ءاندى ايگىلى «حيتمەيكەرلەردىڭ» ءبىرى ارنو بابادجانيان ءوزىنىڭ سۇيىكتى ءانشىسى ءمۇسلىم ماگوماەۆقا لايىقتاپ شىعارعان ەكەن. بۇعان دەيىن ەكەۋى بىرلەسىپ, «سۇلۋلىق پاتشايىمى» مەن «جەردەگى جاقسى قالا» دەگەن شىعارمالاردى ومىرگە اكەلگەن ەدى. ەندى وتاۋ قۇرعان جاس جۇبايلارعا ارناپ, وسىنداي ءبىر تاماشا تۋىندىنى دۇنيەگە اكەلۋدى ويلايدى. بۇعان كەڭەس وكىمەتىندە مەليزمگە تولى, ىرعاقتى, بي كەشتەرىندە نە بولماسا توي-تومالاقتاردا قويىلاتىن مۋزىكانىڭ ازدىعى نەگىز بولسا كەرەك. بۇل تۇستا كومپوزيتوردىڭ ورىنداۋشىنى تاڭداۋدا قاتەلەسپەگەنى كورىنىپ-اق تۇر. سەبەبى ايگىلى ءانشى «ۇيلەنۋ تويى» ءانىن شىرقاپ قانا قويعان جوق, ونى حالىقتىڭ جۇرەگىنەن وتكىزە الدى.
بۇل جەردە اقىن مەن سازگەردىڭ سيمبيوزى ەمەس, ءانشىنىڭ دە قولتاڭباسى بار. مۇنى كسرو حالىق ءارتىسى ارنو بابادجانيان دا جاسىرماعان. شىعارماسىنىڭ شەدەۆرگە اينالۋى تۇركى پەرزەنتىنىڭ تۇنىق داۋسىنىڭ ارقاسى ەكەنىن جەتكىزىپتى.
«وزدەرىڭىز بىلەتىندەي, ءان ءۇش كومپونەنتتەن تۇرادى: كومپوزيتور, اقىن جانە ورىنداۋشى. بىراق ءمۇسلىمدى زاڭدى تۇردە «كومپوزيتور جانە اقىنمەن بىرلەسكەن اۆتور» دەپ اتاۋعا بولادى. سىزگە «ۇيلەنۋ تويى» انىنەن قاراپايىم مىسال كەلتىرەيىن. ونى مەن الدەبىر مۋزىكالىق قويىلىمنىڭ ساتيرالىق بولىمىنە ارناپ جازعان بولاتىنمىن. نەگىزگى كىلت – «دۇيسەنبى – اۋىر كۇن» دەگەن ماعىناعا سايادى. كومپوزيتسيا دايىن بولعان بەتتە روبەرت روجدەستۆەنسكي ەكەۋمىز مۇسلىمگە كورسەتتىك. مۇنى ەستىگەن ول, بۇل ءاندى باسقاشا جەتكىزۋ كەرەكتىگىن ايتتى. ورىنداۋعا جەڭىل ءارى تارتىمدى ەتىپ, مەرەكەلىك كەشتەرگە لايىقتاپ شىعارساق دەگەن نيەتىن ءبىلدىردى. بىزگە ونىڭ ويى ۇنادى. ءمۇسلىمنىڭ شەبەرلىگىنىڭ ارقاسىندا ءان بىردەن جاندانىپ شىعا كەلدى», دەيدى كومپوزيتور ءوز ەستەلىگىندە.
ايتا كەتۋ كەرەك, اۆتور «ۇيلەنۋ تويى» انىنە ءوزىنىڭ بۇرىنعى حيت اندەرىنىڭ نوتالارىن قوسقان. ونىسى وڭاي بايقالادى. سىعان اندەرىنە ءتان كوڭىلدى ەلەمەنتتەر بار. حورمەن ايتىلاتىن تۇستارى دا كەزدەسەدى. ىشىندە ءارتۇرلى اسپاپتىڭ نازىك ىرعاقتارى ءجۇزىپ جۇرگەندەي. تەگى ارمەنيالىق تالانتتى تۇلعا ارنو بابادجانيان رۋحى جاتقانىن بىردەن اڭدايسىز.
