بۇگىندە Nur Otan پارتياسى ەل تاعدىرىنا جاۋاپتى ەڭ باستى ساياسي كۇشكە اينالدى.
حالقىمىز بىزگە قاشاندا زور سەنىم ارتادى. اسىرەسە جاھاندىق داعدارىس كەزىندە ەل اماناتىنا ەرەكشە كوڭىل ءبولۋىمىز كەرەك.
بۇكىل الەمگە تاراعان پاندەميا قازاقستانعا دا وڭاي تيگەن جوق. مەملەكەت ازاماتتاردىڭ دەنساۋلىعىن قورعاۋ ءۇشىن بارلىق قاجەتتى شارانى قابىلدادى. پارتيا تاراپىنان حالىققا ۇدايى قولداۋ كورسەتىلىپ كەلەدى.
Nur Otan بەلسەندىلەرى مەن ەرىكتىلەرى مۇقتاج جانداردان كومەگىن اياعان جوق. وسىنداي ناقتى جۇمىس پەن شىنايى جاناشىرلىق بەرەكە-بىرلىگىمىزدى ارتتىرا تۇسەدى.
قازاقستان قازىرگى جاعدايعا قاراماستان, ستراتەگيالىق دامۋ ماقساتتارىن دايەكتى تۇردە جۇزەگە اسىرادى. بۇل رەتتە, ەلباسى ساياساتىنىڭ ساباقتاستىعىن قامتاماسىز ەتۋ – نەگىزگى مىندەتتىڭ ءبىرى.
مەن بيىلعى جولداۋىمدا پارتيانىڭ قوعامداعى جەتەكشى ءرولى تۋرالى ايتتىم. ءبىز رەفورمالاردى جۇزەگە اسىرۋ بارىسىندا Nur Otan-نىڭ زور الەۋەتىنە سۇيەنەتىن بولامىز.
قۇرمەتتى دەلەگاتتار مەن سەزد قوناقتارى!
بۇگىندە بۇكىل الەم تۇبەگەيلى وزگەرىستەر داۋىرىنە اياق باستى. حالىقارالىق قاتىناستار جۇيەسى بارعان سايىن بەلگىسىزدىك پەن بەيبەرەكەتسىزدىككە بەلشەسىنەن باتىپ بارادى. سەنىم داعدارىسى تۋىنداعانى انىق.
سوڭعى ءجۇز جىلدىقتاعى اسا تەرەڭ رەتسەسسيا الەمدىك ەكونوميكانى ونداعان جىلعا كەرى ىعىستىرىپ تاستادى. ءوسىمنىڭ بۇرىنعى قارقىنى مەن ورنىقتى دامۋدى قالپىنا كەلتىرۋ ءۇشىن وراسان زور كۇش-جىگەر جانە ۋاقىت كەرەك. وسىنىڭ سالدارىنان كوپتەگەن ەل قيىن جاعدايدا قالدى.
قازاقستان جەتكىلىكتى دەڭگەيدە بەرىك نەگىزگە يە بولىپ وتىر. ويتكەنى ەڭ الدىمەن, ءبىزدىڭ قارجى رەسۋرستارىنا نەگىزدەلگەن ناقتى دامۋ جوسپارىمىز بار.
ءبىز جاۋاپكەرشىلىگى مول ميلليونداعان ازاماتىمىزدىڭ ارقاسىندا ىشكى ساياسي تۇراقتىلىقتى ساقتاي بىلدىك. سونداي-اق بيزنەس قوعامداستىعىن قولداپ, مەملەكەتتىڭ بارلىق الەۋمەتتىك مىندەتتەمەسىن ورىنداي الدىق. وسى جولدا حالقىمىزدىڭ ءداستۇرلى قۇندىلىقتارى – ءوزارا كومەك, تاباندىلىق, جاناشىرلىق شەشۋشى ءرول اتقاردى.
ءبىز پاندەميا كەزىندە ازاماتتارىمىزدىڭ شىنايى ىنتىماقتاستىعى مەن جاپپاي جانقيارلىعىنىڭ كۋاسى بولدىق. ء«بىز بىرگەمىز!» ۇرانى قازاقستان ءپاتريوتيزمىنىڭ فورمۋلاسىنا اينالدى. قاتەرلى دەرت ىرىق بەرمەگەن قيىن كۇندەردە ءبىز شىن مانىندە بىرگە بولدىق.
پارتيا جانە ونىڭ بەلسەندىلەرى حالىقتى بىرىكتىرۋگە وراسان زور ەڭبەك ءسىڭىردى. ناقتى ىستەر اتقاراتىن Nur Otan پارتياسى ءوزىنىڭ ءىس-قيمىلى ارقىلى كوشباسشىلىققا لايىقتىلىعىن, قازاقستاننىڭ بولاشاعى ءۇشىن بۇكىل جاۋاپكەرشىلىكتى موينىنا الۋعا دايىن ەكەنىن كورسەتتى.
وسىنداي داعدارىس كەزىندە بيلەۋشى پارتيانىڭ, ۇكىمەت پەن بۇكىل قوعامنىڭ الدىندا بىرەگەي مۇمكىندىكتەر پايدا بولاتىنى بۇرىننان بەلگىلى. سول تاريحي مۇمكىندىكتى پايدالانۋ ءۇشىن ءبىز ەلىمىزگە دامۋدىڭ جاڭا پاراديگماسىن ۇسىنۋىمىز قاجەت. بۇل جەردە بيلىكتىڭ بارلىق تارماعى: پرەزيدەنت, ۇكىمەت جانە زاڭ شىعارۋشى ورگان كۇش جۇمىلدىرۋى كەرەك. سوندىقتان الداعى سايلاۋدىڭ بۇكىل قوعام ءۇشىن ماڭىزى اسا جوعارى.
