كلۋبتىڭ برەندكە اينالۋىنا 5 جىل قاجەت
– دارحان ەركىن ۇلى, جاقىندا عانا «Integra Construction kz» كومپانياسى «ورداباسى» كلۋبىنىڭ يەسى اتاندى. نەلىكتەن تاڭداۋ ءدال وسى كلۋبقا ءتۇستى؟
– بىزگە كلۋبتى ەمەس, ءوڭىردى تاڭداۋ ماڭىزدى بولدى. بارلىق فاكتوردى سارالاي كەلە, تاڭداۋ شىمكەنتتىڭ «ورداباسى» كلۋبىنا ءتۇستى. بىرىنشىدەن, مۇندا حالىق كوپ, قارقىندى دامىپ كەلە جاتقان مەگاپوليس. بۇگىندە شامامەن 1,5 ميلليونعا جۋىق تۇرعىنى بار قالا – ۇلكەن جانكۇيەرلىك بازا. ەكىنشىدەن, حالىقتىڭ فۋتبولعا قىزىعۋشىلىعى وتە جوعارى. شىمكەنتتە فۋتبول مادەنيەتى بۇرىننان قالىپتاسقان. شىمقالالىقتار كلۋبقا شىن جانكۇيەر بولا الادى. بۇل – كەز كەلگەن كومانداعا ماڭىزدى فاكتور. ۇشىنشىدەن, ءبىز دايىن ينفراقۇرىلىمعا, كادرلىق الەۋەتكە, ۇيىمداستىرۋ مۇمكىندىكتەرىنە نازار اۋداردىق. وسى تۇرعىدان العاندا شىمكەنتتىڭ الەۋەتى جوعارى.
– بولاشاقتا «ورداباسىنى» قانداي جوبا رەتىندە كورەسىزدەر؟
– ارينە, بىزگە بۇل – تەك كلۋب ەمەس, ۇلكەن جوبا. فۋتبولعا جاي قارجى قۇيۋعا عانا كەلمەگەنىمىز تۇسىنىكتى دەپ ويلايمىن. بۇل – ينۆەستيتسيا. ال كەز كەلگەن ينۆەستيتسيانىڭ قايتارىمى بولۋى كەرەك. سول سەبەپتى كلۋبتىڭ سپورتتىق كورسەتكىشتەرى عانا ەمەس, كوممەرتسيالىق دامۋى دا ماڭىزدى. كلۋبتىڭ برەندكە اينالۋىنا, جانكۇيەرلەردىڭ ەموتسيا الۋىنا, بالالار وسى كوماندانىڭ جەيدەسىن كيىپ جۇرۋىنە جاعداي جاساۋىمىز كەرەك. سوندا عانا فۋتبولدىڭ ەكونوميكاسى قالىپتاسادى.
– وسى ايتقاندارىڭىزدىڭ ناتيجەسىن قاشان كورەمىز؟
– كەمىندە 5 جىل.
– تىم ۇزاق ەمەس پە؟
– قازىر سپورتتى ۇلكەن جۇيە, يندۋستريا, ەكونوميكا, تاربيە, يدەولوگيا رەتىندە قاراۋ كەرەك. بىزدە تالانتتى جاستار, جاناشىر جانكۇيەرلەر بار. الايدا وسىنىڭ ءبارىن بىرىكتىرەتىن تۇراقتى جۇيە جەتىسپەيدى. ينفراقۇرىلىم, ينۆەستيتسيا, جاستاردىڭ دايارلىعى, ۇلتتىق مەكتەپ, مەنەدجمەنت پەن ماركەتينگ ءبارى قاتار جۇرگەنى ءجون. ءبىرىنشى ليگا مەن ەكىنشى ليگانى ايتپاعاننىڭ وزىندە پرەمەر-ليگا كوماندالارىنىڭ كوبىسىندە مۇنداي جۇيە جوق. سوندىقتان وسى سياقتى كوپتەگەن تۇيتكىلدى ەسكەرسەك, 5 جىل دەگەن كوپ ۋاقىت ەمەس.
