وقۋ-اعارتۋ مينيسترلىگى جاساندى ينتەللەكت جانە تسيفرلىق دامۋ مينيسترلىگىمەن, سونداي-اق وزگە دە مۇددەلى مەملەكەتتىك ورگاندارمەن جانە جەرگىلىكتى اتقارۋشى ورگاندارمەن بىرلەسىپ, 2026-2029 جىلدارعا ارنالعان كەشەندى ءىس-شارالار جوسپارىن ىسكە اسىرۋدى قامتاماسىز ەتەدى. اتالعان جوسپار مەكتەپتەردىڭ تسيفرلىق ينفراقۇرىلىمىن دامىتۋدى, وقۋشىلاردىڭ ناقتى قاجەتتىلىگىنە بەيىمدەلگەن وقىتۋ تەتىكتەرىن ەنگىزۋدى, پەداگوگ كادرلاردى دايارلاۋ مەن ء بىلىم الۋشىلاردىڭ دەربەس دەرەكتەرىن قورعاۋ جانە اقپاراتتىق قاۋىپسىزدىكتى قامتاماسىز ەتۋ شارالارىن كۇشەيتۋدى كوزدەيدى.
جارلىقتا شاعىن جيناقتى اۋىل مەكتەپتەرىن قولداۋعا ەرەكشە ءمان بەرىلگەن. مەملەكەت باسشىسىنىڭ تاپسىرمالارىن ورىنداۋ ماقساتىندا مەكتەپتەردى زاماناۋي تەحنيكالىق قۇرالدارمەن جانە ساپالى تسيفرلىق ءبىلىم بەرۋ رەسۋرسىمەن قامتاماسىز ەتۋ قاراستىرىلعان. باستاپقى كەزەڭدە پيلوتتىق جوبا اياسىندا ءتيىمدى شەشىمدەردى كەزەڭ-كەزەڭىمەن ەنگىزە وتىرىپ, ەلىمىزدەگى 2600-دەن استام شاعىن جيناقتى مەكتەپتىڭ شامامەن 500-ءىن قامتۋ جوسپارلاندى.
بۇعان قوسا پەداگوگتەردىڭ بىلىكتىلىگىن ارتتىرۋ مەن تسيفرلىق قۇزىرەتتەرىن دامىتۋعا ەرەكشە نازار اۋدارىلادى. بۇل رەتتە جاساندى ينتەللەكت تەحنولوگيالارىن قولدانۋ پەداگوگتى الماستىرۋدى كوزدەمەيدى, كەرىسىنشە پەداگوگتىڭ كاسىبي ءرولىن كۇشەيتۋگە, اكىمشىلىك جۇكتەمەنى ازايتۋعا جانە وقۋشىلارمەن جەكە جۇمىستى كەڭەيتۋگە باعىتتالعان قوسىمشا قۇرال رەتىندە قاراستىرىلادى.
جايىق شاراباسوۆ,
وقۋ-اعارتۋ ۆيتسە-ءمينيسترى
