وسى بايقاۋدىڭ «كوركەم ءسوز وقۋ» اتالىمىنا الماتى وبلىسىنىڭ كەربۇلاق اۋدانىنان بارىپ قاتىسقان باعىم ساقيجان توپ جارىپ شىعىپتى. باعىمنىڭ جاسى – بەستە. ول بيىل سارىوزەك كەنتىندەگى №49 ورتا مەكتەپتىڭ «0» سىنىبىنا وقۋعا باردى. سۇيكىمدى قىز ءتىلى شىققاننان تاقپاق جاتتاپ, مانەرلەپ وقۋعا داعدىلانىپتى. باعىم اباي اتاسىنىڭ مەرەيتويىنا وراي دانىشپان اقىننىڭ كوپ ولەڭىن جاتتاپ العان ەكەن, جاقىندا وتكەن «مەن دە جۇلدىز بولامىن» بايقاۋىندا «اتا-اناعا كوز قۋانىش» ولەڭىن جاتقا وقىدى. كىشكەنتاي كوركەمسوز وقۋشىنىڭ جاتىق ءتىلى مەن جاعىمدى ءۇنى, ساحناداعى ءسان-سالتاناتى مەن ۇلى اباي ولەڭدەرىنە دەگەن قۇرمەتى قازىلار القاسىن ءتانتى ەتىپ, ءبىرىنشى ورىنعا يە بولدى. بايقاۋ ۇيىمداستىرۋشىلارى باعىمعا كەلەر جىلى تۇركيا ەلىندە وتەتىن بالالار شىعارماشىلىعىن دامىتۋعا ارنالعان حالىقارلىق بايقاۋعا قاتىسۋعا جولداما بەردى.
ايتپاقشى, وسى بايقاۋدىڭ «بي» اتالىمىنا قاتىسقان تاعى ءبىر توپ جەتىسۋلىق بالالار جۇلدەلى بولىپتى. ەسكەلدى اۋداندىق مادەنيەت ءۇيى جانىنان قۇرىلعان «اليناز» بي ءانسامبلى دە «مەن دە جۇلدىز بولامىن» بايقاۋىنان جۇلدەلى ەكىنشى ورىن الىپ قايتتى.
الماتى وبلىسى