تۇڭعىش پرەزيدەنت نۇرسۇلتان ءابىش ۇلى نازارباەۆ بەس ينستيتۋتتىق رەفورما مەن ۇلت جوسپارىندا بەلگىلەگەن جۇيەلى جاڭعىرتۋلارعا سەرپىن بەرۋىمىز قاجەت. وسى ماقساتپەن ءبىز 2025 جىلعا دەيىن «وزگەرىستەر جولى: ءار ازاماتقا – لايىقتى ءومىر!» سايلاۋالدى باعدارلاماسىن قابىلدايمىز. بۇل – جان-جاقتى ويلاستىرىلعان ءارى ناقتى جۇزەگە اساتىن قۇجات.
ەكونوميكاداعى قيىندىقتارعا قاراماستان, Nur Otan پارتياسى باعدارلامانى جۇزەگە اسىرۋ ءۇشىن ۇكىمەتپەن بىرلەسىپ, الداعى بەسجىلدىققا 21 تريلليون تەڭگە ءبولۋدى جوسپارلاپ وتىر. باعدارلامادا ەلدىڭ الەۋمەتتىك ىلگەرىلەۋىنە جانە حالىقتىڭ ءال-اۋقاتىن ارتتىرۋعا باعىتتالعان ناقتى ءارى ءتيىمدى شارالار ۇسىنىلادى.
پارتيا جۇرتشىلىقتان كەلىپ تۇسكەن ۇسىنىس-تىلەكتەردى نازارعا الدى. ءبىزدىڭ باعدارلامامىزدى بۇكىل ەلىمىز دايىندادى دەۋگە تولىق نەگىز بار.
قۇرمەتتى پارتيالاستار, جولداستار!
ءبىزدىڭ باعدارلامامىزدا نەگىزگى ءتورت باسىمدىق بار.
ءبىرىنشى – ءار ازاماتقا ءوز الەۋەتىن جۇزەگە اسىرۋ ءۇشىن تەڭ مۇمكىندىك بەرۋ.
ءبىز الەۋمەتتىك-ەكونوميكالىق ساياساتتا نارىق تاسىلدەرىن باسشىلىققا الامىز. قارجىنى جانە جاردەماقىنى نەگىزسىز وڭدى-سولدى تاراتۋدى دوعارۋ قاجەت. مەملەكەت اتاۋلى الەۋمەتتىك كومەكتى شىن مانىندە مۇقتاج ادامدارعا بەرۋ كەرەك.
ەڭ باستىسى – الەۋمەتتىك ادىلدىك. سول سەبەپتى مۇقتاج جاندارعا قامقورلىق جاساۋعا باسا ءمان بەرەمىز. الەۋمەتتىك ساياساتتى جۇرگىزگەندە قيىندىققا تاپ بولعان ازاماتتارعا اتاۋلى كومەك كورسەتۋ شارالارى كۇشەيتىلەدى.
الداعى بەس جىل ىشىندە الەۋمەتتىك تولەمدەردى جىل سايىن يندەكستەۋ ءۇشىن 3 تريلليون تەڭگەدەن استام قاراجات بولىنەدى. ورتاق زەينەتاقى مولشەرى دە جىل سايىن يندەكستەلەتىن بولادى. بۇل رەتتە, ءبىز مۇنى ينفلياتسيا دەڭگەيىنە 2 پايىز قوسىپ جۇزەگە اسىرۋدى ۇسىنىپ وتىرمىز.
تۇراقتى كۇتىمگە مۇقتاج جانە جەكە كومەكشى قىزمەتىن پايدالانبايتىن ءبىرىنشى توپتاعى مۇمكىندىگى شەكتەۋلى ازاماتتاردىڭ بارلىعىنا قوسىمشا الەۋمەتتىك قولداۋ كورسەتىلەدى. وسىعان وراي بەرىلەتىن ارناۋلى جاردەماقى ەڭ تومەنگى كۇنكورىس دەڭگەيىنىڭ 1,4 ەسە كوبەيتىلگەن مولشەرىنە تەڭ بولادى. الداعى بەس جىل ىشىندە ءبىز ەرەكشە كۇتىمدى قاجەتسىنەتىن ادامداردى ارناۋلى تەحنيكالىق قۇرالدارمەن قامتاماسىز ەتەمىز. سونداي-اق ولارعا تولىقتاي وڭالتۋ-ساۋىقتىرۋ قىزمەتتەرى ۇسىنىلادى.
بىراق ەڭ باستىسى, ءار ادامعا تابىس تابۋ مۇمكىندىگىن بەرۋ كەرەك. بۇل رەتتە, ءبىز ناقتى شارالار قابىلدايمىز. سونىڭ ناتيجەسىندە, 2025 جىلعا قاراي مۇمكىندىگى شەكتەۋلى ازاماتتاردى جۇمىسپەن قامتۋ كورسەتكىشى 30 پايىزعا جەتەدى.
وسىنداي جانداردىڭ كاسىبي قىزمەتپەن اينالىسۋىمەن بىرگە, ءبىلىم الۋىنا دا جاعداي جاساۋ ماڭىزدى. بەس جىل ىشىندە كوللەدجدەر مەن جوعارى وقۋ ورىندارى ينكليۋزيۆتى ءبىلىم بەرۋ جۇيەسىمەن تولىق قامتىلادى. سونىمەن قاتار مەكتەپكە دەيىنگى بارلىق مەكەمە مەن مەكتەپتەردە بۇل كورسەتكىشتى كەزەڭ-كەزەڭمەن 70 پايىزعا دەيىن جەتكىزەمىز.
