10 قازان كۇنى ساعات 16.30. شاماسىندا ورال قالاسىنىڭ زاشاعان كەنتىندە ەكسترەميزگە قارسى ءىس-قيمىل جانە كريمينالدىق پوليتسيا قىزمەتكەرلەرى كۇدىكتى كورىنگەن «Nissan Maxima» اۆتوكولىگىن توقتاتقان. كولىك يەسى – 1989جىلى تۋعان قازتالوۆ اۋدانىنىڭ تۇرعىنى ەكەن. سالوندا اۋزىن شىمشىپ بايلاعان ءۇش قاپشىقتىڭ ءىشى تەكشەلەپ جيناعان كيىك ءمۇيىزى بولىپ شىقتى. ساناپ كورگەندە, بۇل قاپشىقتاردا 632 دانا ءمۇيىز بار ەكەنى انىقتالدى.
«وسى فاكتى بويىنشا قازاقستان رەسپۋبليكاسىقىلمىستىق كودەكسىنىڭ 339-1 بابى بويىنشا سوتقا دەيىنگى تەرگەپ, تەكسەرۋ باستالدى. كۇدىكتىگە «جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىن, ولاردىڭ بولىكتەرىن نەمەسە دەريۆاتتارىن زاڭسىز قولعا ءتۇسىرۋ, يەمدەنۋ, ساقتاۋ, وتكىزۋ, اكەلۋ, اكەتۋ, جونەلتۋ, تاسىمالداۋ نەمەسە جويۋ» دەگەن ايىپ تاعىلىپ, ۋاقىتشا ۇستاپۋ يزولياتورىنا قامالدى» دەلىنگەن باتىس قازاقستان وبلىستىق پوليتسيا دەپارتامەنتىنىڭ ءباسپاسوز قىزمەتى تاراتقان حابارلامادا.
بىزگە جەتكەن دەرەككە قاراعاندا, ۇستالعان ادام 2019 جىلى «زاڭسىز اڭشىلىقپەن اينالىسقانى ءۇشىن» جاۋاپقا تارتىلعان ەكەن. وسى جولعى قىلمىسى دالەلدەنسە, ول 7 جىلدان 12 جىلعا دەيىن باس بوستاندىعىنان ايىرىلۋى مۇمكىن.
جىل باسىنان بەرى باتىس قازاقستان وبلىسىندا قىلمىستىق كودەكستىڭ 339-1 بابى بويىنشا 39 فاكتى تىركەلگەن. ال وتكەن جىلدىڭ 9 ايىندا مۇنداي قىلمىستىڭ سانى 11 بولعان.
باتىس قازاقستان وبلىسى
