سەنات دەپۋتتتارى ونەركاسىپتىك قاۋىپسىزدىك, يندۋستريالىق ايماقتار, جانۋارلار الەمى, ەرەكشە قورعالاتىن تابيعي اۋماقتار, ەنەرگەتيكا, تابيعي مونوپوليالار جانە ىشكى ىستەر ورگاندارىنىڭ قىزمەتكەرلەرىنە تۇرعىن ءۇي تولەمدەرىن بەرۋ تۋرالى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ماجىلىسكە جولدادى. وسى قۇجاتتا مەملەكەتتىك ينسپەكتورلارعا قاۋىپسىزدىك ەرەجەسىن ورەسكەل بۇزعان كاسىپورىنداردىڭ قىزمەتىن توقتاتۋ قۇقىعىن بەرۋ تۋرالى نورما قاراستىرىلعان.
ناقتىراق ايتساق, زاڭ جوباسىندا ازاماتتىق قورعانىس تۋرالى زاڭنىڭ 39-بابىنىڭ 4-تارماعىنا جاڭا نورما ەنگىزىلمەك. بۇل نورما بويىنشا ونەركاسىپتىك قاۋىپسىزدىك سالاسىنداعى مەملەكەتتىك قاداعالاۋشى ينسپەكتور ادامداردىڭ ءومىرى مەن دەنساۋلىعىنا قاۋىپ تونگەن شەتىن جاعدايلاردا سوت شەشىمىنسىز قاۋىپتى ءوندىرىس نىسانىن, تەحنيكالىق قۇرىلعىلاردى پايدالاناتىن جەكە كاسىپكەرلەر مەن ۇيىمداردىڭ جۇمىسىن 3 كۇننەن اسپايتىن مەرزىمگە ۋاقىتشا توقتاتۋعا نەمەسە جابۋعا قۇقىلى. بىراق ءىستى وسى ۋاقىت ىشىندە سوتقا جولداۋعا مىندەتتى. توتەنشە جاعدايلار ءمينيسترى يۋري يلين وسى نورمانىڭ ناقتى قالاي ورىندالاتىنىن ءتۇسىندىردى.
«بۇل جەردە جەمقورلىق تاۋەكەلدەرىن بولدىرماس ءۇشىن ءوندىرىستى توقتاتۋ نەمەسە جابۋ تۋرالى شەشىم قابىلداي الاتىن ينسپەكتورلىق قۇرامنىڭ وكىلەتىن جىلىكتەپ كورەستتىك. قانداي جاعداي بولسا دا, ينسپەكتور 3 كۇن ىشىندە ءارى قاراي شەشىم قابىلداۋ ءۇشىن ماتەريالدى سوتقا وتكىزۋ كەرەك. كاسىپورىننىڭ جۇمىسىن توقتاتۋعا نەمەسە تولىق جابۋعا ادامداردىڭ ءومىرى مەن دەنساۋلىعىنا تىكەلەي قاۋىپ تونگەنى سەبەپ بولادى. بۇل جەردە كاسىپورىن قىزمەتكەرلەرىنە دە, ءۇشىنشى تۇلعالارعا دا قاۋىپ تونبەۋى كەرەك. سول ءۇشىن «ۋاقىتشا جابۋ», «ۋاقىتشا قىزمەتىن توقتاتۋ», «توتەنشە جاعدايدىڭ تاۋەكەلىن جويۋ مۇمكىندىگى» دەگەن ۇعىمدار قولدانىسقا ەنەدى. قاۋىپتى جويۋ مۇمكىن بولماعان جاعدايدا كاسىپورىننىڭ قىزمەتىنە تولىق تىيىم سالىنادى», دەدى مينيستر.
زاڭ جوباسىن داۋىسقا سالعان دەپۋتتار قۇجاتقا بىرنەشە تۇزەتۋ ەنگىزىپ, ماجىلىسكە جىبەرۋ تۋرالى شەشىم قابىلدادى.
