فوتو: instagram.com/adiletkhan
ءىس بويىنشا الماتى قالالىق پوليتسيا دەپارتامەنتى باسشىسىنىڭ بۇرىنعى ورىنباسارى ەرجان ۇزاباەۆ جانە اكىمشىلىك پوليتسيا باسقارماسىنىڭ باسشىسى سەرىك شۇماەۆ جابىرلەنۋشى رەتىندە تانىلعان. سوت بارىسىندا ەرجان ۇزاباەۆتىڭ ادۆوكاتى ايىپتالۋشىدان مورالدىق شىعىن رەتىندە 10 ميلليون تەڭگە جانە سوت شىعىندارىن وتەۋ ءۇشىن تاعى 1 ميلليون تەڭگە ءوندىرىپ بەرۋدى سۇرادى.
«سوتتالۋشى قىلمىستىق قۇقىق بۇزۋشىلىق جاساعانىن تولىق مويىندادى. وسىعان بايلانىستى ءىستى قىسقارتىلعان تارتىپپەن قاراۋ تۋرالى ءوتىنىش بەرىلدى. ءبىز وعان قارسىلىق بىلدىرمەي, بۇل ماسەلەنى سوتتىڭ قاراۋىنا قالدىردىق. مەدياتسيا ماسەلەسىنە كەلسەك, ونىڭ شارتتارى ازىرگە بىزگە بەلگىسىز بولعاندىقتان, بۇل ماسەلە اشىق كۇيىندە قالىپ وتىر. ەگەر تاعىلعان ايىپ دالەلدەنسە, سوتتالۋشىعا ءۇش جىلعا دەيىن باس بوستاندىعىنان ايىرۋ جازاسى نەمەسە 3 000 اەك-كە دەيىنگى مولشەردە ايىپپۇل سالىنۋى مۇمكىن», دەدى ادۆوكات اسىلبەك ءابدىرايىموۆ.
سوتتا سۋديا ەرلان قاسىمبەك بلوگەردى ءوتىنىشى بويىنشا ۇيقاماققا شىعارۋدان باس تارتتى. الايدا تاراپتاردىڭ پروتسەسسۋالدىق كەلىسىم جاساۋ مۇمكىندىگىن قاراستىرۋدى پروكۋراتۋرانىڭ قاراۋىنا جولدادى. ول 16 ماۋسىمعا جوسپارلانعان كەلەسى سوت وتىرىسىندا قارالادى.
ەسكە سالايىق, ادىلەتحان مولداحان ءال-فارابي داڭعىلىندا بولعان رەزونانستى جول-كولىك وقيعاسىنا قاتىستى الەۋمەتتىك جەلىدە پىكىر ءبىلدىرىپ, اپاتقا جوعارى لاۋازىمدى تۇلعالاردىڭ بالالارىنىڭ قاتىسى بولۋى مۇمكىن دەگەن مالىمدەمە جاساعان ەدى. وسىدان كەيىن وعان قاتىستى قىلمىستىق ءىس قوزعالدى.
سونىمەن قاتار, بۇگىن اتىشۋلى جول اپاتىنا قاتىستى سوت وتىرىسىندا قازا تاپقان ەكى مارقۇمنىڭ تۋىستارى كىنالى الەكساندر پاكقا كەشىرىم بەردى.
