جاڭعىرتۋدىڭ باستى ماقساتى ايقىن. بۇل – ءمامس قاراجاتىن پايدالانۋ كەزىندە اشىقتىقتى قامتاماسىز ەتۋ, باسقارۋ تيىمدىلىگىن ارتتىرۋ جانە قارجىلىق ءتارتىپتى كۇشەيتۋ. قازىرگى جاعدايدا بۇل ماسەلەلەردىڭ وزەكتىلىگى ارتىپ وتىر. سەبەبى دەنساۋلىق ساقتاۋ جۇيەسىندە قارجىلىق ۇدەرىستەردىڭ تولىق بىرىكتىرىلمەۋى, دەرەكتەردىڭ ءارتۇرلى جۇيەلەردە شاشىراڭقى بولۋى جانە قولمەن ورىندالاتىن وپەراتسيالاردىڭ ساقتالۋى باسقارۋ ساپاسىنا اسەر ەتپەي قويمايدى.
وسى تۇرعىدان العاندا, Qalqan پلاتفورماسىن ەنگىزۋ – ۋاقىت تالابىنان تۋىنداعان شەشىم. پلاتفورما مەديتسينالىق قىزمەتتەردى بولجاۋ, ەسەپكە الۋ, تەكسەرۋ جانە تولەۋ پروتسەستەرىن ءبىر جۇيەگە بىرىكتىرەدى. ناتيجەسىندە قارجىلىق وپەراتسيالار اۆتوماتتاندىرىلىپ, شەشىمدەر ناقتى دەرەكتەرگە سۇيەنە وتىرىپ قابىلدانادى. بۇل, ءوز كەزەگىندە, جۇيەدەگى ارتىق شىعىنداردىڭ الدىن الىپ, رەسۋرستاردى ءتيىمدى پايدالانۋعا مۇمكىندىك بەرەدى.
ماڭىزدىسى, Qalqan مەديتسينالىق ۇيىمداردىڭ ەمدەۋ-دياگنوستيكالىق قىزمەتىنە ارالاسپايدى. ول تەك قارجىلىق اعىنداردى باسقارۋعا باعىتتالعان قۇرال رەتىندە قاراستىرىلادى. ياعني پلاتفورما دەنساۋلىق ساقتاۋ جۇيەسىندەگى قولدانىستاعى اقپاراتتىق شەشىمدەردى الماستىرماي, ولاردى ءوزارا بايلانىستىراتىن جانە تولىقتىراتىن تەتىك قىزمەتىن اتقارادى.
جاڭا جۇيەنىڭ باستى ەرەكشەلىكتەرىنىڭ ءبىرى – باقىلاۋ ءتاسىلىنىڭ وزگەرۋى. بۇعان دەيىن باقىلاۋ كوبىنە قىزمەت كورسەتىلگەننەن كەيىن جۇرگىزىلىپ كەلسە, ەندى الدىن الا باقىلاۋ قاعيداتى ەنگىزىلەدى. پلاتفورما مەديتسينالىق ۇيىم اتقارعان مەديتسينالىق قىزمەتتى جىبەرگەن ساتتە-اق دەرەكتەردى تەكسەرىپ, سايكەسسىزدىكتەردى انىقتايدى. بۇل قارجىنىڭ ناقتى كورسەتىلگەن قىزمەتكە جۇمسالۋىن قامتاماسىز ەتەدى جانە ارتىق تولەمدەردىڭ الدىن الۋعا مۇمكىندىك بەرەدى.
امسق تسيفرلىق دامۋ ورتالىعى باسشىسىنىڭ ورىنباسارى گاۋحار جانايداروۆا اتاپ وتكەندەي, جاڭا ءتاسىل باسقارۋ لوگيكاسىن وزگەرتەدى. جۇيە شوت قالىپتاستىرۋ كەزەڭىندە-اق اقاۋلاردى انىقتاپ, شەشىم قابىلداۋدى ناقتى دەرەكتەرگە نەگىزدەۋگە جول اشادى.
Qalqan ەنگىزىلۋىمەن مەديتسينالىق ۇيىمداردىڭ جۇمىسىنا دا بىرقاتار وزگەرىس ەنگىزىلەدى. ەڭ الدىمەن, تالاپتار بىرىزدەندىرىلىپ, تۇسىنىكتى بولادى. ادال ءارى ساپالى قىزمەت كورسەتەتىن ۇيىمدار ءۇشىن جاعداي جەڭىلدەيدى. ولار كورسەتىلگەن قىزمەت ءۇشىن تولەمدەردى ۋاقىتىلى الادى. ال تالاپتاردىڭ ساقتالماۋى اۆتوماتتى تۇردە انىقتالىپ, ءتيىستى شارالار قابىلدانادى. بۇل جۇيەدە جاۋاپكەرشىلىكتى ارتتىرىپ, ءادىل باسەكەلەستىكتى قالىپتاستىرۋعا ىقپال ەتەدى.
