ءبىلىم جانە عىلىم ۆيتسە-ءمينيسترى شولپان كارينوۆا ورتالىق كوممۋنيكاتسيالار قىزمەتىندە وتكەن بريفينگتە: «مينيسترلىك ۇيىمداستىراتىن زياتكەرلىك وليمپيادالار مەن كونكۋرستاردى «دارىن» رەسپۋبليكالىق ورتالىعى, شىعارماشىلىق جانە كوركەمدىك باعىتتاعى سايىستاردى رەسپۋبليكالىق «قوسىمشا ءبىلىم بەرۋ» ورتالىعى, سپورتتىق جارىستاردى «دەنە شىنىقتىرۋ جانە سپورت» رەسپۋبليكالىق ورتالىعى ۇيلەستىرەدى. ايتا كەتۋ كەرەك, مينيسترلىك وتكىزەتىن بارلىق كونكۋرس بيۋدجەت قاراجاتى ەسەبىنەن ۇيىمداستىرىلادى, سوندىقتان وعان قاتىسۋ تەگىن. بۇدان بولەك وليمپيادالار مەن كونكۋرستاردىڭ قورىتىندىسى بويىنشا بەرىلەتىن ديپلومدار مەن مەدال, توسبەلگىلەر دە وقۋشى-جەڭىمپازدارعا, جۇلدەگەرلەرگە تەگىن بەرىلەدى. وسى ورايدا قوعامداعى اقىلى وليمپيادالار تۋرالى قىزۋ تالقىلاۋعا توقتالا كەتكىم كەلەدى. قازىرگى تاڭدا ءتۇرلى جەكەمەنشىك ۇيىمدار وقۋشىلارعا ارنالعان اقىلى كونكۋرستاردى ۇيىمداستىرادى. الايدا مۇنداي قىزمەت كورسەتۋ سالاسى ليتسەنزيالانبايدى, – دەدى.
سپيكەردىڭ سوزىنە سەنسەك, وسىنداي جەكەمەنشىك ۇيىمدار وزدەرىنىڭ جارىستارىن مينيسترلىكتىڭ جوسپارىندا بەكىتىلگەن كونكۋرستاردىڭ تاقىرىبىمەن بىردەي نەمەسە ۇقساس ەتىپ ۇيىمداستىرادى. جانە قاتىسۋعا وقۋشىلاردان اقشا تالاپ ەتەدى. تەگىن ۇيىمداستىرىلمايتىن وليمپيادالار مەن كونكۋرستاردىڭ بىردە-بىرەۋىنىڭ اتالعان ۆەدومستۆوعا قاتىسى جوق. سول سەبەپتى اتا-انالار مەن مۇعالىمدەر بالانى كونكۋرستارعا قاتىستىرۋدا مۇقيات بولعانى ابزال.
– اتا-انالار, مۇعالىمدەر مەن مەكتەپتەر ءارتۇرلى وليمپيادالار مەن كونكۋرستارعا بالالاردىڭ قاتىسۋىن تاڭداعاندا مۇقيات بولۋى كەرەك. ولار ءوز قاراجاتىن جۇمساماس بۇرىن ۇيىمداستىرۋشىنىڭ كىم ەكەنىن, بالالاردى دامىتۋدا قانداي تاجىريبەسى بارىن, وقۋشىنىڭ بولاشاعىنا نە بەرەتىنىن, قانداي داعدىلاردى يگەرەتىنىن انىقتاپ العانى ءجون. جالپى, وليمپيادالارعا قاتىسۋ – ەرىكتى ءىس. ءاربىر اتا-انا بالاسىنىڭ اقىلى جارىستارعا قاتىسۋ-قاتىسپاۋىن ءوزى شەشەدى. بۇل رەتتە پەداگوگتەردىڭ دە, مەكتەپ اكىمشىلىكتەرىنىڭ دە, ۇيىمداستىرۋشىلاردىڭ دا ماجبۇرلەۋگە حاقى جوق. مۇنداي فاكتىلەر بولسا, مينيسترلىكتىڭ وڭىرلىك ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتتەرىنە جۇگىنۋگە بولادى, – دەدى ش.كارينوۆا.
