ينفوگرافيكانى جاساعان – زاۋرەش سماعۇل, «EQ»
وبلىس اكىمىنىڭ الەۋمەتتىك سالاعا جاۋاپتى ورىنباسارى ءجۇسىپ جۇماعۇلوۆ ۇسىنعان دەرەكتەرگە جۇگىنسەك, وتكەن جىلى ءوڭىردىڭ مەكتەپكە دەيىنگى مەكەمەلەرىندە قوسىمشا 355 ورىن اشىلدى. بۇل بەلگىلەنگەن جوسپاردان 18,3%-عا ارتىق. سونىڭ ارقاسىندا 2–6 جاس ارالىعىنداعى بۇلدىرشىندەردىڭ 97,5%-ى مەكتەپكە دەيىنگى تاربيەمەن قامتىلدى.
بىلتىر پەتروپاۆل قالاسىندا «قازاقستان حالقىنا» قورىنىڭ قولداۋىمەن 280 ورىنعا شاقتالعان بالاباقشانىڭ قۇرىلىسى باستالدى. بۇل سابيلەردى مەكتەپكە دەيىنگى مەكەمەمەن قامتۋ كورسەتكىشىن تاعى ءبىر پايىزعا ارتتىرۋعا مۇمكىندىك بەرەدى. سونىمەن قاتار قارجىلاندىرۋدىڭ ۆاۋچەرلىك جۇيەسى ەنگىزىلدى. قاراجاتتى بارىنشا ءتيىمدى جۇمساۋعا جول اشقان جۇيەنىڭ كومەگىمەن 629,1 ملن تەڭگە ۇنەمدەلىپ, قارجى مەكتەپتەردىڭ ماتەريالدىق-تەحنيكالىق بازاسىن نىعايتۋعا باعىتتالدى. ناتيجەسىندە, مەملەكەت قارجىسىن جىمقىرۋعا توسقاۋىل قويىلدى. بيىل بۇل تاجىريبە وبلىستىڭ بارلىق اۋدانىنا تاراتىلماقشى.
بۇدان بولەك, «كەلەشەك مەكتەبى» ۇلتتىق جوباسى ءساتتى ىسكە اسىرىلىپ, وبلىس ورتالىعىنداعى «بەرەكە» شاعىن اۋدانىندا 600 ورىندىق جاڭا مەكتەپ پايدالانۋعا بەرىلدى. سالىنعان ءبىلىم وردالارىنىڭ قاتارىندا ەسىل اۋدانىنداعى ەڭبەك اۋىلىندا جەكەمەنشىك قاراجات ەسەبىنەن بوي كوتەرگەن 50 ورىندىق مەكتەپ تە بار. وتكەن جىلى مەكتەپتەردى جوندەۋ, جاڭعىرتۋ جۇمىستارىنا 5,9 ملرد تەڭگە ءبولىنىپ, اۋىلدىق جەرلەردەگى 11 مەكتەپتىڭ ماتەريالدىق-تەحنيكالىق بازاسى 2,3 ملرد تەڭگەگە ساتىپ الىنعان قۇرال-جابدىقتارمەن تولىقتىرىلدى. سونداي-اق 291,1 ملن تەڭگەگە 35 ءپان كابينەتى جاراقتاندىرىلدى. «اۋىل مەكتەبى – ساپا الاڭى» باعدارلاماسى اياسىندا «قازاقستان حالقىنا» قورىنىڭ دەمەۋشىلىگىمەن 80 STEM-كابينەت اشىلدى.
الەۋمەتتىك سالانىڭ كۇرەتامىرى سانالاتىن نەگىزگى باعىتتاردىڭ ءبىرى – جاستار ساياساتى. قازىر 14–35 جاس ارالىعىنداعى ازاماتتار ءوڭىر حالقىنىڭ 24,5%-ىن قۇراپ وتىر. وبلىستا 128 مىڭنان استام جاس بار. بىلتىر 100,9 ملن تەڭگەگە جاستار اراسىندا 19 جوبا ىسكە اسىرىلدى. ونىڭ ىشىندە قوعامعا دا, جاستاردىڭ وزىنە دە ەڭ زور پايداسىن تيگىزگەنى – «جاسىل ەل» باعدارلاماسى. وسى باعدارلاما اياسىندا 759 جاس ازامات جۇمىسپەن قامتىلدى. بيىل بۇل كورسەتكىشتى 760-قا دەيىن ارتتىرۋ كوزدەلىپ وتىر.
