وقيعا • 04 تامىز، 2021

ەلوردادا ماس جۇرگىزۋشى 15 تاۋلىككە قاماۋعا الىندى

12 رەت كورسەتىلدى

ەلوردادا جول ەرەجەسىن ورەسكەل بۇزعان ماس جۇرگىزۋشىنى باسقا كولىكتەگىلەر ءتۇسىپ كەلىپ توقتاتپاق بولعان. الايدا ولاردان قاشپاق بولعان ماس جۇرگىزۋشى الدىنداعى كولىكتى سوعىپ توقتادى، دەپ حابارلايدى Egemen.kz.

وقيعا كەشە ساعات 21.49-دا ەلوردانىڭ ماڭگىلىك ەل داڭعىلىندا بولعان. «Toyota» ماركالى كولىك جۇرگىزۋشىسى جول ەرەجەسىن ورەسكەل بۇزىپ، اپاتتى جاعداي تۋعىزعان. جۇرگىزۋشىنى توقتاتپاق بولعان ەلوردا تۇرعىندارىنىڭ ءبىرى قارسىلىققا تاپ بولدى. وقيعا ورنىنا كەلىپ جەتكەن پاترۋلدىك پوليتسيا ەكيپاجى جۇرگىزۋشىنىڭ قۇجاتىن تەكسەرۋ كەزىندە كولىك سالونىنان ىشىمدىكتىڭ ءيىسىن بۇرقىراپ تۇرعانىن بايقاعان.

مەديتسينالىق ساراپتاما قورىتىندىسى ەر ادامنىڭ جەڭىل دارەجەدە ماس كۇيدە بولعانىن انىقتادى. كولىكتى ماس كۇيدە جۇرگىزگەن ەر ادامعا قاتىستى قر اكىمشىلىك قۇقىقبۇزۋشىلىقتار تۋرالى كودەكسىنىڭ 608-بابى 1-تارماعى بويىنشا اكىمشىلىك ءوندىرىس قوزعالدى. كولىك ايىپ تۇراعىنا قويىلدى.

سوت شەشىمى بويىنشا، جۇرگىزۋشى ون بەس تاۋلىككە اكىمشىلىك قاماۋعا الىنىپ، جەتى جىل مەرزىمگە كولىك جۇرگىزۋ قۇقىعىنان ايىرىلدى.

پوليتسيادا ەلوردادا وتكەن جىلمەن سالىستىرعاندا ماس جۇرگىزۋشىلەردىڭ كوبەيگەنىن اتاپ ءوتتى. بىلتىرعى 7 ايدا قالادا 308 ماس جۇرگىزۋشى ۇستالسا، بيىلعى جىلدىڭ وسىنداي كەزەڭىندە ماس كۇيىندە كولىك جۇرگىزگەن 861 ادام جاۋاپقا تارتىلعان. 2021 جىلدىڭ باسىنان بەرى ماس جۇرگىزۋشىلەر كەسىرىنەن 10 ادام ءتۇرلى دەنە جاراقاتىن الىپ، ءبىر ادام قازا بولعان. جالپى وسىنداي 162 جول-كولىك وقيعاسى تىركەلگەن.

«وسىنداي وقيعالار سالدارىنان بەيكۇنا ادامدار قازا تاۋىپ، جاراقات الاتىنرى وكىنىشتى. ماس جۇرگىزۋشىلەر كىناسىمەن بولاتىن اپاتتى جاعدايدىڭ الدىن الۋ – ەلوردا پوليتسياسىنىڭ باستى مىندەتى.

جول قوزعالىسىن كۇن سايىن قاداعالاۋ، كولىكتى ماس كۇيىندە جۇرگىزۋ فاكتىسىن بولدىرماۋ بويىنشا رەيد كۇن سايىن جۇرگىزىلۋدە»، دەپ اتاپ ءوتتى ەلوردالىق پوليتسيانىڭ باسشىسى ەرجان سادەنوۆ.

سوڭعى جاڭالىقتار

ۇقساس جاڭالىقتار