سەزد جۇمىسىنا ەلىمىزدىڭ بارلىق وڭىرىنەن كەلگەن دەلەگاتتار, ساياسي كەڭەس مۇشەلەرى, پارلامەنت دەپۋتاتتارى, «جاستار رۋحى» جاستار قاناتىنىڭ بەلسەندىلەرى قاتىستى. جالپى سانى 1 500-دەن اسا ادام باس قوستى.
ءوز سوزىندە ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ پرەزيدەنت قاسىم-جومارت توقاەۆتىڭ تابىستى جۇزەگە اسىرىلىپ جاتقان رەفورمالارى بۇگىندە جاڭا قوعامنىڭ ىرگەتاسى مەن مەملەكەتتىڭ جاڭا كەلبەتىن قالىپتاستىرىپ جاتقانىن اتاپ ءوتتى. ونىڭ ايتۋىنشا, قازىرگى تاڭدا تاۋەلسىزدىكتى نىعايتۋ, حالىقتىڭ ءال-اۋقاتى مەن بىرلىگى, ۇلت تۇتاستىعى سەكىلدى باستى قۇندىلىقتار الدىڭعى قاتارعا شىقتى. مەملەكەت باسشىسىنىڭ باتىل شەشىمدەرى ارقىلى بيلىكتىڭ بارلىق ينستيتۋتى تۇبەگەيلى جاڭعىرىپ, ساياسي باسەكەلەستىك كۇشەيدى, ال قوعام ناقتى شەشىمدەر قابىلداۋ ۇدەرىسىنە ىقپال ەتەتىن سەنىمدى داۋىسقا يە بولدى.
ءماجىلىس توراعاسى بۇل ۇدەرىستەردىڭ شارىقتاۋ شەگى ءارى پرەزيدەنت قاسىم-جومارت توقاەۆ ۇستانعان ساياساتتىڭ شىنايى جەڭىسى رەتىندە جالپىۇلتتىق رەفەرەندۋمدا وتانداستارىمىزدىڭ باسىم كوپشىلىگى قولداعان جاڭا كونستيتۋتسيانىڭ قابىلدانۋىن اتادى. بۇگىندە ەلىمىز جاڭا تاريحي داۋىرگە قادام باستى. ونىڭ نەگىزىندە ادام, ادىلدىك, زاڭ جانە پروگرەسس قاعيداتتارى جاتىر.
«قازىر ءبىز ۋاقىت تالابىنا, مەملەكەت مۇددەسىنە جانە قوعام سۇرانىسىنا ساي كەلەتىن قادام جاساۋىمىز كەرەك. بۇگىندە ەلىمىز بولىنۋگە ەمەس, بىرىگۋگە ۇمتىلۋى قاجەت. سوندىقتان وسى جاۋاپتى كەزەڭدە ءوز رەسۋرستارىمىزدى جاڭا ساياسي كۇش – «ادىلەت» پارتياسىنا قوسۋىمىز كەرەك. وسىلايشا, ءبىرتۇتاس پرەزيدەنتتىك باعىتتاعى ساياسي كۇش قۇرامىندا ادىلەتتى ءارى پروگرەسسيۆتى قازاقستاندى بىرگە قۇرۋدى جالعاستىرامىز. ءبىز ءوز قاعيداتتارىمىزدان, ۇستانىمدارىمىزدان جانە يدەيالارىمىزدان باس تارتپايمىز. كەرىسىنشە, ولاردى ودان ءارى كۇشەيتىپ, مۇمكىندىكتەرىن كەڭەيتىپ, جاڭا دامۋ دەڭگەيىنە كوتەرەمىز», دەدى ە.قوشانوۆ.
«Amanat» توراعاسى بۇل شەشىمدى پارتيانىڭ بارلىق دەڭگەيدەگى مۇشەلەرى قولداعان تابيعي ءارى كەمەل ساياسي ۇدەرىس دەپ اتادى.
