– قازىردىڭ وزىندە قالاداعى دەنساۋلىق ساقتاۋ, ءبىلىم بەرۋ جانە مادەنيەت نىساندارى جىلىتۋ ماۋسىمىنا تولىق دايىن. ال كوپپاتەرلى تۇرعىن ۇيلەردىڭ دايىندىعى 92 پايىز بولىپ تۇر. كۇن رايى كۇرت سالقىنداپ كەتكەندىكتەن ورال مەن اقساي قالالارىنا 5 قازاننان باستاپ جىلۋ بەرۋ جونىندە شەشىم قابىلداندى, – دەدى «جايىقجىلۋقۋات» اق باس ديرەكتورى قۋات مۋسين.
الايدا ورال قالاسىنداعى كوپقاباتتى تۇرعىن ۇيلەر جىلۋمەن تولىق قامتىلعان جوق. قۋات ناۋرىز ۇلىنىڭ ايتۋىنشا, جىلۋ شاھارعا تۇگەل تاراعانشا 2-3 كۇن ۋاقىت كەرەك. قازىر تراسساداعى جىلۋدىڭ ورتاشا تەمپەراتۋراسى 65-70 گرادۋس. بىرەر كۇندە 90 گرادۋسقا جەتۋى قاجەت.
جىلىتۋ ماۋسىمى باستالعانعا دەيىن قالاداعى كوپقاباتتى تۇرعىن ۇيلەرگە قىزمەت كورسەتەتىن پاتەر يەلەرى كووپەراتيۆتەرى ءوز اۋماعىنداعى ۇيلەردىڭ ماۋسىمعا دايىندىعى جونىندە قۇجات تاپسىرۋى كەرەك بولاتىن. بىراق مۇنداي تولقۇجات جاسالماعان ۇيلەر دە بار.
– ءوز ىسىنە جاۋاپكەرشىلىكسىز قاراپ جاتقان پاتەر يەلەرى كووپەراتيۆتەرى دە بار. بىراق ولارعا حات جولداپ, شۇعىل تۇردە, ءبىر-ەكى كۇن ىشىندە دايىندىق قۇجاتىن تاپسىرۋ جونىندە تالاپ قويدىق, – دەيدى ورال قالاسى تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى جاندوس دۇيسەنعاليەۆ.
«جىلۋ بەرۋگە دايىنبىز» دەپ وتىرعان كوممۋنالدىق مەكەمەلەردىڭ ءوز باسىندا دا شەشىلمەي كەلە جاتقان ماسەلە از ەمەس. ونىڭ ەڭ باستىسى – تۇرعىنداردىڭ تۇتىنعان قىزمەت بويىنشا بەرەشەگى. ماسەلەن ورالدىقتار بۇعان دەيىن پايدالانىلعان قىزمەت ءۇشىن «جايىقجىلۋقۋات» مەكەمەسىنە 350 ملن تەڭگەدەن استام قارجى بەرەشەك ەكەن. «باتىسسۋارناسى» مەكەمەسىنىڭ دە تۇرعىنداردان 200 ملن تەڭگەدەن اسا الاشاعى بار.
– قازىرگى ۋاقىتتا كوممۋنالدىق كاسىپورىندار بەرەشەك كولەمىن ازايتۋ بويىنشا ءوز جۇمىسىن جاساۋدا, – دەيدى ق.مۋسين.
باتىس قازاقستان وبلىسى