ءبىز تەك الەۋمەتتىك كومەككە مۇقتاج جاندارعا عانا ەمەس, حالىقتىڭ وزگە دە توپتارىنا قولداۋ كورسەتەمىز.
پارتيالىق تىزىمدەگى 20 پايىزدىق كۆوتا جاس كوشباسشىلاردى قولداۋدىڭ ناقتى تەتىگىنە اينالدى. Nur Otan-نىڭ قاتارىنا ءبىلىمدى, قايسار جانە جىگەرلى جاستار قوسىلدى.
ايەلدەردىڭ قوعامدىق-ساياسي ومىردەگى, ەكونوميكانىڭ بارلىق سەكتورىنداعى ءرولىن كۇشەيتۋ – الەمدىك ءۇردىس. قازىرگى ۋاقىتتا پارتيالىق ءتىزىمنىڭ 30 پايىزى ايەلدەردەن قۇرالعان. بۇل – ايەلدەر قاۋىمى ءۇشىن مەملەكەت باسقارۋ ىسىنە اتسالىسۋعا جول اشاتىن ناقتى الەۋمەتتىك مۇمكىندىك.
پارتيانىڭ بەلسەندى قاتىسۋىمەن الەۋمەتتىك كودەكس ازىرلەنەدى. بۇل مازمۇنى جاعىنان مۇلدە جاڭا قۇجات بولماق. كودەكستە قوعام مەن مەملەكەت اراسىنداعى ءوزارا كەلىسىم ورناتۋدىڭ تىڭ تاسىلدەرى كورسەتىلەتىن بولادى.
ەكىنشى باسىمدىق – سالاماتتى زياتكەر ۇلت قالىپتاستىرۋ.
جاڭا جاھاندىق سىن-قاتەرلەر ەسكەرىلە وتىرىپ, ءبىلىم, عىلىم, دەنساۋلىق ساقتاۋ, مادەنيەت جانە سپورت سالالارىنا جۇمسالاتىن قاراجات ۇلعايتىلاتىن بولادى. بۇل – ادام كاپيتالىنا, ەلىمىزدىڭ بولاشاعىنا سالىناتىن ستراتەگيالىق ينۆەستيتسيا.
دەنساۋلىق ساقتاۋ سالاسىن قارجىلاندىرۋ كولەمى ىشكى جالپى ءونىمنىڭ 5 پايىزىنان كەم بولمايدى. جاڭا ەپيدەميالارعا ءاردايىم دايىن بولۋ كەرەك. تسيفرلاندىرۋدى, تەلەمەديتسينانى, بيولوگيالىق قاۋىپسىزدىك ينفراقۇرىلىمىن قامتيتىن ءبىرتۇتاس ۇلتتىق جۇيە قۇرۋ ءىسى اياقتالادى.
نۇر-سۇلتان مەن الماتى قالالارىندا كوپبەيىندى ەكى عىلىمي-يننوۆاتسيالىق كلينيكا سالىنادى. وڭىرلىك مەديتسينانى دامىتۋ ءۇشىن ءبىز ەلىمىزدىڭ بارلىق وبلىسىندا 20 زاماناۋي مەديتسينالىق ورتالىق سالاتىن بولامىز. اۋداندىق اۋرۋحانالار مەن پەرزەنتحانالاردى, اۋىلدىق ەمدەۋ مەكەمەلەرىن بارلىق قاجەتتى قۇرال-جابدىقپەن قامتاماسىز ەتەمىز.
2023 جىلعا قاراي دارىگەرلەردىڭ ەڭبەكاقىسى 2,5 ەسە وسەدى.
باستى ماقسات – قازاقستاندىقتاردىڭ ورتاشا ءومىر ءسۇرۋ جاسىن 75-كە دەيىن ۇزارتۋ.
سالاماتتى ءومىر سالتى مەن بۇقارالىق سپورتتى دامىتۋ زور ماڭىزعا يە. سوندىقتان بالالار مەن جاسوسپىرىمدەر كلۋبتارىن تەك شاعىن جانە ورتاشا قالالاردا عانا ەمەس, سونداي-اق تىرەك بولارلىق بارلىق اۋىلدا اشۋ قاجەت. سونىمەن قاتار جاتتىقتىرۋشى-وقىتۋشىلاردىڭ ەڭبەكاقىسىن كوتەرۋ كەرەك. ءاربىر اۋىلدىق وكرۋگتە سپورت جونىندەگى نۇسقاۋشى لاۋازىمىن ەنگىزگەن ءجون.
قۇرمەتتى سەزگە قاتىسۋشىلار!
ەلىمىز باسەكەگە قابىلەتتى بولۋ ءۇشىن ءبىلىم جانە مادەنيەت سالاسىن وركەندەتۋگە, جاستاردى قولداۋعا باسا ءمان بەرۋىمىز كەرەك.
بۇكىل قازاقستان بويىنشا 800 جاڭا مەكتەپ سالىنادى. سونىڭ ناتيجەسىندە ءبىز اپاتتى جانە ءۇش اۋىسىممەن وقىتاتىن مەكتەپتەردىڭ ماسەلەسىن تولىق شەشەمىز. بارلىق مەكتەپ ينتەرنەتپەن, كومپيۋتەرمەن جانە پاندىك كابينەتتەرمەن قامتاماسىز ەتىلەدى.