«امانات – بابالار اماناتى ءارى بولاشاق ۇرپاق الدىنداعى جاۋاپكەرشىلىك. ادىلەت – قۋاتتى ءارى زاماناۋي مەملەكەتتىڭ نەگىزى سانالاتىن ادىلدىك. وسى قۇندىلىقتاردى بىرىكتىرە وتىرىپ, قوعامدىق بىرلىكتى نىعايتامىز. تۇپتەپ كەلگەندە, ءبارىمىزدىڭ ماقساتىمىز ورتاق – قۋاتتى قازاقستان, گۇلدەنگەن مەملەكەت جانە ءاربىر ازاماتتىڭ ءال-اۋقاتى. ءبىز ءدال وسى ماقسات جولىندا قابىلداپ وتىرعان شەشىمىمىزدى جولدىڭ سوڭى ەمەس, ورتاق تاريحىمىزدىڭ جاڭا تاراۋىنىڭ باستاۋى دەپ بىلەمىز», دەدى ە.قوشانوۆ.
سەزدە مەملەكەت باسشىسىنىڭ ساياسي باعىتىنا قولداۋ كورسەتۋدە پارتيا تاراپىنان اتقارىلعان اۋقىمدى جۇمىس قورىتىندىلاندى.
رەفورمالاردى زاڭنامالىق تۇرعىدان قولداۋ ماسەلەسى تۋرالى ءماجىلىس دەپۋتاتى, «Amanat» پارتياسى پارلامەنتتىك فراكتسياسىنىڭ جەتەكشىسى ايدوس سارىم باياندادى. وسى شاقىرىلىم بارىسىندا باستاماشىلىق ەتىلگەن 118 زاڭ جوباسىنىڭ 104-ءىن «Amanat» فراكتسياسىنىڭ دەپۋتاتتارى ازىرلەدى. بۇل – بارلىق زاڭنامالىق باستامانىڭ 88 پايىزى. اتالعان زاڭ جوبالارى ەل دامۋىنىڭ ەڭ وزەكتى ماسەلەلەرىن شەشۋگە باعىتتالدى. سونىمەن قاتار دەپۋتاتتار كوپتەگەن دەپۋتاتتىق ساۋال جولداپ, جۇزدەگەن مىڭ ازاماتتى قامتىعان مىڭداعان كەزدەسۋ وتكىزدى.
پرەزيدەنت ساياساتىنىڭ نەگىزگى قوزعاۋشى كۇشىنىڭ ءبىرى رەتىندە پارتيا الەۋمەتتىك جوبالار ارقىلى قوعامداعى ەڭ وزەكتى ماسەلەلەردى جۇيەلى تۇردە شەشىپ كەلدى. ماسەلەن, «قارىزسىز قوعام» جوباسى 1,5 ملن ادامنىڭ شامادان تىس قارىز جۇكتەمەسىمەن كۇرەسۋىنە كومەكتەستى. «اۋىل اماناتى» باعدارلاماسى 2,5 پايىز مولشەرلەمەسىمەن ميكرونەسيەلەر بەرۋ ارقىلى اۋىلدىق جەرلەردە ونداعان مىڭ جاڭا جۇمىس ورنىن اشۋعا مۇمكىندىك بەردى. «جەر اماناتى» جوباسى اياسىندا 15 ملن گەكتار جەر مەملەكەت پەن حالىققا قايتارىلدى. «تسيفرلىق قوعام» جوباسى مەملەكەتتىك ورگانداردى, IT-قوعامداستىقتى جانە ەرىكتىلەردى بىرىكتىرىپ, بارلىق وڭىردە تسيفرلىق ساۋاتتى ارتتىرۋعا ىقپال ەتتى. ال «Turgyndar amanaty» تۇرعىندار مەن مەملەكەتتىك ورگاندار اراسىندا تۇرعىن ءۇي-كوممۋنالدىق شارۋاشىلىق سالاسىنداعى ماسەلەلەردى شەشۋگە باعىتتالعان تىكەلەي ديالوگ ورناتتى.