قۋانتاتىنى, مەملەكەت باسشىسى قاسىم-جومارت توقاەۆتىڭ باستاماسىمەن سوڭعى كەزدە فۋتبولعا ەرەكشە كوڭىل ءبولىنىپ جاتىر. پرەزيدەنت بىرنەشە رەت فۋتبول ينفراقۇرىلىمىن دامىتۋ, بالالار فۋتبولىن كۇشەيتۋ, كلۋبتاردىڭ تيىمدىلىگىن ارتتىرۋ ماسەلەسىن كوتەردى. بۇل باعىتتاعى وزگەرىستەر ەندى ناقتى ناتيجەگە ۇلاسادى دەپ ويلايمىن. نەگىزگى ماسەلە تەك قارجىدا ەمەس. ماڭىزدىسى – سول قارجىنى ءتيىمدى يگەرۋ. بۇرىن بىزدە فۋتبولعا بولىنگەن قاراجات كوبىنە شىعىن رەتىندە قاراستىرىلدى. ال الەمدىك تاجىريبەدە فۋتبول – ۇلكەن يندۋستريا. ياعني فۋتبولعا سالىنعان قارجى ەرتەڭ ەكونوميكالىق, الەۋمەتتىك, يميدجدىك پايدا اكەلۋى ءتيىس.
– سوزىڭىزگە قاراساق, ءسىز فۋتبولدى دامىتىپ قانا قويماي, ودان قارجى تابۋدىڭ تەتىگىن ويلاستىرىپ جاتقان سەكىلدىسىز. جوعارىدا ايتقانىڭىزداي, وسى ماسەلەلەردى شەشكەن الەمدىك فۋتبولداعى قانداي ۇلگىلەردى مىسال ەتۋگە بولادى؟
– مىسالى, انگليا پرەمەر-ليگاسىن نەمەسە يسپانيا لا-ليگاسىن الايىق. ولار تەك سپورتتىق ناتيجە ارقىلى ەمەس, مىقتى مەنەدجمەنت, ماركەتينگ, تەلەقۇقىق, جانكۇيەر مادەنيەتى ارقىلى دامىپ كەلەدى. ءار كلۋب ءوزىن جەكە برەند رەتىندە قالىپتاستىرعان. كلۋبتىڭ اكادەمياسى, دۇكەنى, مەديا ءبولىمى, الەۋمەتتىك جەلىدەگى جۇمىسى – ءبارى ءبىر جۇيە. ءبىز دە بىرتىندەپ وسى باعىتقا كوشۋىمىز كەرەك. كلۋبتارىمىز بيۋدجەتكە قاراپ وتىرماي, وزدەرى قارجى تابۋدى ۇيرەنۋى قاجەت. سوندا عانا تۇراقتى دامۋ بولادى.
– ءسىز تىلگە تيەك ەتكەن جۇيەنى «ورداباسىدا» جۇزەگە اسىرىپ جاتىرسىزدار ما؟
– ىسكە اسىپ جاتىر دەسەم دە بولادى. ەڭ الدىمەن ستاديونىمىز جانكۇيەرلەرگە تولدى. بيلەتتەر ەكى-ءۇش كۇندە تولىق ساتىلادى. سىرتتاعى ويىنداردا دا جانكۇيەرلەر اناعۇرلىم كوبەيدى. ءوز الاڭىمىزداعى ءاربىر ماتچتا انشىلەر ونەر كورسەتەدى. جانكۇيەرلەر اراسىندا ءتۇرلى سىيلىق, ءتىپتى اۆتوكولىككە دەيىن ۇتىس ويناتتىق. سونداي-اق تانىمال تۇلعالارعا ارنايى قۇرمەت كورسەتىپ, ولاردى ەشقاشان ۇمىتپايتىنىمىزدى فۋتبولسۇيەر قاۋىم ارقىلى جەتكىزدىك. مىسالى, ويىن بارىسىندا جانكۇيەرلەر باقيعا وزعان مۇحتار شاحانوۆتىڭ, امانگەلدى سەيىتحانوۆتىڭ بەينەسى بار ۇلكەن باننەردى بيىككە كوتەرىپ, قۇرمەت كورسەتتى.