اۋىل مەكتەپتەرىنىڭ دامۋىنا ەرەكشە كوڭىل بولىنەدى. شاعىن قالالار مەن
اۋدان ورتالىقتارىندا, اۋىلدىق جەرلەردە ورنالاسقان 5 مىڭنان استام مەكتەپ جاڭعىرتىلۋى كەرەك. پەداگوگ ماماندارعا سۇرانىستى ارتتىرىپ, ءبىلىم ساپاسىن جاقسارتۋ ماقساتىندا ولاردىڭ جالاقىسى 2 ەسە كوبەيەدى.
جاھاندىق ءبىلىم جانە يننوۆاتسيالىق جۇيەگە ەنگەن زاماناۋي زەرتتەۋ ۋنيۆەرسيتەتتەرى ءبىلىم ەكونوميكاسىنىڭ نەگىزىن قۇراۋعا ءتيىس. نازارباەۆ ۋنيۆەرسيتەتىنىڭ تاجىريبەسى بويىنشا تاعى دا كەم دەگەندە 2 وزىق وڭىرلىك جوعارى وقۋ ورنى اشىلادى. 2025 جىلعا قاراي جوعارى ءبىلىم الۋ ءۇشىن بولىنەتىن گرانتتىڭ سانى 50 پايىزعا ارتادى. بۇل – 75 مىڭ جاس ازاماتىمىز جوعارى ءبىلىمدى تەگىن الادى دەگەن ءسوز.
ءبىز ستۋدەنتتەرگە ماتەريالدىق قولداۋ كورسەتۋ ءىسىن جالعاستىرا بەرەمىز. ستۋدەنتتەردىڭ ستيپەندياسى 2 ەسەگە, ماگيسترانتتار مەن دوكتورانتتاردىڭ ستيپەندياسى 1,5 ەسەگە كوبەيەدى. 2025 جىلعا قاراي كوللەدجدەر مەن ۋنيۆەرسيتەتتەر جاتاقحانالارىنداعى ورىندار سانى كەم دەگەندە 50 مىڭعا ارتادى.
«العاشقى جۇمىس ورنى» جوباسى ىسكە قوسىلادى. بۇل جوبا جىلىنا 5 مىڭ ادامدى قامتيتىن بولادى. بيزنەس سالاسىنداعى كەلەشەگى زور يدەيالاردى جۇزەگە اسىرۋ ءۇشىن جاس كاسىپكەرلەرگە جىل سايىن 10 مىڭ گرانت ۇسىنىلادى.
جۇمىس ىستەپ جۇرگەن جاستارعا جىلىنا 3 مىڭ جالدامالى پاتەر بەرىلەدى. ءبىز جاستار ۇيىمدارى مەن ەرىكتىلەر قوزعالىسىنىڭ جوبالارىن قارجىلاندىرۋ كولەمىن 1,5 ەسەگە ارتتىرۋعا ءازىرمىز. وسىنداي قولداۋ شارالارى وقىمايتىن جانە جۇمىس ىستەمەيتىن جاستاردىڭ سانىن 2025 جىلعا قاراي 100 مىڭ ادامعا ازايتۋعا مۇمكىندىك بەرەدى.
سونىمەن قاتار بالالارعا قوسىمشا ءبىلىم بەرۋ, بوس ۋاقىتتى ءتيىمدى پايدالانۋ, شىعارماشىلىق قابىلەتتى دامىتۋ ماسەلەلەرى شەشىمىن تابادى. بارلىق مەكتەپتە سپورتپەن جانە شىعارماشىلىقپەن اينالىسۋعا جاعداي جاسالادى. 3-6 جاس ارالىعىنداعى بالالار مەكتەپكە دەيىنگى بىلىممەن تولىق قامتىلۋعا ءتيىس. وسى رەتتە, تۇرعىلىقتى جەرىنە قاراماستان بالانىڭ بارىنە بىردەي كوڭىل بولىنەدى.
ءبىز «رۋحاني جاڭعىرۋ» باعدارلاماسىن بەلسەندى تۇردە جۇزەگە اسىرا بەرەمىز. بۇل اسا ماڭىزدى قۇجات ۇرپاقتىڭ ساناسىن سەرپىلتىپ, ۇلتتىڭ جاڭا بولمىسىن قالىپتاستىرۋعا ارقاۋ بولادى.
بۇدان بولەك, مەملەكەتتىك ءتىلدىڭ قولدانىلۋ اياسىن ودان ءارى كەڭەيتۋگە كۇش جۇمىلدىرامىز. انا ءتىلىمىزدى ارداقتاماساق – ەلدىگىمىزگە سىن.
كەز كەلگەن شارۋاشىلىق قىزمەتىمەن اينالىسقان جاعدايدا تابيعاتتى ساقتاۋ جانە ونى قورعاۋ مىندەتى باستى قاعيداتتىڭ بىرىنە اينالادى. جاڭا ەكولوگيالىق كودەكس جانە «جاسىل ءوسىم» تۇجىرىمداماسى قابىلدانادى.
ءبىز پراگماتيزم قۇندىلىقتارىن, ۇنەمدىلىك, قاناعاتشىلدىق جانە ۇستامدىلىق مادەنيەتىن ورنىقتىرۋىمىز كەرەك.
ءۇشىنشى باسىمدىق – ەكونوميكا مەن وڭىرلەردىڭ ورنىقتى دامۋى.
