سۋرەت: mofa.go.jp
جاپونيا ەلشىلىگىندە وتكەن جيىندا جاپونيانىڭ ەلىمىزدەگى توتەنشە جانە وكىلەتتى ەلشىسى يدجيما ياسۋماسا استانا قالاسىنىڭ №1 كوپسالالى قالالىق اۋرۋحاناسى مەن ەڭبەكشىقازاق كوپبەيىندى ورتالىق اۋداندىق اۋرۋحاناسىنىڭ وكىلدەرىمەن گرانتتىق كەلىسىمشارتقا قول قويدى. كەلىمسىمشارتتىڭ جالپى سوماسى – 85,224 دوللار.
ەلشى قارجىلاي قولداۋعا يە بولعان مەديتسينا ورتالىقتارىنىڭ وكىلدەرىن قۇتتىقتاي وتىرىپ, ءاربىر جوبا مەديتسينالىق قىزمەتتەردىڭ ساپاسىن ارتتىرىپ, ادامنىڭ ءومىرىن ساقتاۋدا ەلەۋلى ۇلەسى قوساتىنىنا سەنىم ءبىلدىردى. ۇيىم وكىلدەرى دە جاپونيا ۇكىمەتىنىڭ قازاق حالقىنا كورسەتىپ جاتقان قولداۋى ءۇشىن العىسىن جەتكىزدى.
ۇيىم وكىلدەرىنىڭ ايتۋىنشا, گرانتتىق قارجىعا استانا قالاسىنىڭ №1 كوپسالالى قالالىق اۋرۋحاناسى شامامەن 51,025 دوللاردى قۇرايتىن 7 پاتسيەنت مونيتورىن, ال ەڭبەكشىقازاق كوپبەيىندى ورتالىق اۋداندىق اۋرۋحاناسى 32 كرەاتينين اناليزاتورىن (باستاپقى جيىنتىعىمەن قوسا) ساتىپ الۋدى جوسپارلاپ وتىر.
ايتا كەتسەك, كۇنشىعىس ەلى ۇكىمەتىنىڭ «KUSANONE» باعدارلاماسى – ادام قاۋىپسىزدىگىن قامتاماسىز ەتۋ جونىندەگى شاعىن اۋقىمداعى الەۋمەتتىك جوبالارعا قايتارىمسىز كومەگى. گرانتتىق قولداۋ حالىقتىڭ قاراپايىم توپتارىنا جاردەمدەسىپ, ولاردىڭ قاۋىپسىزدىگىن قامتاماسىز ەتۋگە ۇلەسىن قوسادى. باعدارلاماعا جەرگىلىكتى بيلىك ورگاندارى, مەديتسينا, ءبىلىم مەكەمەلەرى, ۇكىمەتتىك ەمەس ۇيىمدار, قوعامدىق قورلار قاتىسا الادى. جوبا دەنساۋلىق ساقتاۋ, ءبىلىم, الەۋمەتتىك قامتاماسىز ەتۋ, ەكولوگيا, قورشاعان ورتانى قورعاۋ, كەدەيلىكپەن كۇرەس, ت.ب. سالالارعا ارنالعان. اتالعان باعدارلاما ەلىمىزدە 1997 جىلدان بەرى جۇزەگە اسىرىلىپ كەلەدى.
