ەكولوگيا • 17 مامىر، 2021

ەلوردادا «Taza Alem-2021» جوباسى باستالدى

7 رەت كورسەتىلدى

بۇگىن ەلوردادا «Taza Alem-2021» جوباسى ەكولوگيالىق سەنبىلىكتەن باستالدى. سەنبىلىك اياسىندا قورعالجىن تاس جولى بويىنا كوشەتتەر ەگىلدى، دەپ حابارلايدى Egemen.kz.

TazaAlem مادەني-بۇقارالىق جوباسى نۇر-سۇلتان اكىمدىگى مەن اكىمدىكتىڭ «استانا جاستارى» كمم باستاماسىمەن قۇرىلعان.

ء«بىز بيىل TazaAlem جوباسى اياسىندا مۇقتاج ادامدارعا، زەينەتكەرلەرگە، ارداگەرلەرگە جانە تىل ەڭبەككەرلەرىنە كومەكتەسۋدى جوسپارلاپ وتىرمىز. قىستا اۋلالاردى قاردان تازالاپ، جازدا جوندەۋ جۇمىستارىنا كومەكتەسەمىز. بىلايشا ايتقاندا، ۆولونتەرلىكپەن اينالىسامىز. ءبىز سونداي-اق شەتەلدە كەڭ تاراعان سەنبىلىكتىڭ ەرەكشە فورماتى – پلوگگينگتى ەنگىزدىك. ونى «سپورت پەن سەنبىلىك» دەگەن ءسوز تىركەسىمەن سيپاتتاۋعا بولادى. وسىنداي فورماتتىڭ ارقاسىندا ادەتتەگى قوقىس جيناۋدى كوماندالار جارىسىنا اينالدىرامىز. مىسالى، قوقىستى كىم كوپ جانە جىلدام جينايدى دەپ سايىسۋعا بولادى»، دەدى «استانا جاستارى» كمم باسشىسىنىڭ ورىنباسارى ايان ەرمەنتاەۆ.

ونىڭ ايتۋىنشا، جاڭا فورماتتاعى سەنبىلىكتەرگە ەلوردالىق ۇكىمەتتىك ەمەس ۇيىمداردىڭ وكىلدەرىن، وقۋشىلاردى، ستۋدەنتتەر مەن ەلوردا تۇرعىندارىن دا تارتۋ جوسپارلانىپ وتىر. سەنبىلىك وتكىزىلەتىن اۋماق اعاش سانىنا بايلانىستى تاڭدالادى. ەگەر ولار از بولسا، اۋدان اكىمدىگىمەن كەلىسە وتىرىپ، اۋماققا اعاش ەگىلەدى.

ۇيىمداستىرۋشىلاردىڭ ايتۋىنشا، 1000-نان استام كوشەت وتىرعىزۋ جوسپارلانىپ وتىر.

ەسكە سالا كەتەيىك، ەلوردانىڭ بارلىق اۋدانىندا «بىرگە — تازا قازاقستان» ەكولوگيالىق ايلىعى ءوتىپ جاتىر. مەملەكەت باسشىسىنىڭ تاپسىرماسى بويىنشا اكىمدىك ساياباق اۋماقتارىن، تۇرعىن ءۇي الاپتارى مەن اۋلالاردى عانا ەمەس، قالانىڭ كورىكتى جەرلەرىن دە جاپپاي كوگالداندىرادى. قالانى جاپپاي كوگالداندىرۋ ەكولوگيانى جاقسارتىپ قانا قويماي، قالا تۇرعىندارى سەرۋەندەيتىن ورىن قۇرۋعا، سونىمەن قاتار قالانىڭ كليماتتىق جاعدايىن جاقسارتۋعا مۇمكىندىك بەرەدى.

 

 

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار