اتالعان كورسەتكىشكە كوز جۇگىرتسەك, الەمدە ءبىلىم بەرۋ ساپاسى جونىنەن الدىڭعى ورىنداردى بەرمەيتىن اۋستراليا وقۋشىلارىنىڭ ماتەماتيكالىق ساۋاتتىلىعى 16,7 پايىزعا, ال وقۋ ساۋاتتىلىعى 11,5 پايىزعا تومەندەگەن. ال الپاۋىت اقش-تا 2019-2020 جىلدار بويىنشا ءبىلىم الۋشىلاردىڭ كورسەتكىشى ماتەماتيكادان 30 پايىزعا, وقۋ ساۋاتتىلىعىنان ءتىپتى 50 پايىزعا ناشارلاپ كەتكەن. ءبىلىم بەرۋ جۇيەسى وزىق ەلدىڭ ءبىرى انگليادا ءارتۇرلى الەۋمەتتىك-ەكونوميكالىق توپتار وقۋشىلارىنىڭ اراسىنداعى الشاقتىق 46 پايىزعا ارتىپتى.
وسى رەتتە ءار ەل ماسەلەنى شەشۋدىڭ جولدارىن ىزدەستىرىپ جاتىر. سونىڭ ىشىندە ۇلىبريتانيانىڭ ءبىلىم بەرۋ جۇيەسىندەگى جوعارىدا اتالعان تۇيتكىلدىڭ ءتۇيىنىن تارقاتۋ ماقساتىنداعى قولعا العان باعىتى بولەكتەۋ سەكىلدى. بۇل ەلدە «ۇلتتىق رەپەتيتورلىق باعدارلاما» جوباسى بيىلعى ماۋسىمنان باستاپ ىسكە اسىرىلىپ كەلەدى. ويتكەنى انگليا ۇكىمەتى رەپەتيتورلىقتى جاعدايى جاقسى وتباسىنىڭ بالالارى پايدالانا الاتىن قىزمەت ەمەس, ءارتۇرلى الەۋمەتتىك-ەكونوميكالىق توپتار اراسىنداعى وقىتۋ ساپاسىنىڭ الشاقتىعىن جويۋ مۇمكىندىگى رەتىندە قاراستىرىپ وتىر. ءىس جۇزىندە COVID-19 پاندەمياسىنا بايلانىستى ۇلىبريتانيادا مەكتەپتەر جابىلعانعا دەيىن رەپەتيتورلىق قىزمەتتەر الەۋمەتتىك-ەكونوميكالىق جاعدايى جاقسى وتباسىلاردان شىققان وقۋشىلار ءۇشىن عانا قولجەتىمدى مۇمكىندىك بولىپ سانالدى. ال قازىرگى تاڭدا انگلياداعى اتالعان قىزمەتكە دەگەن قوعامدىق كوزقاراس ۇكىمەتتىڭ شەشىمى ناتيجەسىندە تۇبەگەيلى وزگەرەتىن سياقتى.
Theguardian.com سايتىنداعى وسى ماسەلەگە قاتىستى ماقالا: «پاندەميا كەزىندە بىلىمنەن ارتتا قالىپ قويعان وقۋشىلاردىڭ كوپشىلىگى پروپورتسيونالدى ەمەس كەدەيلەردەن شىققان, بىراق ونلاين وقۋدىڭ جەڭىلدىكتەرى ولاردىڭ ۇلگەرۋىنە كومەكتەسە الادى», دەپ باستالىپتى. ۇلىبريتانيا ۇكىمەتى قولعا العان «ۇلتتىق رەپەتيتورلىق باعدارلاما» جوباسى بويىنشا مەكتەپتەر ارنايى بەلگىلەنگەن تىزىمدەگى رەپەتيتورلىق قىزمەت كورسەتەتىن ورتالىقتارمەن نەمەسە ماماندارمەن جۇمىس ىستەي الادى. ءارى بۇل قىزمەت – تەگىن. مۇنداي قىزمەتتى تۇرمىسى تومەن وتباسىلاردان شىققان بالالاردىڭ پايدالانۋىنا باسىمدىق بەرىلەدى. وسى ءۇشىن مەملەكەت رەپەتيتورلىق قىزمەت كورسەتەتىن مەكەمەلەرمەن ارىپتەستىك ورناتقان.
سونداي-اق «ۇلتتىق رەپەتيتورلىق باعدارلاما» جوباسىنىڭ نەگىزىندە تالىمگەرلىك قىزمەتكە دە قول جەتكىزۋگە بولادى. بۇل ءۇشىن ۇكىمەت ارنايى زەرتتەۋلەردىڭ ناتيجەسىندە ءبىلىم ساپاسى قاتتى تومەندەپ كەتكەن وڭىرلەردەگى مەكتەپتەرگە تالىمگەرلىك قىزمەت ۇسىنادى. تالىمگەر وقۋشىلارعا وقۋ ۇلگەرىمىن جاقسارتۋعا, بىلايشا ايتقاندا, ساباق وقۋعا, ءۇي تاپسىرماسىن ورىنداۋعا كومەكتەسەدى. ال تالىمگەرلەردىڭ جالاقىسىن ۇكىمەت تولەيدى.
ءبىلىم بەرۋ قايىرىمدىلىق قورىنىڭ (EEF – Education Endowment Foundation) توراعاسى پيتەر لامپل: «مەكتەپتەگى وقۋ تۋرالى ءسوز ەتسەك, COVID-19 بالالارىمىزدىڭ دامۋ پەرسپەكتيۆاسىنا زيانىن تيگىزىپ, ولاردىڭ بولاشاعىنا ۇلكەن قاۋىپ ءتوندىردى. كوپتەگەن وقۋشى ءوزىنىڭ وقۋ ۇلگەرىمى جاعىنان تىم ارتتا قالىپ بارادى. ولار – ادەتتە سول تۇرمىسى تومەن, جاعدايى ناشار كەدەي وتباسىلاردان شىققان بالالار», دەيدى. شەتەلدىك ساراپشىنىڭ ءدال وسى پىكىرى ءبىزدىڭ ەلگە دە قاتىستى ايتىلعانداي. الايدا بىزدە مۇنداي ماسەلە ناق وسىنداي ۇلتتىق باعدارلامامەن شەشىمىن تاپپاي تۇر.
سونىمەن, وسى ماتەريالىمىزداعى باستى سۇراققا كەلسەك: رەپەتيتورلىق قىزمەت ءبىلىمنىڭ ساپاسىن ساقتاي الا ما؟ سۇراققا ءمان بەرەلىك. ءيا, ءدال قازىرگىدەي بىلىمدەگى داعدارىس ۋاقىتىندا ءبىلىمنىڭ ساپاسىن جوعارىلاتۋ جايىندا ءسوز ەتۋ دە قيسىنسىز. ونى دامىعان ەلدەردىڭ ءبىلىم ساپاسىنا قاتىستى حالىقارالىق كورسەتكىشتەردەن دە انىق كورۋگە بولادى. سول سەبەپتى الەم ەلدەرىنىڭ الدىنداعى باستى ماقسات وسىعان دەيىن قول جەتكىزگەن ءبىلىمنىڭ ساپاسىن ساقتاپ قالۋ بولىپ تۇر.
