پرەزيدەنت اتاپ وتكەن ستراتەگيالىق ماڭىزى بار «داربازا – ماقتاارال تەمىرجول جەلىسىنىڭ قۇرىلىسى» جوباسىن تولىق ىسكە قوسۋ 2026 جىلعى جەلتوقسانعا جوسپارلانعان. تۇركىستان وبلىسى اكىمدىگىنىڭ حابارلاۋىنشا, قۇرىلىس الاڭىندا اتقارىلىپ جاتقان جۇمىستاردىڭ بارىسى قاتاڭ باقىلاۋعا الىنعان. جوبانىڭ قۇرىلىسىن «قازاقستان تەمىر جولى» ۇك» اق تاپسىرىسىمەن «Integra Construction KZ» جشس جۇرگىزىپ جاتىر. جۋىردا وبلىس اكىمى نۇرالحان كوشەروۆتىڭ «قازاقستان تەمىر جولى» ۇك» اق-نىڭ قۇرىلىس جونىندەگى باسقارۋشى ديرەكتورى مارات يسقاليەۆپەن جانە جوبانى ىسكە اسىرۋشى «Integra Construction KZ» جشس وكىلدەرىمەن كەزدەسۋىندە قۇرىلىس بارىسىنداعى وزەكتى ماسەلەلەر مەن ولاردى شەشۋ جولدارى جان-جاقتى تالقىلاندى. جوبانىڭ نەگىزگى ماقساتى – «داربازا – ماقتاارال» جاڭا تەمىرجول جەلىسى ارقىلى جۇك جانە جولاۋشىلار تاسىمالىنىڭ كولەمىن ارتتىرۋ, ترانزيتتىك تاسىمالداردى اشۋ, جاڭا باعىتتاردى ىسكە قوسۋ, سونداي-اق تۇركىستان – شىمكەنت – تاشكەنت ۋچاسكەسىندەگى وتكىزۋ قابىلەتىن تاۋلىگىنە 35 جۇپ پويىزعا دەيىن ۇلعايتۋ. «قازاقستان تەمىر جولى» ۇك» اق-نىڭ قۇرىلىس جونىندەگى باسقارۋشى ديرەكتورى مارات يسقاليەۆتىڭ ايتۋىنشا, قازىر اياقتالعان جەر قازۋ جۇمىستارىنىڭ جالپى كولەمى 9,1 ملن تەكشە مەتردى قۇرايدى. 19,8 شاقىرىمعا رەلستى شپال تورى توسەلگەن. سونىمەن قاتار كوپىرلەر مەن وتكەلدەر سالۋ, سۋ قۇبىرلارىن جۇرگىزۋ, جاساندى قۇرىلىمداردى مونتاجداۋ جۇمىستارى قارقىندى اتقارىلىپ جاتىر. جەر تەگىستەۋ 70 پايىزعا اياقتالعان. تەك سىرداريا وزەنى جاعالاۋىنداعى جۇمىستار جالعاسىپ جاتىر. سونداي-اق تەمىرجول بويى-نا شاعال توسەلىپ, كوپىرلەر سالىنۋعا ءتيىس. «ەرداۋىت» ستانساسىنان وزەنگە دەيىن 7 كوپىردىڭ قۇرىلىسى اياقتالعان. بۇل جۇمىستارعا 560-تان استام ادام مەن 400-گە جۋىق ارنايى تەحنيكا جۇمىلدىرىلعان.
