«18 كيلوگەرتس» – بۇل 90 جىلداردىڭ سوڭىنداعى جاسوسپىرىمدەردىڭ ومىرىنەن سىر شەرتەتىن فيلم. كينوتۋىندى زارا ەسەناماننىڭ «حاردكور» جەلىسى بويىنشا ءتۇسىرىلدى.
– بۇل فيلم جاسوسپىرىمدەر تۋرالى... ولاردىڭ وي-تولعانىستارىن, ىزدەنىستەرى مەن ءتۇڭىلۋ كەزەڭدەرىن, ماحاببات جانە دوستىق, كۇمارلىق سەزىمدەرىن, سونداي-اق تىعىرىقتان شىعاتىن جول تابا الماي قالاتىنداي اسەرگە بولەيتىن قورقىنىش سەزىمدەرىن سۋرەتتەيتىن تۋىندى. الايدا, بۇل قوقىنىشتان قۇتىلۋ ءۇشىن, تەك ويانۋ كەرەك, - دەدى ءفيلمنىڭ رەجيسسەرى ءارى ستسەناري اۆتورى فارحات شاريپوۆ.
كينوكارتينانىڭ تۇسىرىلىمدەرى الماتى قالاسىندا ءوتتى. ءفيلمنىڭ قويۋشى سۋرەتشىسى الەكسەي شيندين ەكراندا 90 جىلدارداعى الماتىنى كورسەتۋ ءۇشىن سول كەزدەگى اۋلالاردى, سونىمەن قاتار اكسەسسۋارلار مەن تۇرمىستا قولدانىلاتىن زاتتاردى تابۋ قيىنعا سوققانىن ايتتى. ءفيلمنىڭ وپەراتورى – الەكساندر پلوتنيكوۆ (رەجيسسەر فارحات شاريپوۆپەن بىرگە «قىزعىلت قويان تۋرالى حيكايا», «تۇلعالىق ءوسۋ ترەنينگى» سىندى فيلمدەردى تۇسىرگەن).
ايتا كەتسەك, فيلمدەگى باستى رولدەردى جاس اكتەرلەر سومدادى. باستى كەيىپكەرلەردىڭ ءبىرىن ويناعان مۇساحان جۇماحان اكتەر بولۋدى ارمانداماعانىن, كاستينگكە تەك دوسىن قولداۋ ءۇشىن كەلگەنىن, كەيىن باستى رولگە بەكىتىلگەنىن ەستىگەندە قاتتى تاڭقالعانىن ايتتى. اكتريسا كاميلا فۋن-سو بولسا, كاستينگ تۋرالى اقپاراتتى الەۋمەتتىك جەلىلەر ارقىلى ەستىپ كەلگەن ەكەن. ال فيلمدە شىڭعىستىڭ ءرولىن سومداعان اكتەر الىبەك ادىكەن كينو الەمىنە بەس جىل بۇرىن كەلگەنىن ايتتى. ونىڭ شىعارماشىلىق قورجىنىندا بىرنەشە سەريالدار مەن قىسقامەتراجدى فيلمدەر بار.
ەستەرىڭىزگە سالا كەتسەك, 2020 جىلى قازان ايىندا «18 كيلوگەرتس» كوركەم ءفيلمى قازاق كينوسىنىڭ تاريحىندا العاش رەت حححVI حالىقارالىق ۆارشاۆا كينوفەستيۆالىنىڭ باس جۇلدەسىن جەڭىپ العان بولاتىن. كەيىن بۇل تۋىندى گەرمانيانىڭ كوتبۋس قالاسىندا وتكەن ححح حالىقارالىق كينوفەستيۆالدە ۇزدىك دەپ تانىلدى. وتاندىق كينوكارتينا فەستيۆالدىڭ Youth Film Competition اتتى كونكۋرستتىق باعدارلاماسىنا قاتىسقان بولاتىن.
