ءدۇبىرلى الاماننىڭ العاشقى باسەكەلەرىندە كوكپارشىلارىمىز قىتاي كومانداسىن 11:0 ەسەبىمەن جەڭسە, وزبەكستاننىڭ ءبىرىنشى قۇراماسىن 11:2 ناتيجەسىمەن ەڭسەردى. فينالدا قىرعىزستان قۇراماسىن 3:0 ەسەبىمەن ۇتتى. جەرلەسىمىز ەرعالىم جاقسىلىق حالىقارالىق ءتۋرنيردىڭ ۇزدىك ويىنشىسى ءارى سۇرمەرگەنى اتاندى. جاس وعلان ءدۇبىرلى دودادا ءوزىنىڭ ابجىلدىگىمەن دارالاندى.
«جاستارىمىز جۇكتەلگەن سەنىمگە سەلكەۋ تۇسىرمەي, سىن ساتىندە جاسىنداي جارقىرادى. ءبىز وسى تۋرنيردە چەمپيون اتانۋدى ماقسات ەتىپ, تىڭعىلىقتى دايىندالدىق. ارعىماقتارىمىز دا دوداعا جاراپ, قايرات تانىتتى. جىگىتتەر قاتەلىككە بوي الدىرماي, قارسىلاستاردىڭ تاكتيكالىق جوسپارىن بۇزىپ, وزدەرىنىڭ ويىن ورنەگىن ايگىلەدى. الدا ەڭ ۇلكەن الامان – دۇنيەجۇزىلىك كوشپەلىلەر ويىندارى. قىرعىزستاندا قوڭىر كۇزدە وتەتىن وسى سايىستا بارىمىزدى سالامىز», دەدى ۇلتتىق قۇرامانىڭ باس باپكەرى نۇرداۋلەت مومىنوۆ.
