دۇنيەجۇزىلىك قورشاعان ورتانى قورعاۋ كۇنى قارساڭىندا ەلىمىزدىڭ بارلىق وڭىرىندە «تازا قازاقستان» ناۋقانى اياسىندا ەكولوگيالىق اكتسيالار وتۋدە. پرەزيدەنت قاسىم-جومارت توقاەۆ باستاماشىلىق ەتكەن جالپىۇلتتىق جوبا نەبارى ەكى جىلدىڭ ىشىندە ەلىمىزدىڭ قالالارى مەن اۋىلدارىن اباتتاندىرۋعا ءارى كوگالداندىرۋعا باعىتتالعان بۇقارالىق قوعامدىق قوزعالىسقا اينالدى.
بۇعان قوسا «تازا قازاقستان» قۇندىلىقتارى ەڭ جوعارى كونستيتۋتسيالىق مارتەبەگە يە بولدى. اتاپ ايتقاندا, جاڭا اتا زاڭنىڭ پرەامبۋلاسىندا العاش رەت تابيعاتتى ايالاۋ قاجەت ەكەنى ناقتى كورسەتىلگەن. ال قازاقستان رەسپۋبليكاسى قىزمەتىنىڭ نەگىز قۇراۋشى قاعيداتتارى قاتارىندا جاۋاپتى ءارى جاسامپاز وتانشىلدىق يدەياسىن ىلگەرىلەتۋ جانە جوعارى ەكولوگيالىق مادەنيەتتى قالىپتاستىرۋ مىندەتى بەلگىلەندى.
«تازا قازاقستان» جوباسى «زاڭ جانە تارتىپ» قاعيداتىمەن ءارى «ادال ازامات» باعدارلاماسىمەن قاتار جاڭا قوعامدىق ەتيكانى قالىپتاستىرۋدىڭ ماڭىزدى قۇرالى بولىپ سانالادى. سول سەبەپتى مەملەكەت ءباسشىسى وزىنىڭ سويلەگەن سوزدەرىندە جاۋاپكەرشىلىككە, سانالىلىققا, قۇقىقتىق ءتارتىپتى ساقتاۋعا, ەڭ باستىسى وتانسۇيگىشتىككە نەگىزدەلگەن مىنەز-ق ۇلىق مودەلىن ورنىقتىرۋ مەن ىلگەرىلەتۋدىڭ ماڭىزدىلىعىنا ەرەكشە نازار اۋدارادى.
جاۋاپتى ءارى جاسامپاز وتانشىلدىق ءار ازاماتتىڭ اينالاسىنداعى تازالىق پەن ءتارتىپتى ساقتاۋىنان, تابيعاتقا جاناشىرلىقپەن قاراۋىنان جانە ۆانداليزمگە قارسى كۇرەسىنەن باستالادى.
ەكى جىل ىشىندە «تازا قازاقستان» جوباسى اياسىندا ناقتى ناتيجەلەرگە قول جەتكىزىلدى. ەل بويىنشا شامامەن 6,5 ميلليون ادامنىڭ قاتىسۋىمەن 1,5 مىڭ ەكولوگيالىق ءىس-شارا وتكىزىلدى. سونىڭ ىشىندە ەڭ الدىمەن جاستاردىڭ بەلسەندىلىگىن ەرەكشە اتاپ ءوتۋ قاجەت. بەلسەندى ازاماتتاردىڭ ۇيىتقى بولۋىمەن 2 ميلليون توننا قوقىس جينالىپ, شامامەن 5,5 ميلليون اعاش وتىرعىزىلدى. سونىمەن قاتار ەلىمىزگە كەلگەن مەملەكەت باسشىلارىنىڭ, تانىمال ونەر قايراتكەرلەرى مەن سپورتشىلاردىڭ «تازا قازاقستان» جوباسىن قولداپ, اعاش وتىرعىزۋى يگى داستۇرگە اينالدى.
وسىلايشا, قازاقستان قوعامدىق بىرلىكتى كۇردەلى ءارى ابستراكتىلى يدەولوگيالىق تۇجىرىمدامالار توڭىرەگىندە ەمەس, بارشاعا تۇسىنىكتى قاراپايىم ءارى امبەباپ قۇندىلىقتار نەگىزىندە قالىپتاستىرۋعا بولاتىنىن ايقىن كورسەتىپ, جاڭا ءۇردىستىڭ نەگىزىن قالاۋدا.
ماسەلەن, جۋىردا پارلامەنتتە ساياسي پارتيالاردىڭ بارلىعى ءوز باعدارلامالارى مەن جارعىلارىنا «تازا قازاقستان» قاعيداتتارىن ەنگىزۋى قاجەت ەكەنى تۋرالى ۇسىنىس ايتىلدى. تۇپتەپ كەلگەندە, بۇل – يدەولوگيالىق جاڭعىرۋدىڭ ىرگەتاسى.
وسىلايشا, «تازا قازاقستان» جوباسى كەڭ قوعامدىق قولداۋعا يە بولىپ قانا قويماي, بىرتىندەپ كۇندەلىكتى ومىرىمىزدىڭ اجىراماس بولىگىنە دە اينالىپ كەلەدى.
