«جىل سايىن رەسەي فەدەراتسياسىنىڭ ۇكىمەتى مەن قازاقستان رەسپۋبليكاسىنىڭ ۇكىمەتى اراسىنداعى ترانسشەكارالىق سۋ وبەكتىلەرىن بىرلەسىپ پايدالانۋ جانە قورعاۋ تۋرالى كەلىسىمنىڭ نەگىزىندە حالىقتى سۋمەن قامتاماسىز ەتۋدى جاقسارتۋ جانە مەجەلى كەزەڭدە قالىپتى ەكولوگيالىق جاعدايدى ساقتاۋ ماقساتىندا رەسپۋبليكالىق بيۋدجەتتەن ەدىل سۋىن ماشينامەن بەرۋ شىعىندارىن وتەۋگە قاراجات بولىنەدى. 2015 جىلدان باستاپ قازاقستان رەسپۋبليكاسى مەن رەسەي فەدەراتسياسى اراسىندا ۇلكەن جانە كىشى وزەندەرىنە تاستالاتىن سۋ كولەمى كەستەگە سايكەس 107 ملن تەكشە مەتر بولىپ بەكىتىلدى», دەپ اتاپ وتەدى ۇكىمەت باسشىسى.
ونىڭ ايتۋىنشا, 2020 جىلى سۋدىڭ ازدىعىنا جانە سۋدىڭ جەتىسپەۋشىلىگىنە بايلانىستى ۇلكەن جانە كىشى وزەندەرىندەگى سۋ كولەمىنىڭ تاپشىلىعىن تولتىرۋ ءۇشىن 35 ملن تەكشە مەتر ەدىل سۋىن ساتىپ الۋ قاجەتتىگى تۋىنداپ, وسى ماسەلەنى شەشۋگە قوسىمشا 993,1 ملن تەڭگە ءبولىندى.
«قازىرگى ۋاقىتتا رەسەي فەدەراتسياسىنان ەدىل سۋىن ماشينالىق ادىسپەن باتىس قازاقستان وبلىسىنا بەرۋ ءۇشىن 3,5 ملرد تەڭگە سوماسىندا قوسىمشا قارجى قاراجاتىن ءبولۋ تۋرالى بيۋدجەتتىك ءوتىنىم قالىپتاستىرىلدى. جوعارىدا باياندالعاننىڭ نەگىزىندە سۋ جىبەرۋ كولەمىن 3,5 ملرد تەڭگە سوماسىنا 131 ملن تەكشە مەترگە ۇلعايتۋ ماسەلەسى بيۋدجەتتىڭ مۇمكىندىكتەرىن ەسكەرە وتىرىپ, 2021 جىلعا ارنالعان رەسپۋبليكالىق بيۋدجەتتى ءبىرىنشى ناقتىلاۋ كەزىندە قاراستىرىلاتىن بولادى», دەدى اسقار مامين.
