ەندى مىنە, سول ۇندەۋدىڭ ءىزى سۋىماي جاتىپ, ۇلتتىق كينونى قولداۋ مەملەكەتتىك ورتالىعىنان التىن وردا تاريحىنا ارنالعان ءىرى كينوجوبانىڭ تۇجىرىمداماسى ازىرلەنىپ جاتقانىن حابارلاعان اقپارات ءتۇستى. «كينو ورتالىعىنىڭ جانىنان ارنايى جۇمىس توبى قۇرىلدى. ول ەل باسشىلىعىنا بولاشاق كينوجوبانىڭ نەگىزگى كورىنىسى, مودەلى مەن ارحيتەكتۋراسى بويىنشا ۇسىنىس بەرەدى. دايىندىقتىڭ ءبىرىنشى كەزەڭىندە كاسىبي تاريحشىلار مەن تاجىريبەلى كينودراماتۋرگ, ەتنوگرافتار مەن ادەبيەتتانۋشىلاردان اقپارات جينالادى. سونىمەن قاتار ۇلكەن حالىقارالىق تاريحي كينوجوبالاردى جاساۋ بويىنشا تابىستى تاجىريبەسى بار گولليۆۋد, ەۋروپا, رەسەي جانە ازيانىڭ ۇزدىك وندىرىستىك كومپانيالارى اراسىنان جاھاندىق سەرىكتەستەر مەن ينۆەستورلاردى ىزدەۋ جۇرگىزىلۋدە», دەلىنگەن ورتالىقتىڭ ءباسپاسوز حابارلاماسىندا.
ۇلتتىق كينونى قولداۋ ورتالىعىنىڭ باسقارما توراعاسى ەسەتجان قوسۋباەۆتىڭ ايتۋىنشا, ورتالىق جۋىردا ەكى گولليۆۋدتىق كومپانيامەن بەينەبايلانىس ارقىلى كونفەرەنتسيا وتكىزگەن. جاقىن ارادا ازيالىق ارىپتەستەرمەن كەزدەسۋ وتكىزۋ جوسپارلانۋدا. ورتالىق باسشىسى ءوندىرىستىڭ قارجىلىق مودەلىن پىسىقتاۋعا باسا نازار اۋدارۋ كەرەكتىگىن ايتادى.
ء«بىز «كوشپەندىلەر» اتتى تاريحي بلوكباستەردى ساتۋ جانە جالعا بەرۋ بويىنشا جاعىمسىز تاجىريبەنى ەسكەرە وتىرىپ, وتكەن قاتەلەردى قايتالاماس ءۇشىن, جوبانىڭ بارلىق بولشەكتەرىن پىسىقتاۋدى, ۇلكەن جاۋاپكەرشىلىكپەن قاراپ, كەزەڭ-كەزەڭىمەن ىسكە اسىرۋدى مىندەتىمىزگە الامىز. ءبىرىنشى كەزەكتە ىشكى رەسۋرستاردىڭ ولشەمى الىنادى – قازاقستاندىق كينەماتوگرافيستەردىڭ قايسىسى ادەبي كونتەنتتى قالىپتاستىرۋعا دايىن. تۇسىرىلەتىن كينونىڭ تاريحي كەزەڭى ءىس جۇزىندە ايقىن بولعاندىقتان, ءبىز سينوپسيس پەن ودان كەيىنگى ستسەناريدى بارىنشا شىنايى ءارى تەرەڭ ادەبي-تاريحي تالداۋ نەگىزىندە جازۋعا كىرىسۋىمىز كەرەك. بۇل پروتسەسس جەدەل, بىراق سونىمەن بىرگە وتە مۇقيات جۇرگىزىلەدى دەپ ايتا الامىن. وسى ماڭىزدى جوبامەن جۇمىس ىستەۋدە ۇلتتىق كينونى قولداۋ مەملەكەتتىك ورتالىعى تاريحي, مادەني, تاربيەلىك جانە ەڭ باستىسى كاسىبي ءادىسنامانى ازىرلەۋ جونىندەگى باستى ۇيلەستىرۋشى بولۋى ءتيىس», دەيدى ە.قوسۋباەۆ.
ۇلتتىق كينونى قولداۋ مەملەكەتتىك ورتالىعى الداعى ۋاقىتتا حالىقتى جوبانىڭ جۇمىس بارىسى مەن ودان ءارى ىسكە اسىرۋ جونىندە قابىلدانعان شەشىمدەر تۋرالى حاباردار ەتىپ وتىرماق.