– سوڭعى كەزدە كوماندا اتاۋى وزگەرەدى دەگەن اڭگىمە ايتىلىپ ءجۇر...
– ءيا, راس. كلۋبتىڭ اتاۋىن «Orda» شىمكەنت دەپ وزگەرتەمىز. ەۋروپا مەن تۇركياداعى بىرنەشە كلۋبتىڭ جۇمىس جۇيەسىن قاراپ جاتىرمىز. سوعان سايكەس, بولاشاقتا جاڭا ستاديون ماڭىندا تولىققاندى فۋتبول قالاشىعىن سالۋ جوسپاردا بار. جوبانىڭ اتاۋى – «Orda City». ونىڭ قۇرامىندا جاڭا ستاديون, جاتتىعۋ بازاسى, قوناقۇي, بالالار اكادەمياسى جانە فۋتبولعا قاجەتتى بارلىق ينفراقۇرىلىم سالىنادى. ءبىر نارسە انىق – اكادەميا مىندەتتى تۇردە بولادى. بالالار كوپ بولعان سايىن تالانتتار دا كوبەيەدى. بولاشاقتا ءوز اكادەميامىزدان شىققان ويىنشىلار نەگىزگى كوماندادا ويناۋى كەرەك.
– بۇگىندە كوماندادا 10 لەگيونەر بار ەكەن. بۇل تىم كوپ ەمەس پە؟
– لەگيونەرلەرگە قارسى ەمەسپىز. فۋتبول – بۇكىل ادامزاتقا ورتاق ويىن. بىراق باستى نازار جەرگىلىكتى تالانتتاردى دامىتۋعا اۋدارىلادى. ءبىز ەۋروپا مەن اقش-تاعى سپورت مادەنيەتىنەن ۇلگى الامىز. NBA, NHL, امەريكالىق فۋتبول نەمەسە بەيسبول بولسىن, ول جاقتا سپورت حالىقتىڭ كۇندەلىكتى ءومىرىنىڭ ماڭىزدى بولىگىنە اينالعان. باتىستا دا لەگيونەرلەر جەتىپ ارتىلادى. بىراق ولار وزگە ەلدىڭ سپورتشىلارى كوپ دەپ شاعىمدانبايدى. كەز كەلگەن ويىنشىنى سۇيىكتى كومانداسىمەن بايلانىستىرادى. ارنايى دايىندالىپ, وتباسىمەن, دوستارىمەن بىرگە ستاديونعا بارىپ, كوماندالارىنا قولداۋ كورسەتەدى.
قازاق بوكس مەكتەبىن قايتا قالىپتاستىرامىز
– ءسىزدى جۇرت تەك «ورداباسى» كلۋبىنىڭ پرەزيدەنتى عانا ەمەس, بوكس فەدەراتسياسىنىڭ ءبىرىنشى ۆيتسە-پرەزيدەنتى رەتىندە تانيدى. ەندى اڭگىمەمىزدى بۇگىنگى بوكسقا بۇرساق. قازاق بوكسىنىڭ جاعدايىن قالاي باعالايسىز؟
– بۇگىندە بوكسقا دەگەن جاۋاپكەرشىلىكتى قايتا كۇشەيتۋ كەزەڭىندە تۇرمىز. مويىنداۋ كەرەك, سوڭعى جىلدارى اتالعان سالادا بەلگىلى ءبىر دەڭگەيدە بوساڭسۋ بولدى. بۇرىن ءبىزدىڭ بوكسشىلار تەحنيكاسىمەن, جىلدامدىعىمەن, مىنەزىمەن ەرەكشەلەنەتىن. وليمپيادادا, الەم چەمپيوناتتارىندا تۇراقتى ناتيجە كورسەتىپ ءجۇردى. بۇل كەزدەيسوق جەتىستىك ەمەس, ۇلكەن مەكتەپتىڭ جەمىسى. سول مەكتەپتى ساقتاپ قانا قويماي, ونى ارى قاراي دامىتۋىمىز كەرەك.
