جوبانىڭ اتالعان كىتاپحانا بازاسىندا جۇزەگە اسۋى كەزدەيسوق ەمەس. پرەزيدەنت قاسىم-جومارت توقاەۆ وقۋ مادەنيەتىن دامىتۋ مەن وقىرمان ۇلت قالىپتاستىرۋدىڭ ماڭىزىن ۇنەمى اتاپ ءوتىپ كەلەدى. بۇگىندە كىتاپ ءبىلىم كوزى عانا ەمەس, ويلاۋ قابىلەتىن دامىتۋدىڭ, دۇنيەتانىمدى كەڭەيتۋدىڭ, اقپاراتتى ءوز بەتىنشە سارالاي ءبىلۋدىڭ ماڭىزدى قۇرالى سانالادى.
– ەل ەرتەڭى وسى بالالار. ال كىتاپحانا ەل ەرتەڭىنىڭ بەرىك ىرگەسىن قالىپتاستىراتىن بىردەن-ءبىر رۋحاني ورتا. بۇگىنگى مەرەكە قارساڭىندا ء«داستۇر HUB» شىعارماشىلىق كەڭىستىگىنىڭ اشىلۋىمەن بارشاڭىزدى قۇتتىقتايمىن. جاستارىمىزدىڭ باس قوساتىن, وي جارىستىراتىن ورتاسى بولارى ءسوزسىز, – دەپ ىزگى نيەتىن ءبىلدىردى وبلىس اكىمى نۇرىمبەت ساقتاعانوۆ.
ءيا, شىعىس قازاقستاندا بۇل باعىتتاعى جۇمىستارعا ەرەكشە كوڭىل ءبولىنىپ جاتىر. وڭىردە بالالار مەن جاستار ساپالى ءبىلىم الىپ قانا قويماي, سىني ويلاۋعا, سۇراق قويا بىلۋگە, جاۋاپ ىزدەۋگە, ۇلتتىق مادەنيەت جانە داستۇرمەن بايلانىسىن نىعايتۋعا جاعداي جاساۋعا باسىمدىق بەرىلگەن.
جاڭا ء«داستۇر HUB» ورتالىعى بىرنەشە باعىتتى توعىستىرادى. مۇندا كىتاپ وقۋ, شىعارماشىلىق, ۇلتتىق مۇرا جانە زاماناۋي تەحنولوگيالار ءبىر كەڭىستىكتە ۇيلەسىم تاپقان.
كەڭىستىكتىڭ باستى نىشانى قازاق حالقىنىڭ مادەنيەتىن ايشىقتايتىن كيىز ءۇي. الايدا ۇلتتىق قۇندىلىقتار مۇندا زاماناۋي فورماتتا ۇسىنىلادى. مۋلتيمەديالىق تەحنولوگيالار, ينتەراكتيۆتى شەشىمدەر جانە جاساندى ينتەللەكت ەلەمەنتتەرى ارقىلى كەلۋشىلەر قازاق حالقىنىڭ تاريحىن, سالت-ءداستۇرى مەن مادەنيەتىن جاڭا قىرىنان تانىپ بىلە الادى.
كيىز ءۇيدىڭ ءار بولشەگى وزىندىك تاريح. ارنايى QR-كودتار ارقىلى قوناقتار ۇلتتىق ويۋ-ورنەكتەردىڭ ءمانى, تۇرمىستىق بۇيىمداردىڭ ەرەكشەلىگى, كيىز ءۇيدىڭ سيمۆوليكاسى تۋرالى بەينەماتەريالداردى تاماشالاي الادى. ەرەكشە ورىن كىتاپقا بەرىلگەن. مۇندا ادەبي كەزدەسۋلەر, شىعارماشىلىق شەبەرلىك ساباقتارى, ءبىلىم باعدارلامالارى, اشىق پىكىرتالاستار مەن بالالار جانە جاسوسپىرىمدەرگە ارنالعان ينتەراكتيۆتى ءىس-شارالار وتكىزۋ جوسپارلانىپ وتىر.
سونىمەن قاتار ء«داستۇر HUB» پودكاستار جازۋعا, بەينەكونتەنت ازىرلەۋگە, شىعارماشىلىق جوبالاردى جۇزەگە اسىرۋعا, زاماناۋي تسيفرلىق تەحنولوگيالاردىڭ كومەگىمەن قازاق ءتىلىن ۇيرەنۋگە ارنالعان الاڭ بولماق.
اشىلۋ كۇنى كىتاپحانا اۋماعى ۇلكەن وتباسىلىق مەرەكەگە اينالدى. قوناقتارعا «كوگالداعى وقۋ زالى», «التىن ساقا» ۇلتتىق ويىندار الاڭى, جاس سۋرەتشىلەرگە ارنالعان شىعارماشىلىق ايماق, تاقىرىپتىق فوتوزونالار, شەبەرلىك ساباقتارى, ينتەراكتيۆتى الاڭدار جانە «كارتون قالاشىعى» ۇيىمداستىرىلدى.
وسكەمەن