جاس مامانداردى قولداۋ ماقساتىندا «قىزىلجار جاستارى» اتتى الەۋمەتتىك يپوتەكالىق باعدارلاماسى قولعا الىندى. جوبانى قارجىلاندىرۋعا جەرگىلىكتى بيۋدجەتتەن 350 ملن تەڭگە, «وتباسى بانكىنەن» قوسىمشا 350 ملن تەڭگە قاراستىرىلدى. سونىڭ ارقاسىندا 45 جاس مامان جەڭىلدەتىلگەن شارتپەن تۇرعىن ۇيگە قول جەتكىزدى. بۇل باعدارلاما 2029 جىلعا دەيىن جالعاسىن تابادى. جاستارمەن جۇمىس بارىسىندا ازاماتتاردىڭ ءوز قۇقىقتارى مەن بوستاندىقتارىن جەتە بىلۋىنە, ونى قورعاۋ مادەنيەتىن ارتتىرۋعا باعىتتالعان «زاڭ مەن ءتارتىپ» تۇجىرىمداماسىن دارىپتەۋ ءىسى دە بەلسەندى جۇرگىزىلىپ كەلەدى.
«تازا قازاقستان» جالپىۇلتتىق باستاماسى اياسىندا بىلتىر 25 مىڭ ادامدى قامتىعان 4 مىڭنان استام ءىس-شارا ۇيىمداستىرىلدى. بۇگىندە جاستاردىڭ قورشاعان ورتاعا جاناشىرلىقپەن قاراپ, قوعامدىق ورىنداردا تازالىق ساقتاۋ مادەنيەتى قالىپتاسىپ كەلەدى.
بيىل تاعى جاستارعا ارنالعان 34 جوبانى ىسكە اسىرۋ جوسپارلانىپ وتىر, وعان بيۋدجەتتەن 145,6 ملن تەڭگە بولىنگەن. بۇل باستامالاردىڭ بارلىعى وسكەلەڭ ۇرپاقتى قوعامدىق پايدالى ەڭبەككە تارتۋدىڭ ءتيىمدى تەتىكتەرىن قامتيدى.
جاستاردى بۇقارالىق سپورتقا باۋلۋ – مەملەكەتتىك ساياساتتىڭ باسىم باعىتى. بىلتىر سپورتپەن شۇعىلداناتىندار قاتارى 228 مىڭعا جۋىقتادى, بۇل بۇرناعى جىلمەن سالىستىرعاندا 5 مىڭ ادامعا ارتىق. بيىل تاعى 2,8 مىڭداي تۇرعىندى سپورتتىق شارالارعا قاتىستىرۋ كوزدەلگەن.
وبلىستىڭ سپورتتىق ينفراقۇرىلىمىندا 2 197 نىسان تىركەلگەن. ونىڭ ىشىندە بىلتىر 43 نىسان جاڭادان پايدالانۋعا بەرىلدى. قۇرىلىسى ءجۇرىپ جاتقان 46 نىسان الداعى ۋاقىتتا ىسكە قوسىلادى. سونىمەن قاتار «سامۇرىق-قازىنا» اق مەن «قازاقستان حالقىنا» قورى بىرلەسىپ, ەرەكشە قاجەتتىلىگى بار جاندارعا ارنالعان ينكليۋزيۆتى سپورت ورتالىعىن سالىپ بەرۋدى قولعا الماقشى.
سپورت سالاسىنا لايىقتى دەڭگەيدە كوڭىل ءبولىنۋىنىڭ ناتيجەسىندە ءوڭىردىڭ 434 سپورتشىسى ۇلتتىق قۇراما ساپىنا قابىلداندى. ولار ءتۇرلى سپورت تۇرىنەن 1 140 مەدال قانجىعالادى. سولاردىڭ قاتارىندا بيىلعى قىسقى پاراليمپيادانىڭ چەمپيونى ەربول حاميتوۆ پەن بوكسشى ناتاليا بوگدانوۆانىڭ الەمدىك دەڭگەيدە توپ جارىپ, ەل نامىسىن ابىرويمەن قورعاعانىن ماقتانىشپەن اتاپ وتۋگە بولادى.
سولتۇستىك قازاقستان وبلىسى
