بۇل – حالىققا قولجەتىمدى باسپانا الۋعا مۇمكىندىك بەرەتىن مەملەكەتتىك باعدارلاما. ونىڭ باستى ەرەكشەلىگى – جىلدىق مولشەرلەمەسى نەبارى 7%. باعدارلاماعا ەلىمىزدىڭ بارلىق ازاماتتارى قاتىسا الادى. الايدا قارىز الۋشىنىڭ جانە ونىڭ جۇبايىنىڭ سوڭعى 18 اي ىشىندە تۇرعىن ءۇيى بولماۋى كەرەك.
ولجاس بەكتەنوۆ كوممەرتسيالىق يپوتەكا كولەمىن ارتتىرۋدى تاپسىردى
جالپى العاندا, جىل سايىن باعدارلاماعا 100 ملرد تەڭگە بولىنەدى. بۇل قارجىعا شامامەن 5,5 مىڭعا جۋىق يپوتەكالىق نەسيە راسىمدەلەدى.
باعدارلامانىڭ نەگىزگى شارتتارى:
– پايىزدىق مولشەرلەمە – 7%;
– باستاپقى جارنا – كەمىندە 20%;
– نەسيە مەرزىمى – 25 جىلعا دەيىن;
– قارىزدىڭ ەڭ جوعارى سوماسى:
30 ملن تەڭگەگە دەيىن استانا, الماتى قالالارى مەن ولاردىڭ جانىندا ورنالاسقان ايماقتاردان, سونداي-اق اقتاۋ, اتىراۋ, شىمكەنت قالالارىنان ءۇي الۋعا بولادى;
25 ملن تەڭگەگە دەيىن قاراعاندى قالاسىنان راسىمدەي الاسىز;
20 ملن تەڭگەگە دەيىن باسقا وڭىرلەردەن قاراستىرۋعا بولادى.
باعدارلاما اياسىندا تەك جاڭا سالىنعان تۇرعىن ءۇي ساتىپ الىنادى. ياعني, پاتەردى قۇرىلىس كومپانيالارىنان ءوز بەتىڭىزشە ىزدەۋ قاجەت. سونىمەن قاتار, ءۇي تولىق پايدالانۋعا بەرىلگەن بولۋى ءتيىس. قۇرىلىسى ءجۇرىپ جاتقان نەمەسە ەكىنشى نارىقتاعى باسپاناعا بۇل يپوتەكا بەرىلمەيدى.
قانداي بانكتەر قاتىسادى:
باعدارلاما بويىنشا يپوتەكانى تەك 7 بانك ۇسىنادى:
Halyk Bank,
بانك تسەنتركرەديت,
Freedom Bank قازاقستان,
ەۋرازيالىق بانك,
Bank RBK,
ForteBank,
Altyn Bank.
ال «وتباسى بانك» بۇل باعدارلاماعا قاتىسپايدى.
ءوتىنىم بەرۋ ءتارتىبى
يپوتەكاعا ءوتىنىشتى ازاماتتار وزدەرى بەرەدى. كوپتەگەن بانكتەردە الدىن الا ءوتىنىمدى سايت نەمەسە ءموبيلدى قوسىمشا ارقىلى ونلاين جولداۋعا بولادى. بۇل كەزدە ناقتى تاڭدالعان پاتەردىڭ كاداسترلىق ءنومىرى مەن قۇرىلىس كومپانياسىنىڭ بسن-ءىن كورسەتۋ قاجەت.
نەگىزگى ءوتىنىم, ادەتتە, بانك بولىمشەسىندە راسىمدەلەدى. بىراق مۇندا ءبىر تاۋەكەل بار: الدىن الا جانە نەگىزگى ءوتىنىمنىڭ اراسىندا بىرنەشە اي ءوتۋى مۇمكىن. وسى ۋاقىت ىشىندە تاڭدالعان پاتەر ساتىلىپ كەتسە, ءوتىنىمدى قايتا تاپسىرۋعا تۋرا كەلەدى.
نەلىكتەن وتىنىمدەر شەكتەۋلى قابىلدانادى؟
باعدارلامانىڭ تاعى ءبىر ەرەكشەلىگى – بانكتەرگە الدىن الا قارجى بولىنبەيدى. ولار يپوتەكانى ءوز قاراجاتى ەسەبىنەن بەرەدى, كەيىن «قازاقستاننىڭ ورنىقتىلىق قورى» بەلگىلەنگەن ليميت شەگىندە سول نەسيەلەردى ساتىپ الادى.
سوندىقتان بانكتەر ليميتتەن اسىپ كەتپەۋگە تىرىسادى. بۇل ءوز كەزەگىندە ءوتىنىم قابىلداۋدىڭ شەكتەلۋىنە اسەر ەتەدى.
2026 جىلدىڭ قاڭتارىنان 26 ناۋرىزىنا دەيىن ەل بويىنشا 1202 يپوتەكالىق قارىز بەرىلىپ, جالپى سوماسى 24 ملرد تەڭگەنى قۇراعان.
ەڭ كوپ نەسيە بەرىلگەن قالالار:
– استانا – 467;
– الماتى – 331;
– شىمكەنت – 190.
ال سولتۇستىك قازاقستان, پاۆلودار, قىزىلوردا جانە ماڭعىستاۋ وبلىستارىندا نەبارى 1-3 قارىزدان عانا راسىمدەلگەن.