ورىستىڭ ايتۋلى اقىنى روبەرت روجدەستۆەنسكي ولەڭگە ءومىر اعىمىنداعى قاراما-قايشىلىقتاردى قوسقان. ءان ءۇشىنشى جاقتان, ياعني سىرتتاعى باقىلاۋشىنىڭ اتىنان ورىندالادى. ءماتىن مازمۇنىنا ۇڭىلسەڭىز, ۇيلەنۋ تويىنىڭ بەينەبايانىن كەزدەيسوق كورىپ قالعان جالعىزباستى ادام ءالى وتاۋ قۇرماعانىنا وكىنەدى. تۇتاستاي العاندا, ونىڭ ومىرىندە ءبارى ويداعىداي سەكىلدى, بىراق مۇڭ مەن قۋانىش ءبىر بوتەلكەگە قۇيىلعان. جو-جوق, مۇندا ىشىمدىك ءىشۋ مەن ماس كۇيىندە توبەلەسۋ تۋرالى ءسوز جوق. وقيعانىڭ جەلىسى قىزىق ءوربيدى. ۆلاديمير ۆىسوتسكيدىڭ ساتيرالىق اندەرىمەن مازمۇنداس. وسى رەتتە ەسكى ءاننىڭ قايىرماسىن تۇپنۇسقاسىن ۇسىنساق.
«ا ەتا سۆادبا, سۆادبا,
سۆادبا پەلا ي پلياسالا,
ي كرىليا ەتۋ سۆادبۋ ۆدال نەسلي.
شيروكوي ەتوي سۆادبە بىلو
مەستا مالو,
ي نەبا بىلو مالو ي زەملي».
العاش رەت «جىل ءانى-71» تەلەۆيزيالىق بايقاۋىندا ءمۇسلىم ماگوماەۆتىڭ ورىنداۋىندا «ۇيلەنۋ تويى» ءانى كوپشىلىككە ۇسىنىلدى. قازىلار القاسى بىردەن وعان «ەڭ ۇزدىك ءان» جۇلدەسىن تابىستادى. ەڭ وكىنىشتىسى, ارنو بابادجانيان ءاننىڭ ءجيى شىرقالۋىنا جول بەرمەي, ءبىر تۋىندىسى بيىككە جەتپەي جاتىپ, كەلەسى ءبىرىن ۇلكەن ساحناعا الىپ شىعۋعا اسىققان. سوندىقتان كوپ ءانى كولەڭكەدە قالىپ قويعان ەكەن. مۇنى ماگوماەۆ كۇندەلىگىندە جازىپ قالدىرىپتى.
«كەمشىلىكتەر – ءبىزدىڭ ونەرىمىزدىڭ ءبىر ساتىسى. ارنونىڭ تەمپەرامەنتى ونىڭ ءوزىن ءوزى كورسەتۋگە اسىعۋىمەن عانا شەكتەلدى. سونىمەن قاتار ول ۇلى وقيعالاردىڭ ءوزى كەلەرىن ويلامادى, وعان قاراي جۇگىردى. سوندىقتان كوپتەگەن جاقسى ءانىن سۋعا باتىرىپ الدى. اندەرى دۇنيەگە كەلە سالىسىمەن تانىمالدىلىقتان تىس قالدى. ءتىپتى ارنو «ۇيلەنۋ تويى» ءانىن تولىق كولەمدە ەل ىشىندە تارالۋىن كۇتپەي, باسقا تۋىندى شىعاردى.
اۋەندەر بىرىنەن سوڭ ءبىرى تۋىپ, جانىن قويارعا جەر تاپپادى. بابادجانيان ماعان بۇتاقتان-بۇتاققا سەكىرگەن بۇلبۇل قۇس سەكىلدى كورىنەدى. بويىنان «دانىشپاننىڭ اڭعالدىعى» دا بايقالادى. «كوردىڭىز بە, قاريا, تاعى ءبىر اۋەن جازدىم. جانە ول – وتە جاقسى! جاقسى ەمەس پە, ءا؟» دەيدى تەلەفوننىڭ ارعى جاعىنان قۋانا سويلەپ. ءاربىر شىعارماسىنىڭ اسقاق اۋەنىنە يمانداي سەندى. بىراق ول تاقىرىپ جاعىنان ۋاقىتپەن ساناسپادى. جاستارعا ۇناۋدان قالدى, ال جىلدار جاڭارا بەردى», دەپتى ايگىلى ءانشى.
سودان با ەكەن, كىم بىلەدى ايتەۋىر ءمۇسلىم ماگوماەۆ «ۇيلەنۋ تويى» ءانىن اسا جاقسى كورمەگەن دەسەدى. تەك كورەرمەندەردىڭ سۇراۋىمەن عانا ورىندايدى ەكەن. ءاندى كەيىن دەگدار دوسى يوسيف كوبزون مەن ارىپتەسى لەۆ لەششەنكو سياقتى كەڭەس ءداۋىرىنىڭ جارىق جۇلدىزدارى شىرقادى. قازىر رەسەي ەستراداسىنىڭ ەركەسى نيكولاي باسكوۆ ورىس تويىنىڭ سانىنە اينالىپ ءجۇر. عاسىر الماسسا دا اۋەزدى ءان ءالى دە جاس پەن كارىنىڭ كوڭىلىنە مەيىرىم مەن قۋانىش قۇيادى. جاس جۇبايلار جىرىنداي جانىڭدى ەلىتە تۇسەدى.
