سۋرەتتى تۇسىرگەن – ەسەنجول يسابەك
پاۆلودار قالاسىندا وتكەن «قىدىر اتا – بەرەكە مەن بىرلىكتىڭ نىشانى» اتتى اۋقىمدى ءىس-شارادا بيىكتىگى 5,5 مەترلىك «الىپ قىدىر اتا» ينستاللياتسياسى تانىستىرىلدى. ەرەكشە كومپوزيتسيا بەرەكە مەن مولشىلىقتىڭ, بىرلىك پەن ىزگىلىكتىڭ بەلگىسى رەتىندە جينالعان جۇرتشىلىقتىڭ نازارىن وزىنە اۋداردى. تانىستىرۋ راسىمىنە قازاقستان رەكوردتار كىتابىنىڭ وكىلى قۋاندىق قۇدايبەرگەنوۆ قاتىسىپ, الىپ نىساننىڭ دۇنيەجۇزىلىك رەكوردتار كىتابىنا («World Book of Records») ەنگەنىن مالىمدەدى.
جاڭا رەكوردقا مۇرىندىق بولعان «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ توراعاسى اينۇر جۇگىنىسوۆا قىدىر اتا بەينەسىن زاماناۋي نۇسقادا دارىپتەۋ ارقىلى جاس ۇرپاققا ۇلتتىق دۇنيەتانىمدى ءسىڭىرۋ, حالىقتى بىرلىك پەن بەرەكەگە شاقىرۋ سياقتى مىندەتتەر اتقارىلىپ وتىرعانىن, سونداي-اق مۇنداي جوبالاردىڭ ماڭىزى تەرەڭدە ەكەنىن اتاپ ءوتتى.
ءىس-شارا اياسىنداعى اسەرلى ساتتەردىڭ تاعى ءبىرى – اكە مەن بالاعا ارنالعان ۇلتتىق ەرلەر شاپاندارىن ءبىر مەزەتتە كيگىزۋ ءراسىمى بولدى. قازاقتىڭ ۇلتتىق قولونەر ءداستۇرىن جالعاستىرىپ جۇرگەن شەبەر انالاردىڭ قولىنان شىققان شاپاندار 500 قاتىسۋشىعا ارنايى دايىندالعان. بۇل ءراسىم اكە مەن بالا اراسىنداعى رۋحاني بايلانىستى, وتباسىلىق تاربيەنىڭ ماڭىزىن, ۇرپاقتار ساباقتاستىعىن تەرەڭ بەينەلەيدى.
پاۆلودار وبلىسى
