فوتو: اقوردا
قاسىم-جومارت توقاەۆ مارتەبەلى مەيمانعا ءىلتيپات ءبىلدىرىپ, قىتاي حالىق رەسپۋبليكاسى گونكونگ ارناۋلى اكىمشىلىك اۋدانى اكىمشىلىگىنىڭ باسشىسى قازاقستانعا العاش رەت كەلىپ وتىرعاندىقتان بۇل ساپاردىڭ ماڭىزى ايرىقشا ەكەنىن ايتتى.
«بۇل ۋاقيعا قازاقستان مەن گونكونگ, كەڭىنەن الىپ قاراعاندا, ماڭگى جان-جاقتى ستراتەگيالىق سەرىكتەستىك بايلانىستىراتىن قازاقستان مەن قىتاي اراسىنداعى ىنتىماقتاستىقتى دامىتۋعا تىڭ سەرپىن بەرەتىنى ءسوزسىز. ەلدەرىمىزدىڭ اراسىندا جوعارى دەڭگەيدەگى ساياسي ديالوگ ورناعان, ساۋدا-ەكونوميكالىق جانە ينۆەستيتسيالىق ىقپالداستىق قارقىندى دامىپ كەلەدى. گونكونگپەن قارىم-قاتىناسىمىز تۋرالى دا ءدال وسىلاي ايتۋعا بولادى», دەدى قاسىم-جومارت توقاەۆ.
مەملەكەت باسشىسى ينۆەستيتسيا, يننوۆاتسيا, تەحنولوگيا جانە حالىقارالىق ساۋدا سالالارىندا الەۋەتى زور گونكونگ الەمدە جەتەكشى قارجى جانە ىسكەرلىك ورتالىقتاردىڭ ءبىرى رەتىندە ەرەكشە ءرول اتقاراتىنىن اتاپ ءوتتى. پرەزيدەنت بۇل ساپار ءوزارا ءتيىمدى ىنتىماقتاستىقتى نىعايتۋعا, ىسكەرلىك قارىم-قاتىناستى كەڭەيتۋگە جانە ينۆەستيتسيا, قارجى, تسيفرلاندىرۋ, جاساندى ينتەللەكت, كولىك-لوگيستيكا باعىتتارىندا بىرلەسكەن پەرسپەكتيۆتى جوبالاردى جۇزەگە اسىرۋعا جول اشاتىنىنا سەنىمدى ەكەنىن جەتكىزدى.
سونداي-اق قاسىم-جومارت توقاەۆ قازاقستانعا سالماقتى بيزنەس-دەلەگاتسيامەن بىرگە كەلگەنى ءۇشىن مارتەبەلى مەيمانعا ريزاشىلىعىن ءبىلدىردى. بۇل گونكونگ ىسكەرلىك قاۋىمداستىعىنىڭ ەلىمىزبەن ىنتىماقتاستىقتى ارتتىرۋعا ۇلكەن قىزىعۋشىلىق تانىتىپ وتىرعانىن بايقاتادى.
دجون لي قوناقجايلىق كورسەتكەنى ءۇشىن پرەزيدەنتكە العىس ايتىپ, گونكونگتىڭ قازاقستانمەن كەشەندى ىقپالداستىقتى ودان ءارى تەرەڭدەتۋگە دايىن ەكەنىن راستادى.
«اتالعان ساپارعا ەرەكشە ءمان بەرەمىن. مەنىمەن شەتەلگە شىققان دەلەگاتسيالاردىڭ ەڭ اۋقىمدىسى وسى بولدى. ونىڭ قۇرامىنا لوگيستيكا, «جاسىل» ەنەرگەتيكا, تاۋ-كەن ونەركاسىبى, يننوۆاتسيا مەن تەحنولوگيا جانە ءبىلىم بەرۋ سياقتى باستى سالالاردا ەڭبەك ەتەتىن 75 رەسمي تۇلعا مەن كاسىپكەر ەندى», دەدى دجون لي.
گونكونگ اكىمشىلىگىنىڭ باسشىسى قحر توراعاسى سي ءتسزينپيننىڭ قازاقستاندا كوتەرىلگەن ء«بىر بەلدەۋ, ءبىر جول» باستاماسى ەكى ەل اراسىنداعى بەرىك ءارى دوستىق بايلانىستاردىڭ جارقىن كورىنىسىنە اينالعانىنا توقتالدى.
ونىڭ ايتۋىنشا, قىتاي حالىق رەسپۋبليكاسىنىڭ ارناۋلى اكىمشىلىك اۋدانى سانالاتىن گونكونگ اتالعان باستامانى ىلگەرىلەتۋگە بەلسەندى تۇردە اتسالىسىپ كەلەدى. سونىمەن قاتار بۇل قالا وڭىرارالىق بايلانىستاردىڭ كەڭەيۋىنەن مول تابىسقا كەنەلمەك.
قاسىم-جومارت توقاەۆ پەن دجون لي ەكىجاقتى كۇن تارتىبىندەگى بىرقاتار ناقتى ماسەلەنى تالقىلاپ, ساۋدا-ەكونوميكالىق ىنتىماقتاستىقتى ودان ءارى جانداندىرۋعا ءوزارا مۇددەلى ەكەنىن راستادى.
ەسكە سالا كەتەيىك, پرەزيدەنت بۇگىن ەل تۇرعىندارىن حالىقارالىق بالالاردى قورعاۋ كۇنىمەن قۇتتىقتادى.
