وڭىرلىك كوممۋنيكاتسيالار قىزمەتىندە وتكەن بريفينگتە اۋدان اكىمى نۇرلان بايعۇت بۇگىندە جۇمىس ىستەپ جاتقان 32 كاسىپورىن 10 ملرد 321 ملن تەڭگەنىڭ ءونىمىن وندىرگەنىن اتاپ ءوتتى. الەۋمەتتىك جۇمىس ورىندارىن ۇيىمداستىرۋ بويىنشا اۋدان كولەمىندەگى 16 جۇمىس بەرۋشى مەكەمەلەرىمەن كەلىسىم-شارت ءتۇزىلىپ, 154 ازامات جولدانعان.
"بيىل اۋداندا جالپى 54 كوشە تولىعىمەن جوندەۋدەن ءوتىپ, ەل يگىلىگىنە پايدالانۋعا بەرىلىپ وتىر. سونىڭ ىشىندە ساستوبە جانە تۇلكىباس كەنتىندەگى 30 كوشە "اۋىل-ەل بەسىگى" باعدارلاماسى اياسىندا جوندەلگەن. ىشكى كوشەلەردىڭ قاناعاتتاندىرارلىق جاعدايى 80 پايىزدان اسىپ وتىر. سونداي-اق, تۇنگى جارىقتاندىرۋدى ءبىرىنشى كەزەكتە قاجەت ەتەتىن 15-كە جۋىق كوشەگە زاماناۋي جارىق شامدار ورناتىلدى. "قامقورلىق" جوباسىنا قاتىسۋشى 93 وتباسىنا 215 ملن تەڭگەدەن استام قارجىعا ءتۇرلى كومەك كورسەتىلدى. اۋدان اكىمدىگىنىڭ ۇيىتقى بولۋىمەن 21 وتباسى باسپاناعا قول جەتكىزگەن. سونىڭ ىشىندە 6 وتباسىنا دەمەۋشىلەر ەسەبىنەن تۇرعىن ءۇي بەرىلسە, 15 وتباسىنا مەملەكەتتىك باعدارلامامەن پاتەر كىلتى تابىستالدى. سونداي-اق, 9 وتباسىنىڭ تۇرعىن ءۇيى دەمەۋشىلەر ەسەبىنەن جوندەۋدەن ءوتتى", دەدى نۇرلان مارحابات ۇلى.
اۋداندا مال شارۋاشىلىعىندا بيىل 10-15 باسقا ارنالعان 76 شاعىن مال بورداقىلاۋ الاڭدارى, 5-10 باستىق 24 وتباسىلىق ءسۇت فەرماسى قۇرىلعان. سونىمەن قاتار, كەلتەماشات اۋىلدىق وكرۋگىندە "اقبيىك اگرو" اوك سىيىمدىلىعى 600 باس تۇيەتاۋىق وسىرەتىن فەرما اشىلىپ, جۇمىس ىستەۋدە. الما باعى شارۋاشىلىعىن دامىتۋدىڭ 2021-2025 جىلدارعا ارنالعان دامۋ كونتسەپتسياسىنا سايكەس, قوسىمشا الما باۋ كولەمىن 760 گەكتارعا ۇلعايتىپ, بارلىعى 3355 گەكتار اۋماققا جەتكەن. اعىمداعى جىلى 30 300 توننا جەمىس-جيدەك جينالدى. اۋداندا 33 تۋريستىك نىسان جۇمىس ىستەيدى. جىل باسىنان بەرى 2017 تۋريست كەلگەن.