الەمدىك ەكونوميكانىڭ ۇزاق مەرزىمدى داعدارىسقا تاپ بولىپ وتىرعانى انىق. ارينە, قازاقستان دا بۇدان ەداۋىر قىسىم كورەتىنى بەلگىلى. دەگەنمەن, داعدارىس – جاڭا ەكونوميكالىق مودەل قۇرۋ ءۇشىن جۇيەلى رەفورمالار جۇرگىزۋدىڭ مۇمكىندىگى.
بۇكىل الەمدىك ەكونوميكا عىلىمى مەن سانالى ساياساتكەرلەر ادامزات تاريحىندا بۇرىن-سوڭدى بولىپ كورمەگەن جاھاندىق داعدارىس جاعدايىندا مەملەكەتتىڭ ەكونوميكالىق ۇدەرىستەردى باسقارۋداعى ءرولى شىن مانىندە ارتادى دەگەن قورىتىندىعا كەلىپ وتىر. قالاي دەگەندە دە, وسىلاي بولۋعا ءتيىس.
ۇكىمەتتەردىڭ باستى مىندەتى – ءوز مەملەكەتى ازاماتتارىنىڭ تۇرمىس ساپاسىن لايىقتى قامتاماسىز ەتۋ. ءبىزدىڭ ۇكىمەت وسى ىرگەلى ماقساتقا قول جەتكىزۋدى كوزدەپ وتىر.
ەكونوميكالىق وسىمگە قول جەتكىزۋ ءۇشىن نەگىزىنەن مىناداي ماسەلەلەرگە باسا ءمان بەرىلەدى:
– قاتاڭ, بىراق تەڭگەرىمدى ماكروەكونوميكالىق ساياسات;
– جەكە سەكتوردى قولداۋ;
– ازاماتتار الدىنداعى الەۋمەتتىك مىندەتتەمەلەردى ورىنداۋ.
مۇنداي ستراتەگيا بيۋدجەت شىعىندارىن قاتاڭ باقىلاۋعا الۋعا, ءتيىمسىز جەڭىلدىكتەر مەن سۋبسيديالاردى الىپ تاستاۋعا, تومەن ينفلياتسيانى ساقتاۋعا جانە تەڭگەنىڭ ەركىن باعامىن ۇستانۋعا نەگىزدەلەدى.
فيسكالدى سالادا بيۋدجەت شىعىندارى وڭتايلاندىرىلادى, مۇناي تاپشىلىعى قىسقارادى, ۇلت بايلىعىن ادىلەتتى ءبولۋ قامتاماسىز ەتىلەدى. اقشا-نەسيە ساياساتى جالپىۇلتتىق الەۋمەتتىك-ەكونوميكالىق باسىمدىقتار تۇرعىسىنان جۇزەگە اسىرىلادى. ناتيجەسىندە بيۋدجەتتىڭ مۇنايدان تىس بولىگىنىڭ تاپشىلىعى 2025 جىلعا قاراي, ۇكىمەتتىڭ ەسەبى بويىنشا – 6 پايىزدى, ال جالپى تاپشىلىق 3 پايىزدان اسپايتىن كولەمدى قۇرايتىن بولادى.
ءۇش جىل ىشىندە ينفلياتسيا 4 پايىزعا, ءتىپتى بۇل كورسەتكىشتەن دە تومەن دەڭگەيگە دەيىن ازايۋى ىقتيمال. يندۋستريالاندىرۋدىڭ بەلسەندى جۇرگىزىلۋى وڭدەۋشى ونەركاسىپتەگى ءوندىرىس كولەمىن 1,5 ەسە ۇلعايتۋعا جول اشادى.
ءبىز ءۇشىن جاڭا باعىتتار – IT سالاسى مەن تۋريزمگە شىن مانىندە باسىمدىق بەرۋ كەرەك. وسى ەكى سالا بويىنشا 300 مىڭعا جۋىق جاڭا جۇمىس ورنى اشىلادى.
مالىمەتتەردى وڭدەۋ مەن ساقتاۋ سالاسىنا سالىناتىن ينۆەستيتسيالار 6 ەسە ۇلعايادى. ءبىز قازاقستاننىڭ ەكسپورتىن دا بەلسەندى تۇردە ىلگەرىلەتەتىن بولامىز. ماقساتىمىز – شيكىزاتتىق ەمەس ەكسپورت كولەمىن 2 ەسە, ياعني جىلىنا 40 ميلليارد دوللارعا دەيىن ۇلعايتۋ. اگرارلىق سەكتور دا زور الەۋەتكە يە. سالانى دامىتۋدىڭ جاڭا مودەلىنە قاراي قادام باسۋ كەرەك. بارلىق قارجىلىق جانە قارجىلىق ەمەس قولداۋ تەتىكتەرىن ستراتەگيالىق مىندەتتەردى شەشۋگە باعىتتاپ, تولىعىمەن تسيفرلاندىرۋ قاجەت.
اۋىل شارۋاشىلىعى ونىمدەرىن وندىرەتىن جانە وڭدەيتىن 7 ءىرى ەكوجۇيە قۇرىلاتىن بولادى. بۇعان 350 مىڭ فەرمەرلىك جانە ءۇي شارۋاشىلىقتارى جۇمىلدىرىلادى. بۇل دەگەنىمىز – اۋىلدىقتار ءۇشىن جاڭا جۇمىس ورىندارى ءارى تۇراقتى تابىس كوزى.
600 مىڭ گەكتاردان استام جاڭا سۋارمالى جەرلەردى يگەرۋ جونىندە شارالار قابىلداعان ءجون.