– ۇلكەن ناتيجەگە جەتۋ ءۇشىن نە ماڭىزدى؟
– ەڭ الدىمەن بۇقارالىق سپورتتى كۇشەيتۋ قاجەت. نەعۇرلىم كوپ بالا سپورتپەن اينالىسسا, سوعۇرلىم مىقتى سپورتشىلار شىعادى. سوندىقتان اۋىلداعى, اۋدانداعى سپورت مەكتەپتەرىنە دەيىن كوڭىل ءبولۋىمىز كەرەك. بولماسا, بوكستى مەكتەپ باعدارلاماسىنا ەنگىزۋ كەرەك. بۇرىن ءبىزدىڭ ءبىرىنشى جانە ەكىنشى قۇرام جۇيەسى وتە مىقتى بولعان. كەي جىلدارى ەكىنشى قۇرامنىڭ ءوزى ازيا ويىندارىندا چەمپيون اتانعان كەزدەر بولدى. بۇل – جۇيەلى دايىندىقتىڭ ناتيجەسى.
– كەيىنگى جىلدارى وزبەك بوكسى ۇلكەن سەرپىلىس جاسادى. ونىڭ سىرى نەدە دەپ ويلايسىز؟
– وزبەكستان بىرنەشە قۇراممەن قاتار جۇمىس ىستەيدى. ءار سالماقتا ۇلكەن باسەكەلەستىك بار. سونىڭ ارقاسىندا بارلىق دەڭگەيدە جوعارى ناتيجە كورسەتىپ ءجۇر. بىزگە دە سونداي جۇيە قالىپتاستىرۋ قاجەت. ول ءۇشىن قارجى, دۇرىس ۇيىمداستىرۋ, ورتاق ماقساتقا جۇمىس ىستەۋ ماڭىزدى. بوكس فەدەراتسياسى, باپكەرلەر, سپورتشىلار – ءبارى ءبىر باعىتتا جۇمىس ىستەۋگە ءتيىس. سوندا عانا ناتيجە بولادى. قازىر قىزدار بوكسى دا جاقسى دامىپ كەلەدى. بۇل باعىتتا دا ۇلكەن مۇمكىندىك بار. ەلىمىزدە تالانتتى قىزدار وتە كوپ. ولارعا جاعداي جاساپ, حالىقارالىق دەڭگەيگە شىعارۋىمىز كەرەك.
– «ىستەۋ كەرەك», «جاساۋىمىز قاجەت», «جۇيە قاجەت» وسىنداي سوزدەر كوبەيىپ كەتتى. سوندا ءبىزدىڭ بوكس سىزدەر كەلگەنگە دەيىن قۇردىمعا كەتكەن بە؟
– ولاي دەۋگە كەلمەيدى. بىراق كەيىنگى ەكى وليمپيادادان, ەكى ازيا ويىندارىنان بوكسشىلارىمىز التىنسىز قايتتى ەمەس پە؟ بۇل ويلاناتىن جايت. ايتپەسە, ەلىمىزدە بوكس سپورتى ءاردايىم ەرەكشە ورىنعا يە. ءتىپتى كەي جاعدايدا ونى ۇلتتىق سپورت دەڭگەيىندە قابىلدايمىز. ونىڭ دا وزىندىك سەبەبى بار. بۇعان دەيىن وليمپيادادا, الەم چەمپيوناتتارىندا بوكسشىلارىمىز تالاي مارتە توپ جارىپ, ەل ابىرو-يىن اسقاقتاتقاننىڭ ارقاسىندا ەلىمىز الەمگە بوكس دەرجاۆاسى رەتىندە تانىلدى. قازاق بوكسىنىڭ قالىپتاسۋىنا ءار كەزەڭدە ءوز ۇلەسىن قوسقان چەمپيوندار مەن باپكەرلەر ۇلتتىق سپورتتىڭ بەدەلىن كوتەرىپ, الەمدىك ارەنادا ەلىمىزدىڭ كوك تۋىن تالاي مارتە بيىكتە جەلبىرەتتى.