جۇيەدەگى وزگەرىستەر ەڭ الدىمەن ازاماتتارعا باعىتتالعان. پاتسيەنتتەر كورسەتىلگەن مەديتسينالىق قىزمەتتى QR-كود ارقىلى راستاۋ مۇمكىندىگىنە يە بولادى. بۇل كورسەتىلمەگەن قىزمەت ءۇشىن تولەم جاساۋعا جول بەرمەيدى. سونىمەن قاتار ءار ازامات جەكە كابينەتى ارقىلى وزىنە كورسەتىلگەن قىزمەتتەر تۋرالى جانە سول ءۇشىن تولەنگەن قاراجات كولەمى جونىندە تولىق اقپارات الا الادى. بۇل اشىقتىقتى كۇشەيتىپ, جۇيەگە دەگەن سەنىمدى ارتتىرۋعا نەگىز بولادى.
بۇدان بولەك, «حالىقتىق باقىلاۋ» تەتىكتەرىن ەنگىزۋ دە جوسپارلانىپ وتىر. وسى باعىتتا eGov Mobile قوسىمشاسىندا ارنايى سەرۆيستەردى ىسكە قوسۋ جۇمىستارى جۇرگىزىلىپ جاتىر. بۇل ازاماتتاردىڭ جۇيەدەگى پروتسەستەرگە قاتىسۋ مۇمكىندىگىن كەڭەيتىپ, كەرى بايلانىستى جەدەلدەتەدى.
Qalqan پلاتفورماسىن ەنگىزۋدىڭ تاعى ءبىر ماڭىزدى قىرى – ونىڭ قولدانىستاعى مەملەكەتتىك تسيفرلىق ينفراقۇرىلىم نەگىزىندە جۇزەگە اسىرىلۋى. بۇل قوسىمشا بيۋدجەت شىعىندارىن تالاپ ەتپەيدى. سونىمەن قاتار دەرەكتەر قاۋىپسىزدىگى جاعىنا دا ەرەكشە ءمان بەرىلگەن. پلاتفورما قورعالعان بايلانىس ارنالارى ارقىلى عانا قىزمەت كورسەتەدى.
«جوبا كەزەڭ-كەزەڭىمەن جۇزەگە اسىرىلىپ جاتىر. العاشقى كەزەڭدە مەديتسينالىق ۇيىمداردىڭ بىرىڭعاي ەلەكتروندىق دەرەكقورى قالىپتاستىرىلدى. سونداي-اق دەنساۋلىق ساقتاۋ سالاسىنداعى نەگىزگى اقپاراتتىق جۇيەلەرمەن ينتەگراتسيا قامتاماسىز ەتىلدى. الداعى ۋاقىتتا مەديتسينالىق ۇيىمداردى ساناتتارعا ءبولۋ, قارجىلاندىرۋ تاسىلدەرىن سارالاۋ جانە تالداۋ مەن بولجاۋ قۇرالدارىن ەنگىزۋ جوسپارلانىپ وتىر. بۇل جۇمىستاردى 2026 جىلدىڭ سوڭىنا دەيىن اياقتاۋ كوزدەلگەن», دەدى گاۋحار جانايداروۆا.
جالپى العاندا, Qalqan پلاتفورماسى ءمامس جۇيەسىندەگى قارجىلاندىرۋ ءتاسىلىن جاڭا دەڭگەيگە كوتەرۋگە باعىتتالعان. باقىلاۋدىڭ الدىن الا كەزەڭگە كوشۋى, شەشىمدەردىڭ ناقتى دەرەكتەرگە نەگىزدەلۋى جانە قارجىلىق ۇدەرىستەردىڭ بىرىزدەنۋى جۇيەنىڭ تيىمدىلىگىن ارتتىرۋعا ىقپال ەتەدى.
بۇل باستاما دەنساۋلىق ساقتاۋ سالاسىنداعى اشىقتىقتى كۇشەيتىپ قانا قويماي, ازاماتتاردىڭ ساپالى مەديتسينالىق كومەككە قولجەتىمدىلىگىن ارتتىرۋعا دا قىزمەت ەتەدى.