تەمىرجول جەلىسىنىڭ ۇزىندىعى – 172 شاقىرىم. ونىڭ 15,35 شاقىرىمى ماقتاارال اۋدانى اۋماعى ارقىلى وتەدى. بۇگىندە جوبانى جۇزەگە اسىرۋ ماقساتىندا «ماقتاارال» ستانساسىن ورنالاستىرۋعا قاجەتتى جەر تەلىمدەرىن مەملەكەت مۇقتاجى ءۇشىن يەلىكتەن شىعارۋ راسىمدەرى باستالعان. اۋدان اكىمى باقىت ناسىرحان ۇلىنىڭ ايتۋىنشا, جوسپارعا سايكەس تۇرعىن ءۇي قۇرىلىسىنا ارنالعان – 0,9987 گەكتار بولاتىن 8 جەر تەلىمى, كاسىپكەرلىك جانە وزگە ماقساتتاعى – 2,25 گەكتار بولاتىن 11 جەر تەلىمى, اۋىل شارۋاشىلىعى ماقساتىنداعى – 27,02 گەكتار بولاتىن 34 جەر تەلىمى جانە مەملەكەتتىك جەر پايدالانۋشىلارداعى – 0,6 گەكتار بولاتىن 7 جەر ۋچاسكەسى مەملەكەت مەنشىگىنە قايتارىلاتىن بولادى. جاڭا باعىت «سارىاعاش» وتكىزۋ پۋنكتىنىڭ جۇكتەمەسىن تۇسىرەدى, سونداي-اق سارىاعاش, كەلەس, جەتىساي, ماقتاارال جانە شاردارا اۋداندارىن بايلانىستىرادى. اتالعان باعىتتىڭ وتكىزۋ قابىلەتىن ەداۋىر ارتتىرىپ, ماگيسترالدىق كولىك, كەدەندىك جانە شەكارالىق ينفراقۇرىلىمنىڭ دامۋ دەڭگەيىن كوتەرۋگە مۇمكىندىك بەرەدى. جەلى بەس اۋداننىڭ اۋماعى ارقىلى ءوتىپ, قازاقستاندى وزبەكستانمەن بايلانىستىراتىن كولىك دالىزىنە اينالادى. بۇدان بولەك, وبلىستىڭ الەۋمەتتىك-ەكونوميكالىق دامۋى-نا سەرپىن بەرىپ, جاڭا وندىرىستەردىڭ اشىلۋى-نا جانە قوسىمشا جۇمىس ورىندارىنىڭ قۇرىلۋىنا ىقپال ەتەدى.
سونداي-اق مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ V وتىرىسىندا ەلدەگى كولىك ينفراقۇرىلىمىن دامىتۋ ماسەلەسىنە ەرەكشە توقتالدى. سونىڭ ىشىندە, سارىاعاش قالاسى ماڭىنداعى كولىك قوزعالىسىنىڭ تىعىز ەكەنىن اتاپ ءوتىپ, وسى ماسەلەنى شەشۋ ماقساتىندا بيىل «سارىاعاش اينالما جولى» جوباسىنىڭ قۇرىلىسىن قولعا الۋ قاجەتتىگىن ايتقان ەدى. ال ۇكىمەتتىڭ كەڭەيتىلگەن وتىرىسىندا تەمىرجولمەن قاتار اۆتوكولىك تاسىمالىن دامىتۋعا قاتىستى ءىرى جوبالاردى دا جۇزەگە اسىرۋ بارىسىن قاتاڭ باقىلاۋعا الۋدى تاپسىردى. سارىاعاش اينالما جولىنىڭ جالپى ۇزىندىعى 102 شاقىرىم بولادى. جوبالاۋ-سمەتالىق قۇجاتتامانىڭ قۇنى – 238,1 ملرد تەڭگە. بۇل جول – I ب ساناتىنداعى, 4 جولاقتى اۆتوموبيل جولى. جوبا رەسپۋبليكالىق ماڭىزى بار ا-15 اۆتوموبيل جولىنا بالاما باعىت رەتىندە قىزمەت اتقارىپ, سارىاعاش قالاسى مەن وعان ىرگەلەس اۋماقتارداعى كولىك جۇكتەمەسىن ازايتادى. ترانزيتتىك كولىكتەردىڭ كەدەرگىسىز قوزعالىسىن قامتاماسىز ەتۋگە مۇمكىندىك بەرەدى. سونىمەن قاتار جول قوزعالىسى قاۋىپسىزدىگى ارتىپ, ءوڭىردىڭ كولىك-لوگيستيكالىق الەۋەتىن دامىتۋعا وڭ اسەرىن تيگىزەدى.
تۇركىستان وبلىسى