الايدا جوعارىدا ايتقانداي, كەيىنگى جىلدارى وليمپيادا مەن ازيا ويىندارىندا التىن جۇلدەنىڭ بولماۋى بۇل سالاعا سەرپىلىس قاجەت ەكەنىن كورسەتتى. وسىعان بايلانىستى 2024 جىلدان باستاپ قازاقستان بوكس فەدەراتسياسى ۇلتتىق قۇرامانى جاڭعىرتۋعا, جاستاردى بوكسقا باۋلۋعا, سپورتشىلارعا قولايلى جاعداي جاساۋعا باسىمدىق بەرە باستادى. فەدەراتسيانىڭ باستى ماقساتى – قازاق بوكسىنىڭ بۇرىنعى بەدەلىن قايتارىپ, جاڭا بۋىن چەمپيوندارىن تاربيەلەۋ.
– ءسوزىڭىزدى بولەيىن, ناقتى قانداي جۇمىس جۇرگىزىلىپ جاتىر؟ سوعان توقتالساڭىز.
– قازىرگى تاڭدا بوكسشىلارعا تاجىريبەلى باپكەرلەر, ساپالى وقۋ-جاتتىعۋ باعدارلامالارى, ديەتولوگتەر مەن قالپىنا كەلتىرۋ ماماندارى قىزمەت كورسەتەدى. سپورتشىلاردىڭ تەك جاتتىعۋ جاساپ, شەبەرلىگىن شىڭداۋىنا تولىق مۇمكىندىك بەرىلەدى. سونىمەن قاتار حالىقارالىق جارىستارعا قاتىسۋ, شەتەلدىك وقۋ-جاتتىعۋ جيىندارىن وتكىزۋ, الەمدىك دەڭگەيدەگى بوكس مەكتەپتەرىمەن تاجىريبە الماسۋ جۇمىسى كۇشەيتىلدى. بۇگىندە وسى وزگەرىستەردىڭ ناتيجەسى دە بايقالا باستادى. قۇرامامىز World Boxing ۇيىمى اياسىنداعى العاشقى الەم چەمپيوناتىندا جالپىكوماندالىق ەسەپتە ءبىرىنشى ورىن الىپ, الەمدىك بوكس ارەناسىنداعى كوشباسشى ەلدەردىڭ ءبىرى ەكەنىن تاعى دالەلدەدى. اسىرەسە تۋرنير بارىسىندا قازاق-وزبەك بوكسشىلارى اراسىندا ۇلكەن باسەكەلەستىك ءوربىدى. فينالدىق جەكپە-جەكتەردە التىن مەدالدار تاعدىرىن شەشكەن ساتتەر جانكۇيەرلەردىڭ ەسىندە قالدى. شەشۋشى كەزدەسۋدە ايبەك ورالبايدىڭ جەڭىسى قازاقستان قۇراماسىن ءبىرىنشى ورىنعا شىعاردى. بۇل جەڭىس قازاق بوكسىنىڭ قايتا جاندانىپ كەلە جاتقانىن كورسەتكەن تاريحي ساتتەردىڭ بىرىنە اينالدى.
وتانداسىمىز گەننادي گولوۆكيننىڭ World Boxing ۇيىمىنىڭ پرەزيدەنتى بولىپ تاعايىندالۋى – ەل سپورتى ءۇشىن ۇلكەن مارتەبە. بۇل وقيعا ەلىمىزدىڭ الەمدىك بوكستاعى بەدەلىن ارتتىرىپ قانا قويماي, حالىقارالىق دەڭگەيدەگى ىقپالىن دا كۇشەيتتى.
