اتاۋلى الەۋمەتتىك كومەك (ااك) جان باسىنا شاققانداعى ورتاشا كىرىسى كەدەيلىك شەگىنەن اسپايتىن ەل ازاماتتارىنا, ەلدە تۇراقتى تۇراتىن قانداستارعا, بوسقىندارعا, شەتەلدىكتەرگە, ازاماتتىعى جوق ادامدارعا بەرىلەدى. وسى توپتاعى ازاماتتار اتالعان كومەكتى تالاپ ەتە الادى. نەگىزى ااك شارتتى اقشالاي, شارتسىز اقشالاي كومەك تۇرىندە تاعايىندالادى. ونىڭ ىشىندە شارتتى اقشالاي كومەك جالعىزباستى نەمەسە جالعىز تۇراتىن از قامتىلعان ەڭبەككە قابىلەتتى ازاماتتارعا, قۇرامىندا ەڭبەككە قابىلەتتى مۇشەلەرى بار از قامتىلعان وتباسىلارعا جۇمىسپەن قامتۋعا جاردەمدەسۋ شارالارىنا قاتىسۋ شارتىمەن تاعايىندالادى. بۇل كومەكتى تاعايىنداۋدىڭ مىندەتتى بولىگى – كومەك الۋشى مەن مانساپ ورتالىعى اراسىندا الەۋمەتتىك كەلىسىمشارت جاساسۋ. ويتكەنى كومەكتىڭ نەگىزگى ماقساتى – قۇرامىندا ەڭبەككە قابىلەتتى مۇشەلەرى بار وتباسىلارعا تەك اقشالاي كومەك جاساپ قانا قويماي, ولاردى جۇمىسقا ورنالاستىرىپ, تابىسىن ارتتىرۋ ارقىلى كەدەيلىك شەگىنەن شىعارۋ.
شارتسىز اقشالاي كومەك وتباسى قۇرامىندا ەڭبەككە قابىلەتتى مۇشەلەرى بولماسا نەمەسە جالعىز ەڭبەككە قابىلەتتى مۇشەسى بەلگىلى سەبەپپەن جۇمىسپەن قامتۋ شارالارىنا قاتىسا الماعان جاعدايدا بەرىلەدى. اتاپ ايتقاندا, جالعىزباستى نەمەسە جالعىز تۇراتىن از قامتىلعان ازاماتتارعا, ەگەر ولار زەينەت جاسىندا بولسا, ءبىرىنشى نەمەسە ەكىنشى توپتاعى مۇگەدەكتىگى بولسا, ەكى ايدان استام ۋاقىتشا ەڭبەككە جارامسىزدىققا اكەلۋى مۇمكىن اۋرۋلارى بولعان جاعدايدا تاعايىندالادى. قۇرامىندا ەڭبەككە قابىلەتتى ادام جوق نەمەسە ءۇش جاسقا دەيىنگى بالاسى بار جالعىز ەڭبەككە قابىلەتتى ادامعا, مۇگەدەكتىگى بار بالاعا, ءبىرىنشى نەمەسە ەكىنشى توپتاعى مۇگەدەكتىگى بار ادامعا, بوگدە كۇتىم مەن كومەكتى قاجەت ەتەتىن قارت ادامعا كۇتىم جاسايتىن از قامتىلعان وتباسىلارعا دا وسى كومەك كورسەتىلەدى. دەمەك شارتسىز اقشالاي كومەكتىڭ ماقساتى – تابىس تابۋعا مۇمكىندىگى شەكتەۋلى ازاماتتاردى الەۋمەتتىك تۇرعىدا قولداۋ, كىرىستەرىن كەدەيلىك شەگىنە دەيىن جەتكىزۋ.
جالپى, ااك تاعايىنداۋدىڭ شارتتارى كەدەيلىك شەگىنە بايلانىستى بەلگىلەنەدى. ونىڭ مولشەرى وڭىرلىك مەدياندىق تابىستىڭ 35%-نا تەڭ, بىراق وڭىرلىك ەڭ تومەن كۇنكورىس دەڭگەيىنىڭ 70%-نان تومەن بولماۋعا ءتيىس. وتباسىنىڭ ءاربىر مۇشەسىنە ااك مولشەرى وتباسىنىڭ جان باسىنا شاققانداعى ورتاشا تابىسى مەن وڭىرلىك كەدەيلىك شەگىنىڭ شاماسى اراسىندا ايقىندالادى. ەگەر وتباسىنىڭ جان باسىنا شاققانداعى ورتاشا كىرىسى وسى كورسەتكىشتەن تومەن بولسا, ايىرماسى ااك مولشەرىن قۇرايدى. بىلتىر 54,4 مىڭ وتباسى ااك الدى. ااك الۋعا ءوتىنىشتى ەل ازاماتتارى «ەلەكتروندىق ۇكىمەت» ۆەب-پورتالى, ەكىنشى دەڭگەيدەگى بانكتەردىڭ ءموبيلدى قوسىمشاسى ارقىلى بەرە الادى. وعان مۇمكىندىك بولماسا, تۇرعىلىقتى جەرىندەگى مانساپ ورتالىعىنا, ول بولماعان جاعدايدا كەنت, اۋىل, اۋىلدىق وكرۋگ اكىمىنە جۇگىنە الادى.
دايىنداعان –
ساندىبەك ءاسانالى,
«Egemen Qazaqstan»
