداعى ۇمىتكەرلەر ءتۋرنيرىن جىل سايىن ۇيىمداستىرادى. نازىك جاندىلار دوداسىندا 35 جاستاعى قىتايلىق تسزيۋي ۆەنتسزيۋن باستاعان ساڭلاقتار بار. قىتاي قىزى 2018 جىلدان بەرى وسى ءتۋرنيردىڭ چەمپيوندىق ءتاجىن ەشكىمگە ۇستاتپاي كەلەدى. ونىڭ جەرلەستەرى 2024–2025 جىلدارداعى گران-پري سەرياسىندا جەڭىمپاز اتانعان چجۋ تسزينەر, الەم كۋبوگىنىڭ قولا جۇلدەگەرى تان چجۋني دە تارتىسقا تۇسەدى. رەسەيلىك الەكساندرا گورياچكينا (گران-پري سەرياسىنىڭ كۇمىس جۇلدەگەرى), 2024–2025 جىلدارداعى FIDE Women’s Events سەرياسىنىڭ جالپى ەسەبىندە 2-ورىن يەلەنگەن ۋكراينالىق اننا مۋزىچۋك, بليتستەن ءۇش دۇركىن الەم چەمپيونى رەسەيلىك كاتەرينا لاگنو, الەم كۋبوگىنىڭ يەگەرى ۇندىستاندىق ديۆيا دەشمۋح پەن ونىڭ وتانداسى ۆايشالي رامەشبابۋ دا باعىن سىنايدى.
ءبيبىسارا ءبىرىنشى اينالىمدا وسى ۆايشالي رامەشبابۋمەن تەڭ ءتۇستى. ۇندىستاندىق شاحماتشى بىلتىر گرۋزيانىڭ باتۋمي قالاسىندا وتكەن الەم كۋبوگىنىڭ شيرەك فينالىندا مەرۋەرت قاماليدەنوۆانى ۇتقان ەدى.
ايەلدەر اراسىنداعى الەمدىك ءتاج ءۇشىن ءوتىپ جاتقان ۇمىتكەرلەر ءتۋرنيرى 1952 جىلدان بەرى ۇيىمداستىرىلادى. قاتىسۋشىلار 14 تۋردى اينالمالى جۇيەمەن وتكىزەدى. ۋاقىت باقىلاۋى كلاسسيكالىق: العاشقى 40 جۇرىسكە 90 مينۋت, سودان كەيىن پارتيا اياقتالعانشا 30 مينۋت, سونىمەن قاتار ءار جۇرىستەن باستاپ 30 سەكۋند قوسىلادى.ءتۋرنيردىڭ جۇلدە قورى – 300 مىڭ ەۋرو. چەمپيون اتانعان ساڭلاق 28 مىڭ ەۋرو السا, 2-ورىن العان شاحماتشىعا 17 مىڭ ەۋرو, 3-ورىندى ەنشىلەگەنگە 8 600 ەۋرو سىياقى بۇيىرادى. ەگەر ۇپاي سانى تەڭ بولسا, اقشالاي جۇلدە قورى تەڭدەي بولىنەدى.
شاحماتپەن 18 جىلدان بەرى تۇراقتى اينالىسىپ كەلە جاتقان 22 جاستاعى جەرلەسىمىز ب.اساۋباەۆا بىلتىر گروسسمەيستەر اتاندى, 2020 جىلى حالىقارالىق شەبەر اتاعى بەرىلسە, 2019 جىلى ايەلدەر اراسىنداعى گروسسمەيستەر اتاعىنا قول جەتكىزدى. جەتى جاسىندا-اق قاتارلاستارىنان قارا ءۇزىپ, الەم چەمپيونى اتانعان تالانتتى قىز ەرەسەكتەر قاتارىنا ءوتىپ, بليتستەن 2021, 2022, 2025 جىلدارى ءۇش دۇركىن الەم چەمپيونى اتاعىن قانجىعاسىنا بوكتەردى. 2023 جىلى وتكەن الەم چەمپيوناتىندا, سونداي-اق 2024 جىلى ۇلتتىق قۇراما ساپىندا شاحمات وليمپياداسىندا كۇمىس مەدال ەنشىلەدى. بىلتىر FIDE-ءنىڭ «Women’s Grand Swiss» تۋرنيرىندە قولا مەدالعا يە بولدى.