نەگىزگى ماقسات – مىقتى قۇرام جاساقتاۋ
– كوپ سپورتشى قالادان ەمەس, اۋىلدان شىعاتىنى بەلگىلى. ءوڭىر بوكسىن دامىتۋعا قانشالىقتى كوڭىل ءبولىپ جاتىرسىزدار؟
– بۇگىندە وڭىرلەردەگى بوكس مەكتەپتەرىنىڭ جۇمىسى تۇراقتى باقىلاۋدا. قاي ايماقتا بوكس جاقسى دامىپ جاتىر, قاي وڭىردە كەمشىلىكتەر بار – ءبارى سارالانىپ وتىرادى. كەيىنگى ۋاقىتتا وڭىرلىك فەدەراتسيالاردا دا ۇلكەن وزگەرىس جاسالىپ, جاڭا بۋىن باسشىلار كەلىپ جاتىر. سونىڭ ارقاسىندا كوپتەگەن ايماقتا سەرپىلىس بايقالادى. ەگەر ايماقتاردى اتاپ ايتساق, قاراعاندى – تاريحي بوكس مەكتەبى قالىپتاسقان وبلىس. سارىارقادان الەمدىك دەڭگەيدەگى كوپتەگەن چەمپيون شىقتى. قاراعاندى بوكسىنىڭ وزىندىك ءستيلى مەن مەكتەبى بار. ال شىمكەنتتە كەيىنگى جىلدارى بوكس وتە قارقىندى دامىدى. حالىق سانىنىڭ كوپتىگى, جاستاردىڭ سپورتقا قىزىعۋشىلىعى, مىقتى باپكەرلەردىڭ بولۋى بۇل ءوڭىردىڭ الەۋەتىن ارتتىردى. قازىرگى تاڭدا شىمكەنت بوكس مەكتەبى ەلىمىزدەگى ەڭ مىقتى مەكتەپتەردىڭ ءبىرى سانالادى.
– سوندا وزگە وڭىرلەردىڭ بوكسى تۇرالاپ تۇر ما؟
– جوق, ولاي دەۋگە كەلمەيدى. قازىرگى تاڭدا وزگە ايماقتىق فەدەراتسيالار دا بوكسشىلارعا بەلسەندى قولداۋ كورسەتىپ كەلەدى. ولار تەك ۇلتتىق قۇرامانىڭ ءبىرىنشى ءنومىرلى سپورتشىلارىن عانا ەمەس, ەكىنشى جانە ءۇشىنشى قۇرامداعى جاس بوكسشىلاردى دا حالىقارالىق جارىستارعا جىبەرىپ, تاجىريبە جيناۋىنا مۇمكىندىك جاساپ وتىر. بۇل – بولاشاق چەمپيونداردى قالىپتاستىرۋداعى اسا ماڭىزدى قادام. حالىقارالىق جارىستاردا باپكەرلەر سپورتشىلاردىڭ ارتىقشىلىقتارى مەن كەمشىلىكتەرىن سارالاپ, بولاشاقتاعى دايىندىق باعىتىن انىقتايدى.
– ازيا چەمپيوناتى قارساڭىندا ۇلتتىق قۇرامانىڭ بىرلەسكەن وقۋ-جاتتىعۋ جيىندارى ۇيىمداستىرىلدى. قازاقستانعا وزبەكستان, قىرعىزستان, تۇرىكمەنستان قۇرامالارى كەلىپ, دايىندىعىن وتكىزگەنىن كوردىك. وزبەك بوكسشىلارىنىڭ دەڭگەيى جوعارى, ال قىرعىزدار مەن تۇرىكمەن بىلعارى قولعاپ شەبەرلەرىنىڭ الەۋەتى قانداي؟
– وزىنەن مىقتى نەمەسە دەڭگەيى ءسال تومەندەۋ بوكسشىمەن بىرگە جاتتىعۋ جاساۋ كەرىسىنشە, كومەگىن تيگىزەدى. بۇل – كەزدەيسوق شەشىم ەمەس, ناقتى جوسپار نەگىزىندە جۇزەگە اسقان جۇمىس. سەبەبى كەيىنگى جىلدارى الەمدىك اۋەسقوي بوكستا قازاقستان مەن وزبەكستاننىڭ دەڭگەيى ەرەكشە بايقالىپ كەلەدى. اسىرەسە ليۆەرپۋلدەگى الەم چەمپيوناتىندا ەكى ەلدىڭ بوكسشىلارى التىن جۇلدەلەردى ءوزارا ءبولىسىپ, الەمدەگى ەڭ مىقتى قۇرامالاردىڭ ءبىرى ەكەنىن دالەلدەدى. وتكەن جىلى مۇنداي جيىن تاشكەنتتە وتسە, بيىل تۇركىستان قالاسىندا ۇيىمداستىرىلدى.