2025 جىلعا قاراي اۋىل شارۋاشىلىعىنىڭ جيىنتىق ءونىمىنىڭ كولەمى ۇشتەن بىرىندەي مولشەرگە, ال ەكسپورت كولەمى 2 ەسەگە دەيىن ۇلعايادى.
كاسىپكەرلىكتى قولداۋ اياسىندا باسەكەلەستىكتى دامىتۋعا, زاڭ ۇستەمدىگىن نىعايتۋ مەن سوت جۇيەسىن جاڭعىرتۋعا ايرىقشا نازار اۋدارىلادى. بۇل – نەگىزگى باعىتتار. ونسىز ءتيىمدى نارىقتىق ەكونوميكانى قۇرۋ مۇمكىن ەمەس.
قازاقستان بيزنەس جۇرگىزۋ ءۇشىن قولايلى شارتتار جاسالعان, مەيلىنشە دامىعان ەلدەر قاتارىنا قوسىلۋعا ءتيىس. بيزنەسكە جاسالعان كەز كەلگەن زاڭسىز كەدەرگى اۋىر قىلمىس رەتىندە قاراستىرىلاتىن بولادى.
تىكەلەي شەتەلدىك ينۆەستيتسيا كولەمىن جىلىنا 30 ميلليارد دوللارعا جەتكىزۋدى دە جوسپارلاپ وتىرمىز.
شاعىن جانە ورتا بيزنەسكە جان-جاقتى قولداۋ كورسەتىلەدى. 2025 جىلعا قاراي شاعىن جانە ورتا بيزنەس 4 ميلليون قازاقستاندىقتى جۇمىسپەن قامتىپ, ىشكى جالپى ءونىمنىڭ 35 پايىزىن وندىرەدى. 50 مىڭ ازاماتىمىز, ەڭ الدىمەن, اۋىل تۇرعىندارى, ءوز بيزنەسىن اشۋ ءۇشىن شاعىن نەسيە الادى. جوسپارلانعان ەكونوميكالىق باعداردى جۇزەگە اسىرۋ 2025 جىلعا قاراي جىل سايىنعى ءوسىم قارقىنىن 5 پايىزدان جوعارى دەڭگەيدە قامتاماسىز ەتۋگە مۇمكىندىك بەرەدى.
وڭىرلەردەگى تۇرمىس ساپاسىن جاقسارتۋ باستى نازارىمىزدا بولادى. جاڭا وڭىرلىك ستاندارتتارعا سايكەس 3,5 مىڭنان استام اۋىل جاڭعىرتىلاتىن بولادى. بارلىق قالالار مەن اۋىلدار سۋمەن قامتاماسىز ەتىلەدى. 246 ءىرى ەلدى مەكەنگە گاز تارتىلادى. مۇنداي ەلدى مەكەندەردە 900 مىڭ ادام تۇرادى. ولاردىڭ 350 مىڭنان استامى – نۇر-سۇلتان, قاراعاندى, جەزقازعان جانە تەمىرتاۋ قالالارىنىڭ تۇرعىندارى.
53 تازالاۋ قوندىرعىسىن ورناتۋ جانە جاڭعىرتۋ ارقىلى ەلىمىزدىڭ بارلىق وڭىرىندەگى اعىن سۋدى تازارتۋعا مۇمكىندىك تۋادى. بۇل – وسى سالاداعى تۇيتكىلدى ماسەلەنىڭ ۇتىمدى شەشىمى بولماق.
جول قۇرىلىسى قولعا الىنادى. ءار اۋىلعا دەيىنگى بارلىق جولدار, ياعني 27 مىڭ شاقىرىم جول جوندەۋدەن وتكىزىلەدى.
وبلىس ورتالىقتارى مەن رەسپۋبليكالىق ماڭىزى بار قالالار جىلدامدىعى جوعارى 5G ينتەرنەتىمەن قامتاماسىز ەتىلەدى. سونىمەن قاتار اۋىلداردىڭ 99 پايىزى وسىنداي مۇمكىندىككە يە بولادى.
اۋىلدىق جەرلەرگە قاجەت مامانداردى, دارىگەرلەردى, مۇعالىمدەردى تارتۋعا نازار اۋدارىلادى. ولارعا ءۇي سالۋ ءۇشىن جىلىنا 22 مىڭ جەر تەلىمى بولىنەدى. وبلىس ورتالىقتارىندا جانە شاعىن قالالاردا جىلىنا 25 مىڭ جەر تەلىمى بەرىلەدى. جالپى العاندا, الداعى بەس جىلدا شامامەن ءبىر ميلليون وتباسى ءۇشىن 100 ميلليون شارشى مەتردەن استام تۇرعىن ءۇي سالىنادى. سونىڭ ىشىندە 300 مىڭعا جۋىق پاتەردى الەۋمەتتىك تۇرعىن ءۇي رەتىندە جەڭىلدىكپەن پايدالانۋعا بولادى.
ءشول دالا ماسەلەسىن, سەمەي يادرولىق پوليگونى, «بايقوڭىر» كوسمودرومى توڭىرەگىندەگى ەكولوگيالىق تۇيتكىلدەردى شەشۋ جۇمىستارى جالعاسىن تابادى.
ارالدىڭ سولتۇستىك بولىگىن قالپىنا كەلتىرۋ جانە جايىق وزەنى الابىنىڭ ەكولوگيالىق جۇيەسىن ساۋىقتىرۋ جونىندە شارالار قابىلدانادى.
ءتورتىنشى باسىمدىق – ەسەپ بەرەتىن, «حالىق ۇنىنە قۇلاق اساتىن» مەملەكەت جانە جاۋاپتى ازاماتتار.
