ونىڭ ايتۋىنشا, قالالار مەن اۋىلداردى اباتتاندىرۋعا, اۋماقتاردى كوگالداندىرۋعا ءاردايىم ەرەكشە كوڭىل ءبولۋ قاجەت.
مەملەكەت باسشىسى سونداي-اق ەكولوگيالىق مادەنيەتتى ارتتىرۋ ماسەلەسى دە باسىم باعىتتاردىڭ ءبىرى ەكەنىن اتاپ ءوتتى.
«اسىرەسە تۋريستىك ايماقتار مەن تابيعات اياسىنداعى ازاماتتاردىڭ مىنەز-قۇلقىنا ءجىتى نازار اۋدارۋ ماڭىزدى. قوعامدىق ءتارتىپتى بۇزاتىندار, ياعني ۆاندالدار زاڭعا سايكەس جاۋاپقا تارتىلۋى ءتيىس. ءبىر سوزبەن ايتقاندا, ءبىز قۇقىقتىق نيگيليزمگە بۇكىل قوعام بولىپ قارسى تۇرۋىمىز كەرەك. زاڭ مەن ءتارتىپتى قۇرمەتتەۋ – جازادان قورقۋ ەمەس, ەڭ الدىمەن جاۋاپكەرشىلىگى جوعارى ازاماتتارعا ءتان قاسيەت. مۇنى دۇرىس ءتۇسىنۋ قاجەت», دەدى قاسىم-جومارت توقاەۆ.
پرەزيدەنتتىڭ سوزىنشە, الەمدە اسكەري قاقتىعىستار كوبەيگەن قازىرگى تۇراقسىز كەزەڭدە قازاقستان ءۇشىن بەيبىتشىلىك پەن تۇراقتىلىق اسا ماڭىزدى.
«ونسىز قانداي دا ءبىر رەفورمالار مەن وڭ وزگەرىستەر بولمايدى. سوندىقتان قۇقىق قورعاۋ ورگاندارى قۇقىق بۇزۋشىلىقتارعا قاتىستى قاتاڭ شارالار مەن جازالاردى قولدانۋى كەرەك. ءبىزدىڭ ەلىمىزدى ۇناتپايتىن ءارى مەنسىنبەي قارايتىن كەيبىر ادامدار, وكىنىشكە قاراي ولاردىڭ اراسىندا پارلامەنت دەپۋتاتتارى دا بار, زاڭ ۇستەمدىگىن قامتاماسىز ەتۋگە باعىتتالعان ارەكەتتەرىمىزدى «شترافستان» نەمەسە «ايىپپۇلستان» دەپ اتايدى. مەيلى, ءوز ويلارىنىڭ كەلتەلىگىن كورسەتە بەرسىن. ال حالىقىمىزعا قوعامدىق ءتارتىپ پەن قاۋىپسىزدىك كەرەك», – دەدى مەملەكەت باسشىسى.
وسى جولدان تايماي, «زاڭ مەن ءتارتىپ» ساياساتىن باتىل تۇردە جالعاسىن تابۋى كەرەك. سەبەبى بۇل – حالىقىمىزدىڭ تالابى. وسى ماسەلەگە بۇكىل قوعام دا, اكىمدەر دە ەرەكشە نازار اۋدارۋ كەرەك دەدى پرەزيدەنت.