ال ازيا چەمپيوناتىندا قازاقستان قۇراماسى تاعى دا جوعارى ناتيجە كورسەتىپ, جالپى ەسەپتە ءبىرىنشى ورىن الدى. دەگەنمەن كەيبىر بوكسشىلار كۇتپەگەن جەردەن جەڭىلىپ جاتسا, ەندى ءبىرى جانكۇيەرلەردى جارقىن جەڭىسىمەن قۋانتتى. بۇل – اۋەسقوي بوكستىڭ باستى ەرەكشەلىگى. سەبەبى ازيا چەمپيوناتىنىڭ وزىندە الەم چەمپيوناتىنا پارا-پار باسەكەلەستىك بار. بۇگىندە ءۇندىستان, جاپونيا, قىتاي, كورەيا, موڭعوليا سەكىلدى ەلدەردىڭ دە مىقتى بوكسشىلارى كوپ.
– قازىرگى تاڭدا ۇلتتىق قۇرامانىڭ باستى ماقساتى – كۇزدە جاپونيادا وتەتىن ازيا ويىندارى ەكەنى بەلگىلى. سوعان دايىندىقتارىڭىز قالاي؟
– دۇرىس ايتاسىز, بۇگىنگى تاڭدا باستى ماقساتىمىز – ازيا ويىندارىندا توپ جارۋ. سەبەبى, بوكسشىلارىمىز سوڭعى ءۇش ازيا ويىندارىندا التىن مەدال الا الماعان. سوندىقتان بيىلعى جارىسقا ەرەكشە جاۋاپكەرشىلىكپەن دايىندىق جۇرگىزىلىپ جاتىر. ءبىز اتالعان دودادا تەك جۇلدە الىپ قانا قويماي, التىن مەدالدار سانىن ارتتىرۋدى كوزدەيمىز. وسى باعىتتا فەدەراتسيا قۇرامىندا دا بىرقاتار وزگەرىس جاسالدى. تاجىريبەلى مامان قايرات ءساتجانوۆ ۆيتسە-پرەزيدەنت قىزمەتىنە تاعايىندالىپ, وڭىرلەردەگى جاتتىقتىرۋشىلاردىڭ بىلىكتىلىگىن ارتتىرۋ, تورەشىلەر جۇيەسىن دامىتۋ جانە ايماقتارداعى جۇمىستى باقىلاۋ باعىتىندا ەڭبەك ەتەدى. ال باس باپكەر قىزمەتىن نۇرجان ناسانوۆ ۇستاعاننان كەيىن, ەڭ الدىمەن ۇلتتىق قۇراما يسپانيادا ارنايى دايىندىق جيىنىن وتكىزدى. سونىمەن قاتار ايەلدەر قۇراماسىنا دا ەرەكشە كوڭىل ءبولىنىپ, جاس سپورتشىلاردان رەزەرۆ قالىپتاستىرۋ جۇمىسى كۇشەيتىلدى.
ءبىر سوزبەن ايتقاندا, قازاقستان بوكس فەدەراتسياسىنىڭ باسشىسى شاحمۇرات ءمۇتالىپ باستاعان كوماندا بوكسشىلاردىڭ ماتەريالدىق-تەحنيكالىق جاعدايىنا, حالىقارالىق جارىستارعا قاتىسۋىنا, دايىندىق ساپاسىنا ەرەكشە كوڭىل ءبولىپ وتىر. نەگىزگى ماقسات – 2028 جىلى لوس-اندجەلەستە وتەتىن جازعى وليمپيا ويىندارىنا مىقتى قۇرام جاساقتاۋ.
كەلەسى جىلى استانا قالاسىندا ليتسەنزيالىق الەم چەمپيوناتى وتەدى. بۇل تۋرنيردە وليمپيادا جولدامالارى ساراپقا سالىنادى. سوندىقتان فەدەراتسيا, باپكەرلەر شتابى جانە سپورتشىلار قازىر ءبىر ماقسات جولىندا ەڭبەك ەتىپ جاتىر – قازاق بوكسىنىڭ ابىرويىن قايتادان الەمدىك دەڭگەيگە كوتەرۋ.
اڭگىمەلەسكەن –
الماس ماناپ,
«Egemen Qazaqstan»
