قازاقستان رەسپۋبليكاسى پارلامەنتىنىڭ ءماجىلىسى – زاڭ شىعارۋ بيلىگىن جۇزەگە اسىراتىن جانە تۇراقتى نەگىزدە ارەكەت ەتەتىن رەسپۋبليكانىڭ جوعارى وكىلدى ورگانى پالاتالارىنىڭ ءبىرى. ءماجىلىس دەپۋتاتتارىنىڭ وكىلەتتىك مەرزىمى – بەس جىل.
پارلامەنت ءماجىلىسى ءجۇز جەتى دەپۋتاتتان تۇرادى.
ءماجىلىستىڭ توقسان سەگىز دەپۋتاتى جالپىعا بىردەي, تەڭ جانە توتە سايلاۋ قۇقىعى نەگىزىندە جاسىرىن داۋىس بەرۋ ارقىلى پارتيالىق تىزىمدەر بويىنشا سايلانادى.
ءماجىلىستىڭ توعىز دەپۋتاتىن قازاقستان حالقى اسسامبلەياسى سايلايدى.
قازاقستان رەسپۋبليكاسىنىڭ جيىرما بەس جاسقا تولعان جانە قازاقستان اۋماعىندا سوڭعى ون جىلدا تۇراقتى تۇراتىن ازاماتى پارلامەنت ءماجىلىسىنىڭ دەپۋتاتى بولا الادى.
سوت ءىس-ارەكەتكە قابىلەتسىز دەپ تانىعان, سونداي-اق سوت ۇكىمى بويىنشا باس بوستاندىعىنان ايىرۋ ورىندارىندا وتىرعان ازاماتتاردىڭ سايلانۋعا قۇقىعى جوق.
پارتيالىق تىزىمدەر بويىنشا سايلاناتىن پارلامەنت ءماجىلىسىنىڭ دەپۋتاتتىعىنا كانديداتتار ۇسىنۋ قۇقىعى بەلگىلەنگەن تارتىپپەن تىركەلگەن ساياسي پارتيالارعا, ال قازاقستان حالقى اسسامبلەياسى سايلايتىن ءماجىلىس دەپۋتاتتىعىنا كانديداتتارعا قاتىستى - اسسامبلەيا كەڭەسىنە تيەسىلى.
ءماجىلىس دەپۋتاتتىعىنا سايلاۋ ءۇشىن ادامداردى پارتيالىق تىزىمگە ەنگىزۋ ساياسي پارتيانىڭ جوعارى ورگانى مۇشەلەرى جالپى سانىنىڭ كوپشىلىك داۋسىمەن جۇرگىزىلەدى.
پارتيالىق تىزىمدە ايەلدەر مەن جيىرما توعىز جاسقا تولماعان ادامداردىڭ سانى وعان ەنگىزىلگەن ادامداردىڭ جالپى سانىنىڭ كەمىندە وتىز پايىزىن قۇراۋعا ءتيىس.
ءماسليحاتتار – ءتيىستى اكىمشىلىك-اۋماقتىق بىرلىك حالقىنىڭ ەركىن بىلدىرەتىن جانە ونى ىسكە اسىرۋ ءۇشىن قاجەتتى شارالاردى ايقىندايتىن, سونداي-اق ولاردىڭ جۇزەگە اسىرىلۋىن باقىلايتىن جەرگىلىكتى وكىلدى ورگاندار. ءماسليحاتتار دەپۋتاتتارىنىڭ وكىلەتتىك مەرزىمى – بەس جىل.
ءماسليحاتتاردىڭ دەپۋتاتتارى جالپىعا بىردەي, تەڭ, توتە سايلاۋ قۇقىعى نەگىزىندە جاسىرىن داۋىس بەرۋ ارقىلى سايلانادى.
قازاقستان رەسپۋبليكاسىنىڭ جيىرما جاسقا تولعان ازاماتى ءماسليحات دەپۋتاتى بولىپ سايلانا الادى.
سوت ءىس-ارەكەتكە قابىلەتسىز دەپ تانىعان, سونداي-اق سوت ۇكىمى بويىنشا باس بوستاندىعىنان ايىرۋ ورىندارىندا وتىرعان ازاماتتاردىڭ سايلانۋعا قۇقىعى جوق.
پارتيالىق تىزىمدەر بويىنشا سايلاناتىن ءماسليحاتتار دەپۋتاتتىعىنا كانديداتتار ۇسىنۋ قۇقىعى بەلگىلەنگەن تارتىپپەن تىركەلگەن ساياسي پارتيالارعا تيەسىلى.
ءماسليحات دەپۋتاتى بولىپ سايلانۋ ءۇشىن ادامداردى پارتيالىق تىزىمگە ەنگىزۋ ساياسي پارتيانىڭ ءتيىستى فيليالىنىڭ نەمەسە وكىلدىگىنىڭ جوعارى باسشى ورگانى مۇشەلەرىنىڭ جالپى سانىنىڭ كوپشىلىك داۋسىمەن جۇرگىزىلەدى.
پارتيالىق تىزىمدە ايەلدەر مەن جيىرما توعىز جاسقا تولماعان ادامداردىڭ سانى وعان ەنگىزىلگەن ادامداردىڭ جالپى سانىنىڭ كەمىندە وتىز پايىزىن قۇراۋعا ءتيىس.