مەملەكەت پەن قوعامنىڭ ءوزارا سەنىم مەن جاۋاپكەرشىلىك قاعيداتتارىنا نەگىزدەلگەن ءوزارا ءىس-قيمىلىنسىز ەلدىڭ جۇيەلى جانە تۇراقتى دامۋى مۇمكىن ەمەس.
ەل ءۇشىن كۇردەلى ۋاقىتتا پارتيا حالىققا ەتەنە جاقىنداي تۇسەدى. ءبىزدىڭ مىندەتىمىز – ازاماتتاردىڭ ءوزىن جانە ۇرپاقتارىن لايىقتى تۇرمىسپەن قامتاماسىز ەتسەم دەگەن ءادىل ءارى ورىندى تىلەگىمەن ۇشتاسىپ جاتقان نيەتتەستىك پەن ءىس-قيمىل بىرلىگىنە قول جەتكىزۋ. تاعى دا اتاپ وتەيىن, ءبىزدىڭ جۇمىسىمىزداعى باستى باعدار – جۇرتشىلىقتىڭ تالاپ-تىلەكتەرى مەن مۇڭ-مۇقتاجدىقتارى. مەملەكەت حالىقتىڭ ءۇنى مەن پىكىرىنە قۇلاق اسۋعا مىندەتتى. پارلامەنت پەن حالىققا ەسەپ بەرەتىن ۇكىمەت ءدال وسى باعىتتا جۇمىس ىستەيتىن بولادى. بۇل ءۇشىن بىزدەر, پارتيالاستار, قوعامىمىزدى تولعاندىراتىن بارلىق ماسەلەنى جاقسى بىلۋگە, ونىڭ جىلدام ءارى ءتيىمدى شەشىمىن تابۋعا ءتيىسپىز.
پارتيا جۇمىسىنىڭ ءتيىمدى ءىس-قيمىل كوەفيتسيەنتى ازاماتتارىمىزدىڭ تۇرمىسىن جاقسارتاتىن تاجىريبەلىك شەشىمدەرگە بايلانىستى بولادى. بوس ءسوز بەن قۇر ۋادە ەمەس, ناقتى ءىس قانا حالىق سەنىمى مەن ساياسي كوشباسشىلىق ءۇشىن كۇرەستەگى ەڭ مىقتى ارگۋمەنت بولا الادى. سوندىقتان پارتيا مەملەكەتتىك باسقارۋ جۇيەسىن جاڭعىرتۋمەن تىكەلەي اينالىسادى. بۇل – ستراتەگيالىق سيپاتى بار مىندەت.
ءبىزدىڭ نەگىزگى باسىمدىعىمىز – سىبايلاس جەمقورلىقپەن كۇرەس. بۇل – ناۋقانشىلدىق ەمەس, سالماقتى, جۇيەلى جۇمىس. مەملەكەتتىك ورگانداردىڭ قىزمەتى اشىق ءارى جۇرتشىلىقتىڭ ۇدايى باقىلاۋىندا بولۋعا ءتيىس.
ۆولونتەرلىكتى جانە ۇكىمەتتىك ەمەس سەكتوردى جان-جاقتى قولداۋ – ەلدى ورنىقتى دامىتۋدىڭ كەپىلى. قوعام مەن ازاماتتىق سەكتور مەملەكەت قىزمەتىنىڭ بارلىق ماڭىزدى ماسەلەلەرى بويىنشا شەشىم قابىلداۋ ۇدەرىسىنە تولىققاندى اتسالىسۋعا ءتيىس.
سونىمەن قاتار پارتيا جەرگىلىكتى ءوزىن-ءوزى باسقارۋ تۇجىرىمداماسىن بەلسەندى ىلگەرىلەتەتىن بولادى. بۇل قۇجاتتا اۋىل اكىمدەرىن سايلاۋ, «حالىق اتسالىساتىن» بيۋدجەتتى رەتتەۋ, جەرگىلىكتى بيلىك ورگاندارىنا ازاماتتىق باقىلاۋ جۇرگىزۋ ماسەلەلەرى قامتىلادى.
البەتتە, جەرگىلىكتى ءوزىن-ءوزى باسقارۋ رەفورماسى وسىمەن توقتاپ قالمايدى. پارتيا پايدالى ناتيجەلەرگە قول جەتكىزۋىنە قاراي وسى سالاداعى ءتيىمدى قۇرىلىمداردى ودان ءارى ىلگەرىلەتۋمەن اينالىسادى.
قىمباتتى پارتيالاستار!
كوپتەگەن ماڭىزدى باستامالار مەن پارتيا جوسپارلاعان وزگەرىستەر ەلباسىنىڭ باعدارلامالىق تۇرعىدا سويلەگەن سوزدەرىندە جانە مەنىڭ قازاقستان حالقىنا جولداۋلارىمدا كورىنىس تاپقان. پارتيامىزدىڭ نەگىزىن قالاعان قازاقستاننىڭ تۇڭعىش پرەزيدەنتى ستراتەگياسىنىڭ ساباقتاستىعىن ساقتاي وتىرىپ, ءبىز حالىقتىڭ تۇرمىسىن جاقسارتۋعا جانە مەملەكەتتىڭ الەۋەتىن كۇشەيتۋگە باعىتتالعان بارلىق جوسپاردى ناقتى ىسكە اسىرۋعا نيەتتىمىز.
