فوتو: istockphoto.com
ەربول ايتۋوۆ 4 ءساۋىر كۇنى «قاسيەت» كلينيكاسىنا جۇگىنىپ, ليپوساكتسيا وپەراتسياسىن جاساتقان. وپەراتسيادان كەيىن ول كوماعا ءتۇسىپ, كەيىن وبلىستىق اۋرۋحاناعا جەتكىزىلگەن. ءبىر ايدان سوڭ ناۋقاس كوز جۇمدى.
مارقۇمنىڭ تۋىستارىنىڭ ءوتىنىشى نەگىزىندە 29 ءساۋىر مەن 15 مامىر ارالىعىندا كلينيكاعا جوسپاردان تىس تەكسەرۋ جۇرگىزىلگەن. تەكسەرۋگە تاۋەلسىز ساراپشىلار رەتىندە پلاستيكالىق حيرۋرگ پەن انەستەزيولوگ-رەانيماتولوگ تارتىلعان.
مەديتسينالىق جانە فارماتسەۆتيكالىق باقىلاۋ كوميتەتىنىڭ وبلىستىق دەپارتامەنتىنىڭ مالىمەتىنشە, تەكسەرۋ بارىسىندا بىرقاتار زاڭبۇزۋشىلىقتار انىقتالعان.
«پاتسيەنتتى جوسپارلى وپەراتسياعا دايىنداۋ جانە مەديتسينالىق كومەك كورسەتۋدى ۇيىمداستىرۋ ستاندارتتارىنىڭ بۇزىلۋى انىقتالدى», دەلىنگەن دەپارتامەنت حابارلاماسىندا.
ايتا كەتەيىك, اتالعان وقيعاعا بايلانىستى ماڭعىستاۋ وبلىسىنىڭ پوليتسياسى دا تەرگەۋ جۇرگىزىپ جاتىر.
ەسكە سالا كەتەيىك, بۇعان دەيىن الماتىداعى جەكە كلينيكادا ليپوساكتسيادان كەيىن بلوگەر ءارى كاسىپكەر ساۋلە ەرماحانوۆا دا قايتىس بولدى.
