بيىل ەسىل اۋدانىنداعى ۇلكەن سۋقويمالارىنىڭ ءبىرى توراڭعۇل كولىندە ىلعال قورى وتكەن جىلعىمەن سالىستىرعاندا ەداۋىر تومەن, شامامەن 26%-عا كەم. بۇل كوڭىلدى ورنىقتىراتىن جايت. بىراق بىلتىردان وسىنشا كەم بولعانىمەن, باسقا جىلدارمەن سالىستىرعاندا قالىپتى جاعدايدا دەپ ايتۋعا بولادى. كۇننىڭ قىزۋى كۇرت كوتەرىلگەندىكتەن, ەسىل اۋدانىنداعى قار قالىڭدىعى قارقىندى تۇردە ازايىپ كەلەدى.
«قالعان اۋدانداردا دا تاۋەكەلدەر نەگىزىنەن جەرگىلىكتى سيپاتتا, ولار ەرىگەن قار سۋلارىنىڭ كەلۋى مەن مۇزدىڭ السىرەۋىنە بايلانىستى. شاعالالى وزەنىندە سۋ دەڭگەيىنىڭ ازداپ كوتەرىلۋى تىركەلدى, الايدا بۇل دا وتكەن جىلعىمەن سالىستىرعاندا كوپ تومەن. مۇز جامىلعىسى بىرتىندەپ بوساڭسىپ كەلەدى», دەپ جازدى اكىم الەۋمەتتىك جەلىدەگى پاراقشاسىندا. وسىلارعا قاراپ بيىل تاسقىن بولا قويماس دەسەك تە, تابيعاتتىڭ توسىن سىيىنا ەشكىم دە كەپىلدىك بەرە المايدى.
سۋ رەسۋرستارى جانە يرريگاتسيا مينيسترلىگىمەن, سونداي-اق «قازسۋشار» رمك اقمولا فيليالىمەن بىرلەسىپ قابىلدانعان شەشىمگە سايكەس اقپاننان باستاپ سىلەتى سۋقويماسىنان سۋدى الدىن الا جىبەرۋ باستالعان. بۇل سۋ تاسقىنى كەزەڭىن قاۋىپسىز وتكىزۋدى قامتاماسىز ەتىپ, سۋ دەڭگەيىنىڭ كۇرت كوتەرىلۋىن تەجەيدى. 25 ناۋرىزدان باستاپ اۋا تەمپەراتۋراسىنىڭ كوتەرىلۋىنە بايلانىستى كوكتەمگى ۇدەرىستىڭ بەلسەندى كەزەڭى باستالىپ كەتتى. قازىر جاعداي تۇراقتى باقىلاۋدا. بارلىق جاۋاپتى قىزمەتتەر كۇشەيتىلگەن رەجىمدە جۇمىس ىستەپ جاتىر.
وڭىردە تاسقىننىڭ بولۋ قاۋپى مەن قابىلدانىپ جاتقان كەشەندى شارالار «Amanat» پارتياسىنىڭ سقوف جانىنداعى پارتيالىق باقىلاۋ كوميسسياسىنىڭ, وڭىرلىك دامۋ كەڭەسىنىڭ بىرلەسكەن وتىرىسىندا دا جان-جاقتى قارالدى.
قازىر سۋ باسۋ قاۋپى بار اۋماقتار ەرەكشە باقىلاۋعا الىنعان. قالا اۋماعىندا نەگىزگى قاۋىپ ايماعى رەتىندە زارەچنىي كەنتى بەلگىلەنگەن. مۇندا 6 كوپقاباتتى تۇرعىن ءۇي مەن 90 جەكە باسپانا بار. جەرگىلىكتى اتقارۋشى ورگاندار تۇرعىنداردى قاۋىپسىز ايماقتارعا كوشىرۋ تۋرالى شەشىم قابىلداپ, قازىردىڭ وزىندە 90 وتباسى قاۋىپسىز جەرگە ورنالاستىرىلدى. وبلىستىق بيۋدجەت ەسەبىنەن 72, 90 پاتەرلىك جاڭا تۇرعىن ۇيلەردىڭ قۇرىلىسى جۇرگىزىلىپ جاتىر.
قىزىلجار اۋدانىندا 18 ەلدى مەكەن تاسقىن قاۋپى بار ايماققا جاتادى. تاسقىنعا قارسى شارالارعا بارلىعى 12,4 ملرد تەڭگە بولىنگەن. اۋداندا قورعانىس بوگەتتەرىن قايتا جاڭعىرتۋ, جول ينفراقۇرىلىمىن جاقسارتۋ, سۋ بۇرۋ جۇيەلەرىن سالۋ جۇمىسى جۇرگىزىلەدى. سونىمەن قاتار ەسىل وزەنىندە مۇز كەپتەلىسىنىڭ الدىن الۋ ماقساتىندا قوپارىلىس جاساۋ جۇمىسى جۇرگىزىلدى. بۇل ءوز كەزەگىندە وزەن ارناسىنىڭ وتكىزۋ قابىلەتىن ارتتىرۋعا مۇمكىندىك بەرەدى.
وبلىس ورتالىعىنداعى ەۆاكۋاتسيا جۇيەسى دە تولىق دايىن. ۋاقىتشا ورنالاستىرۋ پۋنكتتەرى جاتاقحانالار مەن مەكتەپتەر بازاسىندا ازىرلەنىپ, قاجەتتى ماتەريالدىق قورلار جاساقتالعان.
«بيىلعى قىستا 199 مىڭ تەكشە مەتر قار شىعارىلىپ, جۇزدەگەن سۋ وتكىزۋ قۇبىرى تازارتىلدى. اۋداندا 150-دەن استام ارنايى تەحنيكا, 33 ەۆاكۋاتسيالىق پۋنكت كوشىرىلگەن ادامداردى قابىلداۋعا ءازىر. حالىقتى دەر كەزىندە حاباردار ەتۋگە داۋىسزورايتقىشى بار دروندار قولدانىلماقشى. سونىمەن قاتار وڭىرگە كومەك رەتىندە 50 قۇتقارۋشى تارتىلىپ, ولار ءبىر اي بويى قاۋىپتى ۋچاسكەلەردە جۇمىس ىستەيدى», دەدى قىزىلجار اۋدانى اكىمىنىڭ ورىنباسارى باقتيار بەكەنوۆ.
سۋ باسۋ قاۋپى جوعارى مەكەندەردى تۇراقتى تۇردە قاۋىپسىز ايماقتارعا كوشىرمەسە, جىل سايىن تاسقىننىڭ داقپىرتىمەن ميللياردتاعان قاراجات بوسقا جۇمسالا بەرمەكشى. بۇل ماسەلە تۋرالى كەڭەستە اشىق ايتىلدى. جيىن سوڭىندا «Amanat» پارتياسى وكىلدەرى اتقارىلىپ جاتقان جۇمىستىڭ ماڭىزدىلىعىن, تاسقىننىڭ الدىن الۋ باعىتىنداعى شارالاردى ۇنەمى قاتاڭ باقىلاۋدا ۇستاۋ قاجەتتىگىن اتاپ ءوتتى.
سولتۇستىك قازاقستان وبلىسى