ءۇش جىل ىشىندە «حالىقپەن بىرگە!» سايلاۋالدى باعدارلاماسىنىڭ 70 پا- يىزى ورىندالدى. اتاپ ايتقاندا, 600 جاڭا مەكتەپ سالىندى, مەملەكەتتىك قىزمەتشىلەردىڭ, دارىگەرلەر مەن مادەنيەت سالاسى قىزمەتكەرلەرىنىڭ جالاقىسى كوتەرىلدى, ينسۋلتتىك جانە كارديولوگيالىق ورتالىقتار اشىلدى, تەگىن سكرينينگ باعدارلامالارى ىسكە قوسىلدى. كاسىبي قاۋىمداستىقتارمەن جۇرگىزىلگەن تىكەلەي ديالوگتىڭ ناتيجەسىندە مۇعالىمدەر وزدەرىنە ءتان ەمەس مىندەتتەردەن زاڭنامالىق تۇرعىدان بوساتىلىپ, اۋىلدىق جەرلەرگە جۇمىسقا باراتىن دارىگەرلەر ءۇشىن 10 ملن تەڭگەگە دەيىن كوتەرمە جاردەماقى ەنگىزىلدى.
«Amanat» پارتياسىنىڭ قازىرگى قىزمەتىن قورىتىندىلاۋ اياسىندا دەلەگاتتار الدىندا وڭىرلەردىڭ, ايەلدەر جانە جاستار قاناتتارىنىڭ وكىلدەرى ءسوز سويلەدى.
ايەلدەر قاناتىنىڭ تەڭ توراعاسى, ءماجىلىس دەپۋتاتى ءۇنزيلا شاپاق پارتيانىڭ جاڭا كونستيتۋتسيانى ىلگەرىلەتۋ ىسىنە اتسالىسۋعا جانە مەملەكەتتىك باسقارۋداعى ايەلدەردىڭ ءرولىن كۇشەيتۋگە ەرەكشە نازار اۋداردى. ءماجىلىس دەپۋتاتى نۇرسۇلتان بايتىلەسوۆ پرەزيدەنتتىك جاستار كادر رەزەرۆىنىڭ تيىمدىلىگىن جانە جاس پارلامەنتاريلەردىڭ IT-سالاداعى زاڭ شىعارۋ جۇمىسىنا قوسقان ۇلەسىن اتاپ ءوتتى.
«ونكوورتالىق» بپۇ جەتەكشىسى گۇلميرا ساعيدۋللينا اۋىل تۇرعىندارىنا ارنالعان «Amanat كەرۋەنى» كوشپەلى مەديتسينالىق ەكسپەديتسياسىنىڭ ىسكە قوسىلعانى تۋرالى باياندادى. پاۆلودار وبلىستىق ءماسليحاتىنىڭ توراعاسى يليا تەرەنچەنكو پرەزيدەنت باعىتىن قولدايتىنىن جانە جەرگىلىكتى جەرلەردە كۇش-جىگەردى بىرىكتىرۋدىڭ ماڭىزىن اتاپ ءوتتى. ال ورتالىق باقىلاۋ-تەكسەرۋ كوميسسياسىنىڭ مۇشەسى الىبەك قادىربەكوۆ پارتيانىڭ ىشكى جاڭعىرۋ جۇمىسىن قورىتىندىلاپ, پارتياىشىلىك ۇدەرىستەر تسيفرلاندىرىلعانىن حابارلادى.
سەزد جۇمىسىن قورىتىندىلاي كەلە, دەلەگاتتار «ادىلەت» پارتياسىنا قوسىلۋ تۋرالى ستراتەگيالىق شەشىمدى ءبىراۋىزدان قولداپ داۋىس بەردى. سەزد ماقۇلداعان بۇل باستاما پارتيا قاۋىمى ەلدىڭ جاسامپاز دامۋ باعىتى مەن پرەزيدەنتتىڭ ستراتەگيالىق ساياساتىن قولداۋ ءۇشىن ءبىرتۇتاس ءارى توپتاسقان الاڭ رەتىندە ارەكەت ەتۋگە دايىن ەكەنىن كورسەتتى.
