الايدا بۇل ەلدەردە جاۋاپكەرشىلىك تۋرالى ءسوز بولعاندا ەڭ ءبىرىنشى الەۋمەتتىك ادىلەتتىلىك پەن مورالدىق ۇستانىمدارعا تونەتىن قاۋىپ-قاتەرگە باسا ءمان بەرىلەدى. ال ءبىزدىڭ ەلدە بۇل زاڭنىڭ تولىقتاي جۇزەگە اسىرىلۋىنا نە كەدەرگى؟ سول باياعى – سىبايلاس جەمقورلىق. بۇل جەردە دە وسى ىندەتتەن اينالىپ وتە الماي وتىرمىز. ماسەلەنىڭ ءمانى پارانى الۋ-بەرۋدە ەمەس, مەملەكەتتىك قىزمەتتەگى «كوماندالىق جۇمىس ىستەۋ ستيلىنە» كەلىپ تىرەلەدى. ءبىر-ءبىرىن قولداپ-قولشاپتاپ, ءبىرىنىڭ قىلمىسىن ءبىرى جاسىرىپ-جاۋىپ وتىراتىن «كوماندامەن جۇمىس ىستەۋ» دەگەن قاعيدانى تولىق جويمايىنشا, بۇل پروبلەما الدىمىزدان شىعا بەرەرى ءسوزسىز. ءبىر سوزبەن ايتقاندا, «مەملەكەتتىك قىزمەتتەگى كوماندا» جەمقورلىققا جول اشا بەرەدى. قول استىنداعى قىزمەتكەرگە كەز كەلگەن باسشى جاۋاپتى. بۇرىنعىداي ء«بىرىنشى باسشىلىق ءاربىر قىزمەتكەرى ءۇشىن جاۋاپ بەرۋگە مىندەتتى ەمەس دەگەن» كوزقاراس قازىرگى ۋاقىتتىڭ تالابىنا ساي كەلمەيدى. ەگەر زاڭ ورىندالىپ, 1-2 لاۋازىمدى تۇلعا قىزمەتىنەن كەتسە, وسىنىڭ بارىنە قوعام مەن حالىق كۋا بولسا, بۇل ماسەلە دە وزدىگىنەن رەتتەلە باستار ەدى. ەڭ باستىسى, حالىقتىڭ سەنىمى ويانار ەدى.
بۇل ماسەلەنى كۇردەلەندىرىپ تۇرعان تاعى ءبىر جايت – قىزمەتكە جاڭادان كەلگەن باسشىلاردىڭ كادرلاردى ساپىرىلىستىرىپ, اۋىستىرا باستاۋى. تاجىريبەسى بار بىلىكتى باسشى كادردىڭ قادىرىن ءبىلۋى كەرەك. وسى تۇيتكىلدەردىڭ بارلىعى زاڭدا ناقتى ءارى تۇسىنىكتى ەتىپ جازىلعانى دۇرىس.
مارات ءباشىموۆ,
ەۋروپالىق قۇقىق جانە ادام قۇقىقتارى ساراپتامالىق ينستيتۋتىنىڭ ديرەكتورى
