سەبەبى كوكتەمنىڭ باسىندا ۇقك شەكارا قىزمەتىنىڭ ساپىنا الىنعان بولاشاق شەكاراشىلار وتانىمىزعا ادال قىزمەت ەتۋگە سالتاناتتى تۇردە انت بەردى.
ۇقك شەكارا قىزمەتىنىڭ الماتى وبلىسى بويىنشا دەپارتامەنتىنە قاراستى قاراساي, رايىمبەك, الاكول اۋدانى بويىنشا شەكارا باسقارمالارىنىڭ ورتالىق الاڭدارىنا ساپقا تۇرعان ءاربىر ساربازدىڭ الىستاعى اتا-انا, تۋعاندارى مەن قۇربى-دوستارى دا بولاشاق شەكاراشىنىڭ الابۇرتقان جۇزىندەگى تولقىنىستى كورىپ, ولاردىڭ عۇمىرىنداعى ءبىر-اق رەت بولاتىن ماڭىزدى ءساتتىڭ كۋاسى بولدى. بۇلاي دەگەنىمىز, ۇقك شەكارا قىزمەتىنىڭ ينستاگرام-اكاۋنتىندا «كوكتەم-2021» شاقىرىلىمى ساربازدارىنىڭ انت قابىلداۋ راسىمىنەن تىكەلەي ونلاين كورسەتىلىم ۇيىمداستىرىلعان بولاتىن.
ءبىز قاراساي اۋدانى بويىنشا شەكارا باسقارماسىنىڭ اقجار ەلدىمەكەنىندە ورنالاسقان كاسىبي-تەحنيكالىق دايىندىق بولىمىندە وتكەن شاراعا قاتىسقان ەدىك.
ءدال ۋاقىتىندا باستالعان ءراسىم ەلىمىزدىڭ تۋى كوتەرىلىپ, انۇرانىمەن اشىلعان سوڭ 400-گە ساربازدىڭ ءوز وتانىنا انت بەرۋ ءراسىمى دە باستالىپ جۇرە بەرگەن.
سول-اق ەكەن, اتى-جوندەرى اتالىسىمەن, ساپتان شىققان بويى «مەن قاتارداعى جاۋىنگەر...» دەپ, ساڭقىلداپ الا جونەلگەن ساربازداردىڭ داۋىستارى تاۋ جارىپ, تاس بۇزاتىنداي ەكپىندى ەدى...
ولاردىڭ اراسىندا وزدەرىنىڭ الداعى قىزمەتتەرىن تەڭىز بەن وزەندەردە وتكىزۋگە دايىندالىپ جاتقان تەڭىزشىلەر دە بار. ولاردىڭ ۇستىندەگى تەڭىز تۇستەس اسكەري فورمالارى دا قۇيىپ قويعانداي وزدەرىنە سونشالىقتى جاراسىمدى. ولاردىڭ جاس جۇزدەرىنەن تولقىپ تۇرعاندارى ايقىن بىلىنەدى.
بۇگىنگە دەيىن ساپتىق دايارلىقتان وتكەن ساربازدار مۇنان بىلاي وزدەرىنىڭ شەكاراشىلىق شەبەرلىكتەرىن شىڭداپ, ەل شەبىنە قاجەتتى ماماندىقتاردى يگەرەتىن بولادى. بۇل – اتقىش, اتبەگى, شەكارالىق باقىلاۋ بولىمشەسىنىڭ كىشى باقىلاۋشىسى, كينولوگ, اسپازشى, بايلانىسشى, ينجەنەر, ەلەكتر قۇرالدارىنىڭ شەبەرى سەكىلدى تۋعان جەرىمىزدىڭ ءاربىر شارشىسىن كۇزەتۋگە اسا قاجەتتى ماماندىقتار.
سالتاناتتى شاراعا شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق ۇيىمىنىڭ الماتى قالالىق جانە وبلىستىق فيليالدارىنىڭ وكىلدەرى دە قاتىسىپ, شەكارا سوقپاعىنا تۇسكەلى تۇرعان جاس بۋىننىڭ الداعى قىزمەتتەرىنە ساتتىلىك تىلەدى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
