يننوۆاتسيالىق شتاب پرەمەر-ءمينيستردىڭ تاپسىرماسىمەن قۇرىلدى. ونىڭ نەگىزگى مىندەتى – يننوۆاتسيالىق قىزمەت سالاسىنداعى ۆەدومستۆوارالىق ۇيلەستىرۋدى قامتاماسىز ەتۋ مەن ەلدىڭ تەحنولوگيالىق باسىمدىقتارىن ايقىنداۋ.
وتىرىستا ەلىمىزدە يننوۆاتسيالاردى دامىتۋدىڭ تۇجىرىمدامالىق ماسەلەلەرى قارالدى. اتاپ ايتقاندا, مەملەكەتتىك قولداۋ قۇرالدارىن جەتىلدىرۋ, وڭىرلىك يننوۆاتسيالىق جۇيەلەردى دامىتۋ, كادرلىق الەۋەتتى كۇشەيتۋگە باعىتتالعان شارالار تالقىلاندى.
بۇل جۇمىس ناتيجەسىندە يننوۆاتسيالىق بەلسەندىلىكتى ارتتىرۋعا, ەلدىڭ جاھاندىق يننوۆاتسيالار يندەكسىندەگى ورنىن نىعايتۋعا, جاڭا سالالاردى دامىتۋعا, جوعارى تەحنولوگيالىق جۇمىس ورىندارىن قۇرۋعا جانە قوسىلعان قۇنى جوعارى ءونىم ەكسپورتىن ۇلعايتۋعا مۇمكىندىك بەرەتىن باسقارىلاتىن يننوۆاتسيالىق جۇيە قالىپتاستىرۋ كوزدەلىپ وتىر.
جاڭا مودەلدىڭ نەگىزگى يدەولوگيالىق وزەگى – «يننوۆاتسيانى عىلىم ارقىلى دامىتۋ» تاسىلىنەن «عىلىمدى يننوۆاتسيا ارقىلى دامىتۋ» قاعيداتىنا كوشۋ. ونىڭ ءمانى – دايىن وزىق تەحنولوگيالاردى يگەرىپ, ەل جاعدايىنا بەيىمدەۋ ءارى وسى نەگىزدە وتاندىق عىلىمدى دامىتۋ. ياعني مەملەكەت ۇدەرىستىڭ وزىنە ەمەس, ناقتى ناتيجەگە قارجى باعىتتايدى.
جيىن قورىتىندىسىندا يننوۆاتسيالاردى دامىتۋ تۇجىرىمداماسىنىڭ نەگىزگى تاسىلدەرى ماقۇلدانىپ, مەملەكەتتىك ورگاندارعا, اكىمدىكتەرگە, بيزنەس-سەكتور وكىلدەرىنە قۇجات جوباسىنا ناقتى ۇسىنىستار ەنگىزۋ جونىندە ءتيىستى تاپسىرمالار بەرىلدى.
سونىمەن قاتار بارلىق وڭىردە مۇددەلى تاراپتاردىڭ قاتىسۋىمەن عىلىمي-تەحنولوگيالىق سەسسيالار وتكىزۋ كەستەسىن بەكىتۋ تاپسىرىلدى. بۇل سەسسيالار بيزنەستىڭ ناقتى تەحنولوگيالىق سۇرانىستارىن ايقىنداۋعا باعىتتالماق.