ساياساتتىڭ ساباقتاستىعى دەگەنىمىز جاۋاپكەرشىلىك, ۇيىمشىلدىق, ەڭبەك ۇعىمدارىمەن وزەكتەس ەكەنىن قاپەردە ۇستاعان ءجون. جاۋاپسىز ءسوزۋار ساياساتكەرلەر ءوز مەملەكەتتەرىنىڭ قاۋىپسىزدىگىنە قاتەر ءتوندىرىپ, بارلىق يگىلىكتەن وپ-وڭاي باس تارتادى. ال برەست بىتىمىنەن باستاپ, كاۆكازداعى سوڭعى وقيعالارعا دەيىنگى جاڭا تاريحتان بىلەتىنىمىز – ساياسي كاتاكليزمدەر مەن قاقتىعىستار تەرريتوريادان دا ايىرىلۋعا اكەپ سوقتىرۋى مۇمكىن.
Nur Otan پارتياسى – ىزگى نيەتكە نەگىزدەلگەن ناقتى ىستەر پارتياسى. قازاقستاننىڭ جارقىن بولاشاعى ءۇشىن زور جاۋاپكەرشىلىك بىزگە جۇكتەلگەن. وتانىمىزدىڭ تاعدىرى پارتيانىڭ ستراتەگياسىن قولدايتىن بەلسەندى مۇشەلەرىنىڭ, شىنايى پاتريوتتاردىڭ قولىندا.
ەلىمىزدىڭ الدىندا تۇرعان جاڭا جاھاندىق سىن-تەگەۋرىندەر مەن قاۋىپ-قاتەرلەر بار كۇش-جىگەرىمىزدى بىرىكتىرۋدى تالاپ ەتەدى. ول ءۇشىن بۇكىل قوعامنىڭ ورتاق ىسكە جۇمىلۋى قاجەت. بارلىق ماقساتىمىزعا تەك بىرلىك مەن كەلىسىم ارقىلى جەتە الامىز. سوندىقتان ەلىمىزدە ساياسي ديالوگ مادەنيەتىن جۇيەلى تۇردە دامىتۋ ماڭىزدى.
Nur Otan تۇتاس ۇلتتى بىرىكتىرەتىن باستامالاردى ۇسىنىپ وتىر. الداعى ۋاقىتتا دا سولاي بولادى. پارتيا زاڭ ۇستەمدىگى قاعيداتىن كەڭىنەن ەنگىزەدى. ءتيىستى زاڭدىلىق, سودان تۋىندايتىن ءتارتىپ پەن ۇيلەسىم بولماسا, قوعامدا ىلگەرىلەۋگە قول جەتكىزۋ مۇمكىن ەمەس. بۇل – الەمدىك تاجىريبەدە الدەقاشان ورنىققان اكسيوما.
ءبىزدىڭ باعدارلاما دامىعان ازاماتتىق قوعام مەن ەكونوميكالىق تۇرعىدان كەمەلدەنگەن مەملەكەت قۇرۋدى كوزدەيدى. ءبىز باسقارۋشى پارتيا مارتەبەسىنە يە بولۋدىڭ ءمانى بيلىك وكىلەتتىكتەرىنە قول جەتكىزۋ ەمەس, ەل-جۇرتقا ناقتى پايدا اكەلۋگە مۇمكىندىك الۋ ەكەنىن ءاردايىم ەستە ساقتاۋعا ءتيىسپىز.
پارتيا مۇشەلەرى, اسىرەسە مەملەكەتتىك باسقارۋ جۇيەسىندەگى جوعارى لاۋازىمدا وتىرعان ازاماتتار, شىنايى ەڭبەكقورلىقتىڭ, ساياسي جاۋاپكەرشىلىكتىڭ, ازاماتتىق ءپاتريوتيزمنىڭ وزىق ۇلگىسىن كورسەتۋى كەرەك. پارتيالاستارىمىزدىڭ بولاشاقتا دا ءدال وسى ۇستانىمعا ساي بولاتىنىنا كۇمانىم جوق.
اسا قۇرمەتتى نۇرسۇلتان ءابىش ۇلى!
قۇرمەتتى سەزگە قاتىسۋشىلار!
تاۋەلسىزدىگىمىزدىڭ 30 جىلدىعى ءماجىلىس جانە ءماسليحات دەپۋتاتتارىنىڭ سايلاۋىمەن باستالماق. مۇنىڭ سيمۆولدىق ءمانى زور. بۇل دودا بارلىق مەرەيتويلىق ءىس-شارالارعا يدەولوگيالىق جانە مازمۇندىق تۇرعىدان تىڭ سەرپىن بەرەتىنى انىق. الداعى سايلاۋ قوعامنىڭ بىرتۇتاستىعىن جانە بەرەكە-بىرلىگىمىزدى بەكەمدەي تۇسەدى دەپ سەنەمىن. بۇل ناۋقاننىڭ اشىق, ءادىل ءارى زاڭدى ءوتۋى ءۇشىن بارلىق جاعدايدى جاسايمىز. مەن, مەملەكەت باسشىسى رەتىندە, مۇنى ءجىتى قاداعالايمىن. وسىعان وراي ورتالىق سايلاۋ كوميسسياسىنا جانە باس پروكۋراتۋراعا ناقتى تاپسىرما بەردىم.
بارشا سايلاۋشىلاردى ازاماتتىق بەلسەندىلىك تانىتىپ, سايلاۋعا قاتىسۋعا شاقىرامىن. ەلىمىزدىڭ يگىلىگى جانە مەملەكەتىمىزدىڭ مۇددەسى جولىندا تابىسقا بىرگە جەتە بەرەيىك!
وتانىمىز ماڭگى جاساسىن!
حالقىمىز ارقاشاندا امان بولسىن!
