قازاقستاننىڭ اتىنان 5 سپورتشى قاتىستى – مەيىرجان ادياروۆ, دياس قادىر, ءىلياس جاقسىبەك, ايبەك تۇرسىناقىن جانە سۇلتان ساعاتبەك. بالالاردا تىرەك-قيمىل اپپاراتى بۇزىلعان. ولاردىڭ بارلىعى «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن «تەڭ مۇمكىندىكتەر الەمى» قق ىسكە اسىرىپ جاتقان «سالاماتتى بولاشاق» جوباسى اياسىندا بەيىمدەلگەن سپورت سەكتسيالارىنا بارادى.
مەيىرجان مەن دياس كومانداعا ەكى «التىن», سۇلتان مەن ءىلياس قولا مەدالعا يە بولدى. ايبەك تۇرسىناقىن تقاز (تىرەك-قيمىل اپپاراتى زاقىمدانعان) سپورتتىق جەكپە-جەك فەدەراتسياسىنىڭ پرەزيدەنتى سەرگەي سەمايكيننەن جەكە مەدال الدى.
بۇل ۇلداردىڭ وزگە ەلگە بارىپ قاتىسقان العاشقى جارىستارى, ولار وتە مۇقيات دايىندالدى, جاتتىعۋعا كوپ ساعات جۇمسادى, كۇن ءتارتىبىن كۇشەيتتى.
«مەن جارىستارعا دوستارىممەن جانە سەنسەيمەن باردىم. كاراتەمەن 4 جىلدان بەرى اينالىسىپ كەلەمىن. بۇرىن مەن جارىستارعا قاتىستىم, بىراق تەك قازاقستاندا, سوندىقتان وسى جولى قاتتى ۋايىمدادىم. جارىس الدىندا ءبىز كۇن سايىن جاتتىعىپ جۇردىك, مەنىڭ بارلىق دوستارىم جۇلدەلى ورىندارعا يە بولعىسى كەلدى. مەيىرجان ەكەۋمىز «التىن» جەڭىپ العانىمىزعا وتە قۋانىشتىمىن. باسقا دوستارىم ءۇشىن دە وتە قۋانىشتىمىن – ولار قولا مەدال الدى», دەيدى دياس قادىر.
بالالاردى جارىستارعا سەنسەي, سۇيىكتى جاتتىقتىرۋشى, كوپ جىلدان بەرى «ەرەكشە» بالالارمەن جۇمىس ىستەپ كەلە جاتقان جاڭگىر جۇمابەكوۆ دايىندادى. پاراكاراتيستەر كومانداسىنىڭ جارىسقا قاتىسۋى «Samruk-Kazyna Trust» قورىنىڭ «جاس دارىندار» جول ءجۇرۋ گرانتتارىن ۇسىنۋ جوباسىنىڭ ارقاسىندا مۇمكىن بولدى.
«بىرنەشە جىل بۇرىن ءبىزدىڭ ەلىمىزدە بەيىمدەلگەن دەنە شىنىقتىرۋ دەگەننىڭ نە ەكەنىن ەشكىم بىلمەدى. ال بۇگىندە ءبىزدىڭ سپورتشىلار حالىقارالىق جارىستاردا ونەر كورسەتىپ, ءبىرىنشى ورىندارعا يە بولۋدا. ءبىزدىڭ قولداۋىمىزدىڭ ارقاسىندا بدت ادىستەمەلىك قۇرالدارى ازىرلەنىپ, ءبىلىم بەرۋ جۇيەسىنە ەنگىزىلدى, بەيىمدەۋ سەكتسيالارى بۇكىل قازاقستان بويىنشا اشىلۋدا. بۇل ءىرى جۇيەلى الەۋمەتتىك وزگەرىستەردىڭ شاعىن باستاماسى عانا», دەيدى «Samruk-Kazyna Trust» قورىنىڭ رەسمي وكىلى ميراس ىرگەباەۆ.
«تەڭ مۇمكىندىكتەر الەمى» قق باسشىسى نۇرگۇل ۇلجەكوۆانىڭ ايتۋىنشا, جارىسقا قاتىسۋ بالالاردىڭ سپورتتىق كوكجيەگىن كەڭەيتىپ, باعا جەتپەس تاجىريبە الۋعا مۇمكىندىك بەردى.
«ولار ءۇشىن ءاربىر جارىس – بۇل ءوز-ءوزىن جەڭۋ, شەكسىز مۇمكىندىكتەرىن كورسەتۋ مۇمكىندىگى جانە ءوزىنىڭ سپورتتىق شەبەرلىككە دەگەن ۇمتىلىسىندا دەنى ساۋ قۇرداستارىنان قالماۋ. مۇگەدەك بالالاردىڭ سپورتتاعى مۇنداي جەتىستىكتەرى باسقا بالالار ءۇشىن جاقسى ۇلگى بولادى دەپ سەنەمىن. ويتكەنى, سپورت ادام ءومىرىنىڭ بارلىق سالاسىن قامتيتىن ۇزدىكسىز وڭالتۋدىڭ ەڭ ءتيىمدى قۇرالى بولا الادى», دەپ اتاپ ءوتتى نۇرگۇل ۋلجەكوۆا.
ايتا كەتەيىك, «جاس دارىندار» جوباسى دارىندى بالالارعا رەسپۋبليكالىق جانە حالىقارالىق جارىستارعا, بايقاۋلارعا, وليمپيادالارعا قاتىسۋ ءۇشىن جول ءجۇرۋ گرانتتارىن ۇسىنادى. جول ءجۇرۋ گرانتىن الۋعا ءوتىنىمدى 18 جاسقا دەيىنگى بالالاردىڭ اتا-انالارى نەمەسە قامقورشىلارى, بالالار ۇجىمدارىنىڭ, الەۋمەتتىك مەكەمەلەردىڭ باسشىلارى بەرە الادى.
