ءبىلىم جانە عىلىم ۆيتسە-ءمينيسترى ميراس داۋلەنوۆتىڭ مالىمدەۋىنشە, ەلىمىزدەگى ستۋدەنتتەردىڭ باسىم بولىگى قاشىقتان وقىتۋ فورماتىندا ءبىلىم الىپ جاتىر. دەگەنمەن, شتاتتىق رەجىمدە وقىپ جۇرگەن ىزدەنۋشىلەر دە بار.
– ەلىمىزدەگى ستۋدەنتتەردىڭ 84 پايىزى قاشىقتان وقىپ جاتىر. ولار – نەگىزىنەن گۋمانيتارلىق سالادا دايارلانىپ جاتقان كادرلار. ال قالعانى ءىشىنارا شتاتتىق رەجىمدە ءبىلىم الىپ ءجۇر. قاشىقتان وقىتۋ قولايسىز بولعاندىقتان مەديتسينالىق, ينجەنەرلىك-تەحنيكالىق ماماندىقتاردىڭ ستۋدەنتتەرىنە ارالاس فورماتتا ءبىلىم بەرۋگە شەشىم شىعارىلعان. جوو كۇزگى سەمەسترگە دايىندىعى مەن ءبىلىم بەرۋ ساپاسىن قامتاماسىز ەتۋ ماقساتىندا مينيسترلىك شەكتەۋ شارالارى كەزەڭىندە جوعارى وقۋ ورىندارىندا وقۋ پروتسەسىن ۇيىمداستىرۋ بويىنشا ادىستەمەلىك ۇسىنىمدار ازىرلەدى. ادىستەمەلىك ۇسىنىمدارعا سايكەس جوعارى وقۋ ورىندارى ارالىق جانە قورىتىندى اتتەستاتتاۋ پروتسەدۋرالارىن پروكتورينگ جۇيەسىمەن قامتاماسىز ەتەدى, سونداي-اق ستۋدەنتتەردىڭ بارلىق جازباشا جۇمىستارى انتيپلاگيات جۇيەلەرى ارقىلى تەكسەرىلەدى, – دەدى ۆيتسە-مينيستر.
ۆەدومستۆو وكىلى ستۋدەنتتەردىڭ بارلىق جازباشا جۇمىسى «SEB», «Aero», «Examus», «Proctopus», «Oqylyq», «OES», «Live.atu.kz», «Hesperus» سەكىلدى پروكتورينگ جۇيەلەرى جانە كوشىرىپ الۋدى انىقتايتىن «انتيپلاگيات», «Plagiat.pl», «Strikeplagiarism.com», «Turnitin», «Unihub» جۇيەلەرىمەن تەكسەرىلەتىنىن جەتكىزدى.
ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى گۇلزات كوبەنوۆانىڭ سوزىنە سەنسەك, جوعارى وقۋ ورىندارىنداعى ءبىلىم بەرۋ جاعدايى, ونداعى ساپا تەك سەسسيا كەزىندە عانا ەمەس, ۇدايى باقىلاۋدا بولادى.
– نەگىزىنەن جوعارى وقۋ ورىندارىنداعى ءبىلىم ساپاسىنا سەسسيا ۋاقىتىندا عانا ەمەس, جالپى وقۋ پروتسەسى كەزىندە دە مونيتورينگ جۇرگىزىلىپ وتىرادى. پروكتورينگ جۇيەسىندە مينيسترلىك پەن ۋنيۆەرسيتەت تاراپىنان ەمتيحانداردى دا, كۇندەلىكتى ساباقتاردىڭ وتكىزىلۋ بارىسىن دا باقىلاۋعا بولادى. سوندىقتان ناتيجەلەردى ۇدايى كورىپ وتىرۋعا مۇمكىندىك بار, – دەدى گ.كوبەنوۆا.
مينيسترلىكتىڭ مالىمەتىنە قاراعاندا, پروكتورينگتىڭ اۆتوپروكتورينگ, سينحروندىپروكتورينگ سەكىلدى بىرنەشە دەڭگەيى بار. بۇل كەزەڭدەردەن وتكەندە ستۋدەنتتەردىڭ الدىمەن جۇيەگە ءوزىنىڭ كىرگەن-كىرمەگەنى بەت-الپەتىن سايكەستەندىرۋ ارقىلى انىقتالادى. سودان كەيىن ەمتيحان تاپسىرۋ كەزىندە باسقا ءبىر جەردەن كوشىرىپ وتىرماعانىنا نازار اۋدارىلادى. بولمە 360 گرادۋس دەڭگەيىندە قارالىپ, بوگدە ادامنىڭ ستۋدەنتكە كومەكتەسۋىنە جول بەرىلمەيدى. ونداعى احۋال وسى جۇيە ارقىلى تولىق قاداعالانادى.
