قازاقستان تۋريستىك قاۋىمداستىعىنىڭ وكىلى, ەكوتۋريستىك اقپاراتتىق-رەسۋرستىق ورتالىعىنىڭ ۇيلەستىرۋشىسى الينا داۋلەتباقوۆانى الماتى قالاسىنان ارنايى شاقىرعان – ءبورلى اۋدانىنىڭ اكىمدىگى ەكەن.
"بۇگىنگى سەمينار-ترەنينگتە تۋريستەرگە قوناقجايلىق ءۇي قىزمەتىن كورسەتەتىن اۋىل تۇرعىندارىنا وتە پايدالى كەڭەستەر ايتىلدى. سونىڭ ىشىندە الماتى وبلىسىنا قاراستى كولساي كولدەرىن تاماشالاۋشى تۋريستەرگە ءتيىمدى قىزمەت كورسەتىپ, پايداعا كەنەلىپ جۇرگەن ساتى اۋىلىنىڭ تاجىريبەسى تالقىلاندى. قوناق قابىلدايتىن ۇيگە قويىلاتىن تالاپتار, قىزمەت ساپاسى, تاماق ءمازىرى, باعا ساياساتى سەكىلدى ناقتى كەڭەستەر سەمينارعا قاتىسۋشى اۋىل تۇرعىندارى ءۇشىن وتە ماڭىزدى بولدى دەپ ويلايمىن", دەيدى وسى شارانى ۇيىمداستىرۋشى عىلىمي زەرتتەۋلەردى قولداۋ قورىنىڭ جەتەكشىسى ايبولات قۇرىمباەۆ.
ەلىمىزدە سوڭعى جىلدارى تۋريزم سالاسىن دامىتۋعا ەرەكشە ءمان بەرىلۋدە. بيىلعى قىركۇيەك ايىندا قازاقستان حالقىنا جولداۋىندا پرەزيدەنت قاسىم-جومارت توقاەۆ "ەل ىشىندەگى ەكولوگيالىق تۋريزم مادەنيەتىن بارىنشا دامىتۋ – وتە ماڭىزدى ءىس" دەگەن بولاتىن.
سەميناردا "قوناقجاي ءۇي جانە ونىڭ ساپا ستاندارتتارى", "تۋريستكە بارىنشا دجايلى بولۋ ءۇشىن نە كەرەك؟", "تاعام مەن سۋسىن, ۇستەل جاساۋى, داستارحان ءمازىرى", "قوناق كۇتۋدىڭ ەڭ كەرەكتى تالاپتارى", ء"مازىردى ەسەپتەۋ, باعاسىن قويۋ", "تۋريستىك تاعامداردىڭ جاڭا ءتۇرىن تابۋ" جانە باسقا تاقىرىپتاردا قىزىقتى ساباقتار ءوتتى. اسىرەسە اۋىل تۋريزمىندە كەڭىنەن قولدانىلاتىن تابيعي ونىمدەر, ۇلتتىق-تاريحي تۇرمىس-سالت داعدىلارى, ءار اۋىلدىڭ وزىنە ءتان ەرەكشەلىكتەرىن ءتيىمدى پايدالانۋعا قاتىستى ناقتى اقىل-كەڭەس بەرىلدى.
باتىس قازاقستان وبلىسىندا تۋريزم سالاسىن دامىتۋ ماقساتىندا جارعاق قۇلاعى جاستىققا تيمەي جۇرگەن ايبولات شامۇرات ۇلى ءدال وسىنداي سەميناردى بوكەي وردا اۋدانىنداعى حان ورداسى اۋىلىندا, تەرەكتى اۋدانىنداعى ءسارىومىر اۋىلىندا وتكىزۋگە ۇسىنىس تاستاعان ەكەن. وكىنىشكە قاراي اۋدان باسشىلارى تاراپىنان قولداۋ تاپپاعان.
ء"بىز قازاقستان تۋريستىك قاۋىمداستىعىمەن بىرگە شالعاي اۋىلداردا شاعىن جانە ورتا بيزنەستى دامىتىپ, الەمدە كەڭ تاراعان Community Based Tourism (سۆت) جۇيەسىندە پايدا تابۋعا باۋلىعىمىز كەلەدى. بۇل ىستە تۋريسكە قىزمەت كورسەتۋ مادەنيەتى, ءوڭىردىڭ ۇلتتىق ءداستۇرى مەن داستارحان ءمازىرىن كوركەم تۇردە ۇسىنا ءبىلۋ وتە ماڭىزدى. بۇگىنگى سەمينار-ترەنينگ اۋىل تۇرعىندارىن وسىعان ۇيرەتەدى", دەيدى ايبولات قۇرىمباەۆ.
بورلىدە وتكەن سەمينار قورىتىندىسىندا ءوزارا ارىپتەستىك جونىندە كەلىسىم-شارتتارعا قول قويىلىپ, ءبورلى اۋدانىندا ىشكى ءتۋريزمدى دامىتۋ, بىرلەسكەن ءىس-شارالاردى ۇيىمداستىرۋ تۋرالى ۋاعدالاستىق جاسالدى.
باتىس قازاقستان وبلىسى
