جاز مەزگىلىندە سۇرانىستىڭ كۇرت ارتۋىنا بايلانىستى ۇلتتىق تاسىمالداۋشى 15 قوسىمشا تەمىرجول باعىتىن ىسكە قوسپاق. الاكولگە قاتىنايتىن پويىزدار استانا, الماتى, سەمەي, وسكەمەن, قىزىلوردا جانە پاۆلودار قالالارىنان جۇرەدى.
قوسىمشا رەيستەر قاتارىندا «نۇرلى جول – دوستىق», «الماتى – دوستىق», «سەمەي – دوستىق», «وسكەمەن – دوستىق» باعىتتارى مەن بىرقاتار تىركەمە ۆاگوندار بار. سونىمەن قاتار جازعى ماۋسىمدا «اقتوبە – نۇرلى جول», «قاراعاندى – بالقاش», «الماتى-2 – سەمەي» باعىتتارى بويىنشا دا قوسىمشا پويىزدار قاتىنايدى.
«جولاۋشىلار تاسىمالى» اق باسقارما توراعاسى ديار نۇسىپقوجانوۆ جازعى كەزەڭدە كۋرورتتىق ايماقتار مەن ءىرى قالالارعا سۇرانىس جىل سايىن ءوسىپ كەلە جاتقانىن ايتتى. ونىڭ سوزىنشە, جولاۋشىلارعا قىزمەت كورسەتۋ ءۇشىن 2 مىڭنان استام ۆاگون پايدالانىلادى. ولاردىڭ قاتارىندا ستاندارتتى ۆاگوندار, «تالگو» قۇرامدارى جانە ەلەكتر پويىزدارى بار.
سونداي-اق ۆاگونداردىڭ 86 پايىزى كونديتسيونەر جۇيەسىمەن جابدىقتالعان. بارلىق جىلجىمالى قۇرام ماۋسىم الدىندا تەحنيكالىق تەكسەرىستەن ءوتىپ, سانيتارلىق وڭدەۋدەن وتكىزىلگەن.
پويىزداردا جولاۋشىلار ءۇشىن مۋلتيمەديالىق ويىن-ساۋىق پورتالى جۇمىس ىستەيدى. جولاۋشىلار فيلم كورىپ, مۋزىكا تىڭداي الادى. ەرەكشە قاجەتتىلىگى بار ازاماتتارعا ارنايى بەيىمدەلگەن ۆاگوندار قاراستىرىلعان. سونىمەن بىرگە بيلەت راسىمدەۋ مەن ۆوكزالداعى كومەك قىزمەتتەرىنە ونلاين ءوتىنىم بەرۋ مۇمكىندىگى دە بار.
جازعى ماۋسىمعا دايىندىق بارىسىندا قازاقستان تەمىر جولى, «جولاۋشىلار تاسىمالى» اق, تۋريستىك وپەراتورلار مەن «اتامەكەن» ۇلتتىق كاسىپكەرلەر پالاتاسى بىرلەسكەن جۇمىس كەڭەستەرىن وتكىزىپ جاتىر. وندا جولاۋشىلار اعىنىن ءتيىمدى ۇيىمداستىرۋ جانە سۇرانىسى جوعارى باعىتتارعا قوسىمشا رەيستەر اشۋ ماسەلەلەرى تالقىلانۋدا.
بيلەتتەر تەمىرجول كاسسالارىندا, bilet.railways.kz سايتىندا جانە ءتۇرلى تسيفرلىق سەرۆيستەر ارقىلى ساتىلىپ جاتىر.
ەسكە سالايىق, اباي وبلىسىنا جۇمىس ساپارى بارىسىندا ولجاس بەكتەنوۆكە الاكولدى دامىتۋدىڭ كەشەندى جوسپارى تانىستىرىلدى.
