«تاعى ءبىر قاۋىپتى كوپپاتەرلى تۇرعىن ءۇي كەشەنى – «وربيتانى» جوندەۋدەن وتكىزدىك! بۇل تك حالىق اراسىندا قيسىق بالكوندارى بار ءۇي رەتىندە بەلگىلى. تۇرعىندار بالكوندار قاتتى جەل كەزىندە قابىرعالاردان الشاقتاپ, سىرتقى پليتالاردىڭ ۇشاتىنىن ايتقان. اتالعان تك 10 جىل بۇرىن پروبلەمالىق ءۇي بولىپ تانىلدى. ول ەكى مۇنارادان تۇرادى. نىسان سول كەزدەن بەرى پايدالانۋعا بەرىلمەگەن. 340 وتباسىنىڭ پروبلەماسىن شەشۋ ءۇشىن جوندەۋ جۇرگىزدىك. قاۋىپتى قاسبەتتى تولىق الماستىردىق, تك-نىڭ نەگىزگى قۇرىلىستارىن كۇشەيتتىك, بالكوندار ۆيتراجدارىن اۋىستىردىق جانە ت.ب. كوپپاتەرلى تۇرعىن ءۇي كەشەنى پايدالانۋعا بەرىلدى. پاتەرلەر اۋماعىن ولشەۋ مەن تۇرعىندارعا تەحنيكالىق پاسپورت بەرۋ جۇمىستارى ءجۇرىپ جاتىر», دەدى ەلوردا اكىمى التاي كولگىنوۆ.
اتالعان تۇرعىن ءۇي كەشەنىنىڭ تۇرعىنى ءلاززات حاسانوۆا قاتتى جەلمەن بالكوندار قابىرعادان الشاقتاپ كەتكەنىن اتاپ ءوتتى.
«قاتتى جەل كەزىندە ءبىزدىڭ بالكوندار قابىرعادان الشاقتاپ كەتتى. پاتەرىمدە بالكون مەن قابىرعا اراسى اشىلىپ, ساڭىلاۋ ۇلعايدى. جەل توقتاعان كەزدە بالكوندار ورنىنا قايتا ءتۇستى. ءبىز وسىنداي قورقىنىشتى جاعدايدا ءومىر سۇردىك. ۇكىمەت بىزگە نازار اۋدارىپ, ب ۇلىنگەن قاسبەتتى تولىعىمەن اۋىستىرۋعا كومەكتەستى. اپاتتىق بالكوندار تولىعىمەن اۋىستىرىلدى. بالكوندار قورقىنىشتى جاعدايدا بولدى جانە ادام ومىرىنە قاۋىپ ءتوندىردى», دەدى ءلاززات حاسانوۆا.
بۇعان دەيىن وسىعان ۇقساس ماسەلەلەر پروبلەمالىق «تەرريتوريا كومفورتا – 2» ۇيىندە بولعان. وندا دا اۋقىمدى جوندەۋ جۇمىسى جۇرگىزىلىپ, كەشەن پايدالانۋعا بەرىلدى.
