مينيسترلىك: بەس ايدا مەملەكەتتىك بيۋدجەت كىرىسى جوسپاردان اسىپ ءتۇستى

مينيسترلىكتىڭ دەرەگىنە سۇيەنسەك, جوسپار بويىنشا 7,34 ترلن تەڭگە كوزدەلگەنىمەن ناقتى تۇسىمدەر 7,41 ترلن تەڭگەگە جەتكەن. بۇل جوسپارلانعان مەجەدەن 66,7 ملرد تەڭگەگە جوعارى ەكەنىن ايعاقتايدى. وسىلايشا رەسپۋبليكالىق بيۋدجەت كىرىسىنىڭ وسىم قارقىنى بىلتىرعا قاراعاندا 25,1% نەمەسە 1,48 ترلن تەڭگەگە ارتىپ وتىر.

سونىڭ ەسەبىنەن جەرگىلىكتى بيۋدجەتتەردىڭ كىرىسى 4,05 ترلن تەڭگەگە ۇلعايعان.

«رەسپۋبليكالىق بيۋدجەتتىڭ ترانسفەرتتەرسىز  كىرىستەر قۇرىلىمىندا 97,7% سالىق تۇسىمدەرىنە تيەسىلى. سوعان سايكەس جوسپار 5% ارتىعىمەن ورىندالىپ, ءوسىم 30,6% اسا ۇلعايتىلدى. ايتارلىقتاي وسىم قوسىلعان قۇن سالىعى, كورپوراتيۆتى تابىس سالىعى, پايدالى قازبالاردى ءوندىرۋ سالىعى جانە شيكى مۇنايعا ەكسپورتتىق كەدەندىك باج ەسەبىنەن قامتاماسىز ەتىلدى. الەمدىك شيكىزات نارىقتارىنداعى قولايلى باعا كونيۋنكتۋراسى, ەكونوميكانىڭ ءوسىمى, ىسكەرلىك بەلسەندىلىك پەن سالىق رەفورماسى كىرىستەردىڭ ارتۋىنا نەگىزگى فاكتور بولدى» دەلىنگەن مينيسترلىك حابارلاماسىندا.

ۆەدومستۆو مالىمەتىنشە, بۇل ازاماتتاردىڭ ءومىر ءسۇرۋ ساپاسىن ارتتىرۋعا باعىتتالعان ينفراقۇرىلىمدىق جوبالاردى ىسكە اسىرۋعا مۇمكىندىك بەرەدى.

قازاقستاننىڭ دەپوزيتتەرگە كەپىلدىك بەرۋ قورى: تەڭگەلىك دەپوزيتتەر تابىس تابۋدىڭ قۇرالىنا اينالدى

اتاپ ايتقاندا نەگىزگى باسىمدىقتارىنىڭ قاتارىندا اۆتوموبيل جولدارىن سالۋ مەن جاڭعىرتۋ, ينجەنەرلىك جانە كوممۋنالدىق ينفراقۇرىلىمدى جەتىلدىرۋ, سونداي-اق ەنەرگەتيكا, سۋمەن جابدىقتاۋ جانە تسيفرلاندىرۋ سالالارىنداعى جوبالاردى جۇزەگە اسىرۋ مىندەتتەرى بار.

ەسكە سالا كەتەيىك, مامىر ايىندا قازاقستاندا دەپوزيت مولشەرلەمەلەرى 20,5%-عا دەيىن وسكەن ەدى.